ភ្នំពេញ ៖ បុរសម្នាក់បើកម៉ូតូរ៉ឺម៉កទៅដឹកជណ្ដើរយកទៅដាក់ផ្ទះតែមិនទាន់ដល់គោលដៅផងខ្យល់គ ដួលម៉ូតូធ្លាក់មកលើចិញ្ចើមផ្លូវ ស្លាប់ពេលបញ្ជូនទៅដល់មន្ទីរពេទ្យ ហេតុការណ៍នេះកើតឡើងកាលពីវេលាម៉ោង១២និង១៥នាទីថ្ងៃត្រង់ ថ្ងៃទី១១ ខែកុម្ភៈ ឆ្នាំ២០១៥ នៅចំណុចទល់មុខការ៉ាសសាំងMP ស្ថិតក្នុងភូមិដួង សង្កាត់ព្រែកព្នៅ ខណ្ឌព្រែកព្នៅ។
ប៉ូលិសមូលដ្ឋានបានឲ្យដឹងថា ជនរងគ្រោះដែលខ្យល់គដួលម៉ូតូរ៉ឺម៉កស្លាប់នោះឈ្មោះ ថាច គា ភេទប្រុស អាយុ២៨ឆ្នាំ មុខរបរកសិករ មានទីលំនៅភូមិសំបូរ ឃុំសំបូរ ស្រុកបាធាយ ខេត្តកំពង់ចាម បើកម៉ូតូសណ្ដោងរ៉ឺម៉ក ម៉ាកគុបមូល ពណ៌ខៀវ អត់ស្លាកលេខ។
សាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនរងគ្រោះបើកម៉ូតូសណ្ដោងរ៉ឺម៉កក្នុងទិសដៅពីទិសខាងជើងមកត្បូង ទៅដឹកជណ្ដើរនៅជិតគល់ស្ពានព្រែកព្នៅ យកទៅដាក់ផ្ទះនៅភូមិសំបូរ ឃុំសំបូរ ស្រុកបាធាយ ខេត្តកំពង់ចាម។ លុះធ្វើដំណើរមកដល់ចំណុចកើតហេតុខាងលើ មិនទាន់ដល់គោលដៅផង ម៉ូតូជនរងគ្រោះបានរ៉េចង្កូតមកខាងស្តាំដៃ ធ្លាក់ចិញ្ចើមផ្លូវ ហើយក៏ដួលបត់ម៉ូតូនិងរ៉ឺម៉ក ខណៈនោះជនរងគ្រោះបានធ្លាក់បោកក្បាលទៅនឹងដី សន្លប់ស្តូកស្តឹងតែម្តង។
ប្រភពបន្តថា ក្នុងខណៈជនរងគ្រោះខ្យល់គដួលម៉ូតូរ៉ឺម៉កនោះប៊ិះជ្រុលទៅចូលរថយន្តដឹកដំឡូងមីដែលគេចតស្ងៀម នៅចិញ្ចើមផ្លូវនោះទៀតផង។ បន្ទាប់ពីខ្យល់គសន្លប់ហើយនោះ កម្មករដែលលើកដំឡូងនៅក្បែរកន្លែងកើតហេតុនោះបាននាំគ្នាមកជួយធ្វើចលនា និងបានហៅរថយន្តសាម៉ុយដឹកយកទៅសង្គ្រោះនៅមន្ទីរពេទ្យ តែមិនទាន់ទៅដល់មន្ទីរពេទ្យផងជនរងគ្រោះបានស្លាប់បាត់ទៅហើយ។
ក្រោយកើតហេតុប៉ូលិសបានបញ្ជាក់ថា ការពិនិត្យសាកសព និងកន្លែងកើតហេតុឃើញថា ជនរងគ្រោះពិតជាស្លាប់ដោយសារខ្យល់គរពិតប្រាកដមែន មិនមានគ្រោះថ្នាក់ចរាចរណ៍បុកជាមួយរថយន្តនោះឡើយ។ ហើយសមត្ថកិច្ចប៉ូលិសក៏បានធ្វើការប្រគល់សាកសពទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅភូមិសំបូរ ឃុំសំបូរ ស្រុកបាធាយ ខេត្តកំពង់ចាម ដោយពុំមានការប្តឹងផ្ដល់អ្វីឡើយ៕
ឧត្តរ៉ា
0 Comments