ភ្នំពេញ ៖ ដោយសារតែពិបាកចិត្តនិងលោកប្ដីគាត់មានស្រីថ្មីភ្លេចប្រពន្ធកូននោះ បានធ្វើឲ្យស្រីជាប្រពន្ធសម្រេចចិត្តគិតខ្លីចេញពីផ្ទះឆ្ពោះមកលើស្ពានជ្រោយចង្វាថ្មីប៉ុនប៉ងលោតទឹកសម្លាប់ខ្លួនតែមិនសម្រេចដូចបំណងនោះទេ ព្រោះត្រូវបានប៉ូលិសយាមស្ពានឃើញទាន់រត់មកចាប់ឃាត់ទាន់បញ្ជូនទៅប៉ុស្តិ៍ស្រះចកដើម្បីអប់រំកុំឲ្យមានបំណងចង់គិតខ្លីដូច្នេះតទៅទៀត។
ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៩និង៣០នាទីព្រឹក ថ្ងៃទី១២ ខែកុម្ភៈ ឆ្នាំ២០១៥ នៅចំណុចស្ពានជ្រោយចង្វាថ្មីផ្នែកខាងលិច ស្ថិតក្នុងសង្កាត់ស្រះចក ខណ្ឌដូនពេញ។
សមត្ថកិច្ចបានឲ្យដឹងថា ស្ត្រីដែលមានវិបត្តិប៉ុនប៉ងសម្លាប់ខ្លួនឈ្មោះ យិន ម៉ាស៊ី អាយុ៤១ឆ្នាំ ស្នាក់នៅផ្ទះលេខ៤៨ ផ្លូវសុធារស សង្កាត់ទន្លេបាសាក់ ខណ្ឌចំការមនមានប្ដីឈ្មោះគង់ រដ្ឋា អាយុ៥០ឆ្នាំ មុខរបរនគរបាល។
ប្រភពព័ត៌មានពីកន្លែងកើតហេតុគេឃើញស្ត្រីវ័យកណ្ដាលម្នាក់មានទឹកមុខស្រពាប់ស្រពោនរបៀបមនុស្សពិបាកចិត្តយ៉ាងខ្លាំងបានដើរឡើងស្ពានជ្រោយចង្វាថ្មីពីលិចមកកើត លុះដល់ពាក់កណ្ដាលស្ពានមានបំណងប្រុងលោតសម្លាប់ខ្លួន សំណាងល្អខណៈនោះប៉ូលិសប្រចាំការស្ពានបានឃើញទាន់ ក៏រត់មកចាប់ឃាត់ទាន់ពេល រួចបញ្ជូនមកប៉ុស្តិ៍ស្រះចកដើម្បីសួរនាំពីមូលហេតុផងដែរ។
នៅចំពោះមុខសមត្ថកិច្ចស្ត្រីដែលមានវិបត្តិប្រុងលោតទឹកសម្រាប់ខ្លួននោះបានប្រាប់សមត្ថកិច្ចថា ដោយសារគាត់ពិបាកចិត្តនឹងប្ដីមានស្រីថ្មីរយៈពេល៨ឆ្នាំហើយ ថែមទាំងមានកូនប្រុស២នាក់ទៀត ទើបធ្វើឱ្យគាត់ចេះតែពិបាកចិត្តយ៉ាងខ្លាំង ក៏បានប៉ុនប៉ងលោតសម្លាប់ខ្លួនម្តងហើយនៅស្ពានតាខ្មៅ តែមិនបានសម្រេច ដោយសារប៉ូលិសឃាត់ទាន់ ហើយនៅលើកទី២នេះមករកលោតសម្លាប់ខ្លួននៅស្ពានជ្រោយចង្វានេះ ក៏ត្រូវប៉ូលិសឃាត់ទាន់ពេលទៀត ធ្វើឲ្យគាត់មិនចង់រស់ឡើយ។ បច្ចុប្បន្នស្ត្រីរងគ្រោះត្រូវបានក្រុមគ្រួសារមកទទួលនៅទៅផ្ទះវិញហើយ៕
រស្មី
0 Comments