ភ្នំពេញ ៖ ប្រមុខរាជរដ្ឋាភិបាលកម្ពុជាមានប្រសាសន៍កាលពីថ្ងៃទី១០ ខែកុម្ភៈ ឆ្នាំ២០១៥ថា ថ្នាក់ដឹកនាំនៃគណបក្សក្នុងរាជរដ្ឋាភិបាល និងគណបក្សក្រៅរដ្ឋាភិបាលបានឯកភាពរួចហើយ ក្នុងការសរសេរច្បាប់ ដែលពាក់ព័ន្ធនឹងផលប្រយោជន៍រវាងម្ចាស់ផ្ទះជួលជាមួយអ្នកជួលផ្ទះនោះ។
នៅក្នុងពិធីប្រគល់សញ្ញាបត្រដល់និស្សិតសកលវិទ្យាល័យនីតិសាស្ត្រ និង វិទ្យាសាស្ត្រសេដ្ឋកិច្ចនៅកោះពេជ្រ សម្ដេចអគ្គមហាសេនា បតីតេជោ ហ៊ុន សែន មានប្រសាសន៍ថា ម្សិលមិញឯកឧត្តម សម រង្ស៊ី ប្រធានគណបក្សសង្គ្រោះជាតិបានពិភាក្សាជាមួយខ្ញុំ តាមរយៈការប្រឹក្សាពិគ្រោះយោបល់ ដោយយើងត្រូវមានច្បាប់មួយការពារទាំងសងខាង ទាំងម្ចាស់ផ្ទះ ឬបន្ទប់ជួល និងអ្នកជួលដែលមានទាំងកម្មករ-កម្មការិនី សិស្ស និងនិស្សិតជាដើម។ យើងបានឯកភាពគ្នាក្នុងការរៀបចំក្រុមការងារសរសេរច្បាប់នេះតែម្តង ដើម្បីការពារឱ្យមានការទទួលខុសត្រូវទាំងសងខាង។
សម្ដេចតេជោថ្លែងថា កាលពីសម័យរដ្ឋកម្ពុជាយើងមានច្បាប់មួយស្ដីពីកិច្ចសន្យា និងការទទួលខុសត្រូវក្រៅកិច្ចសន្យា ប៉ុន្តែច្បាប់នេះ បច្ចុប្បន្នបានបញ្ចូលទៅក្នុងក្រមរដ្ឋប្បវេណីទៅហើយ ដូច្នេះត្រូវពិនិត្យមើលក្រមរដ្ឋប្បវេណី ហើយសរសេរចេញបង្កើតជាច្បាប់មួយ។
សម្ដេច ហ៊ុន សែន មានប្រសាសន៍ថា ថ្នាក់ដឹកនាំទាំងពីរគណបក្សដែលនៅក្នុង និងក្រៅរាជរដ្ឋាភិបាលបានឯកភាពរួចហើយ ដើម្បីបង្កើតក្រុមការងារសេសេរច្បាប់នេះ ទោះបីជាយើងមិនទាន់បានដាក់ឈ្មោះច្បាប់នេះក៏ដោយ។ សម្ដេចតេជោថ្លែងថា ខ្ញុំជាមួយឯកឧត្តម សម រង្ស៊ី បានឯកភាពគ្នាថានឹងធ្វើច្បាប់នេះ ដែលគោលដៅនៃការសរសេរច្បាប់នេះសម្រាប់បម្រើឱ្យគោលដៅ ដែលយើងចង់បាន។ យើងបានឯកភាពគ្នាថានឹងធ្វើច្បាប់នេះ ដែលគ្របដណ្ដប់ទិដ្ឋភាព ដែលពាក់ព័ន្ធនឹងការជួល និងអ្នកជួលពីគេឱ្យមានការទទួលខុសត្រូវទាំងសងខាង។ ខ្ញុំក៏បានប្រាប់ទៅឯកឧត្តម សម រង្ស៊ី និងឯកឧត្តម ស ខេង ឱ្យទាក់ទងជាមួយគ្នារៀបចំក្រុមការងារសរសេរច្បាប់នេះតែម្តង។ ប៉ុន្តែមុនច្បាប់នេះចេញខ្ញុំសូមអំពាវនាវចំពោះម្ចាស់ផ្ទះជួល មេត្តាកុំដំឡើងថ្លៃផ្ទះជួល ដើម្បីឱ្យកម្មករ-កម្មការិនីរបស់យើងទទួលបានប្រាក់កម្រៃកាន់តែច្រើនសម្រាប់ជីវភាពផ្ទាល់ខ្លួនផង និងសម្រាប់ក្រុមគ្រួសារផងដែរ ព្រោះរាជរដ្ឋាភិបាលបានប្រឹងប្រែងណាស់ដើម្បីអំពាវនាវឱ្យមានវិនិយោគមកបណ្ដាក់ទុនវិនិយោគនៅក្នុងប្រទេសរបស់យើង។ សូមម្ចាស់ផ្ទះជួលមេត្តាកុំដំឡើងថ្លៃ នេះជាការអំពាវនាវរបស់រាជរដ្ឋាភិបាល៕
ស្នាយពល
0 Comments