ក្រចេះ ៖ គ្រោះចរាចរណ៍គួរឲ្យរន្ធត់មួយបង្កឡើងដោយរថយន្តដឹកប្រេងរបស់ក្រុមហ៊ុនតេលា បុកគោយន្តកន្ត្រៃ បណ្ដាលឲ្យមនុស្សម្នាក់បានស្លាប់យ៉ាងអាណោចអាធម៌នៅកន្លែងកើតហេតុ និងម្នាក់ទៀតរងរបួសធ្ងន់ កាលពីវេលាម៉ោង១២ថ្ងៃត្រង់ ថ្ងៃទី១២ ខែកុម្ភៈ ឆ្នាំ២០១៥ នៅចំណុចភូមិសំបួរ ឃុំស្វាយជ្រះ ស្រុកស្នួល ខេត្តក្រចេះ។
ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តដឹកប្រេង បើកបរយ៉ាងលឿនក្នុងទិសដៅបញ្ច្រាសទិសគ្នា លុះមកដល់ចំណុចកើតហេតុ ក៏បានរេចង្កូតទៅបុកនឹងគោយន្តដែលកំពុងបើកតាមផ្លូវនោះពេញទំហឹង បណ្ដាលឲ្យបុរសម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ ត្រូវបានគេបញ្ជូនយកទៅសង្គ្រោះនៅមន្ទីរពេទ្យបង្អែកស្រុកស្នួល។
សមត្ថកិច្ចស្រុកស្នួលបានឲ្យដឹងថា ក្រោយពេលកើតហេតុ អ្នកបើកបររថយន្តក្រុមហ៊ុនដឹកប្រេងនោះបានរត់គេចខ្លួនបាត់ រីឯសាកសពជនរងគ្រោះសមត្ថកិច្ចទាក់ទងប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃ ដោយឡែកវត្ថុតាងសមត្ថកិច្ចនាំទៅរក្សាទុកដើម្បីរង់ចាំដោះស្រាយគ្នាតាមច្បាប់៕
0 Comments