ភ្នំពេញ ៖ កម្លាំងសមត្ថកិច្ចចម្រុះរបស់គណៈបញ្ជាការឯកភាពខណ្ឌសែនសុខ បានចាប់ខ្លួនបុរស២នាក់ពីបទសារាចរគ្រឿងញៀនខុសច្បាប់ចំនួន០១កូនកញ្ចប់តូច បានប្រព្រឹត្តកាលពីវេលាម៉ោង២០ និង៣០នាទីយប់ ថ្ងៃទី១១ ខែកុម្ភៈ ឆ្នាំ២០១៥ នៅតាមបណ្តោយផ្លូវលេខ១៩៨៦ សង្កាត់ភ្នំពេញថ្មី។
មនុស្ស២នាក់ខាងលើដែលត្រូវបានចាប់ខ្លួននោះមានឈ្មោះ វ៉ាន់ សំណាង អាយុ២៦ឆ្នាំ មុខរបរកម្មករសំណង់ ស្នាក់នៅផ្ទះជួលក្នុងសង្កាត់ភ្នំពេញថ្មី។ និងម្នាក់ទៀត ឈ្មោះ ជា សុភា អាយុ៣៤ឆ្នាំ មុខរបររត់ម៉ូតូឌុប ស្នាក់នៅផ្ទះលេខ៦៩ ក្នុងសង្កាត់បឹងកក់២ ខណ្ឌទួលគោក។
ប្រភពព័ត៌មានពីក្រុមសមត្ថកិច្ចមូលដ្ឋានបានឲ្យដឹងថា ការចាប់ខ្លួនជនជាប់ចោទទាំងពីរនេះ ជំហានដំបូងសមត្ថកិច្ចយើងបានប្រមូលកម្លាំងដាក់គោលដៅឆែកឆេរអាវុធជាតិផ្ទុះនៅតាមបណ្តោយផ្លូវលេខ១៩៨៦។
នៅវេលាម៉ោងប្រហែល២០និង៣០នាទី ក៏បានប្រទះឃើញជនទាំង២ជិះម៉ូតូមួយគ្រឿង ម៉ាកវីវ៉ា ពាក់ស្លាកលេខព៦៣២៨ភព១ ដោយមានការសង្ស័យសមត្ថកិច្ចបានឆែកឆេររកឃើញថ្នាំញៀន១កូនកញ្ចប់តូចនៅក្នុងហោប៉ៅឈ្មោះ វ៉ាន់ សំណាង ក៏ចាប់ខ្លួនតែម្តង៕
សឿន
0 Comments