កំពង់ឆ្នាំង ៖ ប្រជាពលរដ្ឋនិយាយថា រហូតមកទល់ថ្ងៃនេះ ចំណាត់ការរបស់លោកអភិបាលខេត្តកំពង់ឆ្នាំងក្នុងការបង្ក្រាបបទល្មើសនេសាទអួន រួមផ្សំដោយកម្លាំងម៉ាស៊ីននៅតែបរាជ័យ ដោយសារតែបទល្មើសនេះនៅតែធ្វើសកម្មភាពយ៉ាងគគ្រឹកគគ្រេងនៅក្នុងដែននេសាទស្រុកជលគីរី។
ប្រជាពលរដ្ឋទាំងនេះបានបន្តនិយាយឲ្យដឹងថា បទល្មើសអួនដែលប្រើដោយកម្លាំងម៉ាស៊ីន នេះមានចំនួន៣គ្រឿង គឺបានធ្វើសកម្មភាពនេសាទស្ទើរពុំលស់ថ្ងៃនៅទន្លេធំ ក្នុងឃុំពាមឆ្កោក ក្នុងនោះមានអួន២គ្រឿង គេស្គាល់ថាថៅកែឈ្មោះ ងិន ជនជាតិវៀតណាម នៅភូមិក្បាល កោះពាមឆ្កោក និង១គ្រឿងទៀតគឺឈ្មោះ ឃាក ស៊ីម នៅព្រែកសេះនៅឃុំពាមឆ្កោកនេះដែរ ជាអ្នករត់ការកាង ហើយអួនទាំង៣គ្រឿងនេះជាអួនខ្នាតធំ អូសទាញដោយកម្លាំងម៉ាស៊ីនធុនធំ,មានម៉ាស៊ីនខ្យល់និងកម្មករពី១២ទៅ១៥នាក់ជាជនជាតិវៀតណាម ហើយធ្វើសកម្មភាពនេសាទតាំងពីខែវិច្ឆិកាមកម្ល៉េះ ដោយគ្មានការរំខានពីសមត្ថកិច្ចរដ្ឋបាលជលផល និងសមត្ថកិច្ចអាជ្ញាធរស្រុកជលគីរី នោះឡើយ។ កន្លងមកនេះលោក ឈួរ ច័ន្ទឌឿន អភិបាលខេត្តកំពង់ឆ្នាំងបានមានចំណាត់ការទប់ស្កាត់ និងបង្ក្រាបបទល្មើសនេសាទអួននេះ ប៉ុន្តែរហូតមកទល់ពេលនេះ បទល្មើសនេសាទនេះ នៅតែធ្វើសកម្មភាពនៅស្រុកជលគីរី ក្រោមល្បែងលេងបិទពួនរបស់សមត្ថកិច្ចរដ្ឋបាលជលផលនិងសមត្ថកិច្ច អាជ្ញាធរ។ កាលរសៀលថ្ងៃទី៧ ខែកុម្ភៈ ឆ្នាំ២០១៥ លោកអភិបាលខេត្តកំពង់ឆ្នាំងបាន មានប្រសាសន៍តបនឹងអ្នកសារព័ត៌មាន ទាក់ទិននឹងសកម្មភាពនេសាទឧបករណ៍អួននេះថា លោកនឹងបន្តមានចំណាត់ការចំពោះអួននោះ ប៉ុន្តែនៅល្ងាចថ្ងៃទី៩ ខែកុម្ភៈ ឆ្នាំ២០១៥នេះ គេឃើញអួន ទាំងនោះនៅតែធ្វើសកម្មភាពដដែល។ នៅខណៈនោះលោក សេង ប៊ុនឈឿន នាយខណ្ឌរដ្ឋបាល ជលផលកំពង់ឆ្នាំងបានប្រាប់អ្នកសារព័ត៌មានថា លោកនឹងបញ្ជាឲ្យមានការបង្ក្រាប។
ប្រជាពលរដ្ឋនិយាយថា ចំណាត់ការរបស់លោកនាយខណ្ឌរដ្ឋបាលជលផលរូបនេះ ជា ចំណាត់ការខ្យល់ ព្រោះថារហូតមកដល់ថ្ងៃនេះ គឺបទល្មើសនេសាទអួននោះនៅតែធ្វើសកម្មភាព នេសាទគគ្រឹកនៅស្រុកជលគីរីដដែល ហើយនៅក្បែរនឹងទីស្នាក់ការរបស់សមត្ថកិច្ចរដ្ឋបាលជលផលគីរីទៀតផង។
កូនថៅកែអួនឈ្មោះ ងិន បានប្រាប់អ្នកសារព័ត៌មានថា ការនេសាទរបស់គាត់គឺគាត់បានជួប ជាមួយជលផលអស់ហើយ។ ប្រជាពលរដ្ឋនិយាយថា មិនមានតែបទល្មើសអួននោះទេ នៅស្រុកជលគីរី គឺនៅមានបទល្មើសសម្រាស់រាប់ពាន់ដុំ ជាពិសេសនៅក្នុងតំបន់អភិរក្សព្រែកស្ដីដង្គង អតីតឡូត៍លេខ១០។ ប៉ុន្តែទោះជាយ៉ាងណាក្ដី ប្រជាពលរដ្ឋនៅតែមានជំនឿលើ លោក ឈួរ ច័ន្ទឌឿន អភិបាលខេត្តកំពង់ឆ្នាំងក្នុងការបំបែកបទល្មើសអួននេះ ព្រោះពួកគាត់ជឿជាក់លើឧត្តមគតិ និងឆន្ទៈរបស់លោក ហើយអ្វីដែលធ្វើឲ្យបទល្មើសអួននេះ ដំណើរការបានយ៉ាងរលូនដូច្នេះ គឺដោយសារតែសមត្ថកិច្ចរដ្ឋបាលជលផលខ្វះភាពស្មោះត្រង់នឹងថ្នាក់ដឹកនាំ៕
កង ចេស្ដា
0 Comments