ព្រៃវែង ៖ ផ្នូររបស់ដូនតាប្រជាពលរដ្ឋស្លូតត្រង់ដែលមានម្ចាស់ឈ្មោះ គីម ស្រីពៅ ភេទស្រី អាយុ៤៥ឆ្នាំ មានទីលំនៅភូមិ៥ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង ត្រូវបានម្ចាស់ដីដែលមានក្បាលដីនិងកន្ទុយដីជាប់គ្នាជួលឡានដឹកដីចាក់លុបពីលើផ្នូរជីដូនជីតាគួរឲ្យហួសចិត្ត។ ករណីដែលមានការចាក់ដីលើផ្នូររំលោភយកដីខាងលើនេះគឺបានកើតឡើងកាលពីថ្ងៃទី៩ ខែកុម្ភៈ ឆ្នាំ២០១៥ នៅត្រង់ចំណុចតាមបណ្តោយផ្លូវជាតិលេខ១ ស្ថិតក្នុងភូមិព្រែករាំង ឃុំប្រលិចប្រាសាទ ស្រុកពាមរក៍ខេត្តព្រៃវែង។ អ្នកស្រី គីម ស្រីពៅដែលជាម្ចាស់ផ្នូរបានរៀបរាប់ប្រាប់អ្នកយកព័ត៌មានយើងឲ្យដឹងថាដីមួយកន្លែងដែលមានទីតាំងខាងលើគឺជាដីរបស់ជីដូនជីតារបស់គាត់បានកាន់កាប់ជាយូរយារណាស់មកហើយ សពរបស់បងប្អូនជីដូនជីតារបស់គាត់គឺបានបញ្ចុះនៅទីនោះទាំងអស់ សរុបមានចំនួន៩ផ្នូរ ហើយគាត់តែងតែគោរពនិងបុណ្យជារាងរាល់ឆ្នាំ និងមានរបងព័ទ្ធជុំវិញ ដែលមានប្រវែង៨ម៉ែត្រគុណ៨ម៉ែត្រ ស្រាប់តែនៅថ្ងៃកើតហេតុខាងលើភាគីខាងម្ចាស់ដីឈ្មោះ ស្តើង ខនបានឲ្យឡានដឹកដីចាក់ពីលើផ្នូររបស់បងប្អូនជីដូនជីតារបស់គាត់ ក្រោយមករូបគាត់បានទៅឃាត់មិនឲ្យចាក់បន្តទៀត តែត្រូវបងប្អូនរបស់ម្ចាស់ដីគំរាមកំហែងដោយអាងបងប្អូនធ្វើអ្នកធំ ដែលរូបគាត់និងបងប្អូនបាននាំគ្នាមកឃាត់ម្តងទៀត ទើបគេផ្អាកកាចាក់ដី តែត្រូវបានបុគ្គលខាងលើចាក់លុបអស់ចំនួន៤ផ្នូរទៅហើយ។ អ្វីដែលគាត់គួរឲ្យហួសចិត្តនោះ ម្ចាស់ដីដែលមានឈ្មោះ ស្តើង ខននោះ អាងអំណាចមានខ្សែអ្នកធំ បានបំពានច្បាប់ចាក់ដីលុបផ្នូររបស់ដូនតារបស់គេដែលមានតាំងពីយូរយារណាស់មកហើយ។ ក្រោយពីមានជម្លោះខាងលើរូបគាត់បានប្ដឹងទៅសាលាស្រុកពាមរក៍ បន្ទាប់មកសាលាស្រុកបានហៅភាគីទាំងសង្ខាងមកសម្របសម្រួលគ្នានៅថ្ងៃទី១០ ខែកុម្ភៈ ឆ្នាំ២០១៥។
មុននឹងធ្វើការសម្របសម្រួលនោះដែរ អ្នកយកព័ត៌មានយើងបានសួរទៅលោក ជុំ សាមឿនអភិបាលនៃគណៈអភិបាលស្រុកពាមរក៍ពាក់ព័ន្ធនឹងករណីខាងលើនេះដែរ តែលោកប្រាប់ថា មិនមានការសម្របសម្រួលអីទេ ពីព្រោះរូបគាត់មិនទាន់បានទទួលពាក្យបណ្ដឹងនោះទេ តែរហូតដល់ម៉ោងប្រហែលជាម៉ោង២រសៀល ស្រាប់តែលិចមុខឯកឧត្តមម្នាក់ដែលគេស្គាល់ថាធ្វើការនៅក្រសួងទេសចរណ៍ដែលត្រូវជាកូនរបស់ឈ្មោះ ស្តើង ខន ចេញមុខមកដោះស្រាយ និងសម្របសម្រួលហើយនៅក្នុងការសម្របសម្រួលនោះផងដែរ ប្រភពបានឲ្យដឹងថា ឯកឧត្តមរូបនោះបានប្រើភាសាមិនសមរម្យជាច្រើនដូចជា និយាយសួររកសំបុត្រកម្មសិទ្ធិកាន់កាប់ដីផ្នូរ និងនិយាយថាដីនៅស្រុកពាមរក៍គឺសុទ្ធតែជាដីរបស់គាត់ទាំងអស់ជាដើម។ មានការជជែកគ្នាអស់រយៈពេលយ៉ាងយូរ ភាគគីខាងម្ចាស់ផ្នូរបានយល់ព្រមទទួលយកការសម្របសម្រួលដោយមិនចង់មានរឿងវែងឆ្ងាយពីព្រោះគេមានអំណាចជាឯកឧត្តម៕
វិចិត្រ
0 Comments