ឧត្តរមានជ័យ ៖ បុរសវ័យក្មេងចំនួន៣នាក់ បានស្លាប់ភ្លាមៗនៅនឹងកន្លែង ខណៈបុរសរងគ្រោះទាំង៣ជិះម៉ូតូលឿននៅពលយប់ ចៃដន្យបានបុកគូថរថយន្តធុនធំពីក្រោយយ៉ាងពេញទំហឹង។ ហេតុការណ៍ដ៏រន្ធត់នេះបានកើតឡើងកាលពីថ្ងៃទី១០ ខែកុម្ភៈ ឆ្នាំ២០១៥ វេលាម៉ោងប្រហែល៣ទៅម៉ោង៦ទៀបភ្លឺ ស្ថិតក្នុងភូមិទួលស្វាយ ឃុំត្រពាំងតាវ ស្រុកអន្លង់វែង។ បើតាមការសន្និដ្ឋានជាជំហានដំបូងនៅកន្លែងហេតុ អ្នកខ្លះនិយាយថា មុនពេលកើតហេតុ ជនរងគ្រោះជិះម៉ូតូមួយគ្រឿងមានគ្នា៣នាក់ ធ្វើដំណើរពីកើតទៅលិចក្នុងល្បឿនលឿន លុះដល់កន្លែងកើតហេតុក៏បានបុកគូថរថយន្តគេពីក្រោយយ៉ាងពេញទំហឹង ដែលករណីនេះជនរងគ្រោះអាចចាំងភ្លើងហ្វារថយន្តមកពីខាងមុខ ទើបមើលមិនឃើញរថយន្តដែលធ្វើដំណើរក្នុងទិសដៅស្របគ្នា។ អ្នកខ្លះនិយាយថា ជនរងគ្រោះអាចផឹកស្រវឹងមកពីអន្លង់វែងទើបបើកម៉ូតូលឿនយ៉ាងនេះ រហូតមើលរថយន្តនៅខាងមុខមិនឃើញ។ ប៉ុន្តែទោះបីជាយ៉ាងណានេះ ជាការសន្និដ្ឋានប៉ុណ្ណោះ មិនអាចជាផ្លូវការបានទេ ព្រោះនៅកន្លែងកើតហេតុជាវាលស្ងាត់មិនមានផ្ទះប្រជាពលរដ្ឋ ទើបបានជាមិនមានអ្នកដឹងរឿងបែបនេះ។
ជនរងគ្រោះទាំង៣នាក់ត្រូវបានគេស្គាល់ឈ្មោះ ១-ហូ ណុប ភេទប្រុស អាយុ២០ឆ្នាំ ២-ឈ្មោះ ផន សុផល ភេទប្រុស អាយុ២៥ឆ្នាំ និងទី៣-ឈ្មោះ រ៉ាម សុភក្រត្រា ភេទប្រុស អាយុ១៩ឆ្នាំរស់នៅភូមិឃុំកើតហេតុខាងលើ ចំណែកម៉ូតូម៉ាកសង់១២៥ ពណ៌ខ្មៅសេរី២០១៥ ពាក់ស្លាកលេខកំពង់ធំ1E8487 ។ ជាទូទៅករណីគ្រោះថ្នាក់ចរាចរណ៍នៅក្នុងខេត្តឧត្តរមានជ័យភាគច្រើនគឺកើតឡើងដោយសារកត្តាយានយន្តមិនមានលក្ខណៈគ្រប់គ្រាន់ ដូចជាគ្មានភ្លើងស៊ីញ៉ូមុខក្រោយ និងគោយន្តកន្ត្រៃរបស់ប្រជាពលរដ្ឋបើកបរនៅតាមដងផ្លូវនៅពេលយប់គ្មានចំណាំងផ្លាតសម្រាប់ឲ្យគេបានមើលឃើញជាដើម ដែលបញ្ហានេះសមត្ថកិច្ចនគរបាលចរាចរណ៍មេត្តាត្រួតពិនិត្យមើលផង។ សូមបញ្ជាក់ថា ក្រោយពីការពិនិត្យវាស់វែងរួច សាកសពជនរងគ្រោះទាំង៣ត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
ចាន់ ធី
0 Comments