កំពង់ធំ ៖ តុលាការខេត្តកំពង់ធំកោះហៅមន្ត្រីនគរបាលយុត្តិធម៌ និងអង្គភាពពាក់ព័ន្ធ ដើម្បីចូលរួមប្រជុំស្ដីពីការរៀបចំសំណុំរឿង និងដំណើរការអនុវត្តដោយនីតិវិធីចំពោះគ្រឿងញៀន ក្នុងការបញ្ជូនសំណុំរឿងបញ្ជូនទៅតុលាការ។
ពិធីប្រជុំមន្ត្រីនគរបាលយុត្តិធម៌ ត្រូវបានចូលរួមពីសំណាក់លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ និងលោក សាយ ណូរ៉ា ព្រះរាជអាជ្ញារង និងប៉ូលិស ប៉េអិមចូលរួម ជាច្រើននាក់នៅក្នុងសាលប្រជុំតុលាការខេត្តកំពង់ធំនៅព្រឹកវេលាម៉ោង៨និង៣០នាទី ថ្ងៃទី១០ ខែកុម្ភៈ ឆ្នាំ២០១៥។ លោក សាយ ណូរ៉ា ព្រះរាជអាជ្ញារងបានមានប្រសាសន៍ណែនាំឲ្យមន្ត្រីនគរបាលយុត្តិធម៌ទាំងអស់ខិតខំសិក្សា អនុវត្តន៍ច្បាប់ និងការរៀបចំដោយសន្តិវិធីក្នុងការចុះបង្ក្រាបបទល្មើសពាក់ព័ន្ធទៅនឹងគ្រឿងញៀន និងសូមឲ្យមានការប្រុងប្រយ័ត្នក្នុងពេលចុះប្រតិបត្តិការ និងសូមឲ្យមានមានការលុបបំបាត់នូវការដាំដុះសារធាតុញៀននៅតាមភូមិសាស្ត្រ ប៉ុស្តិ៍ អធិការត្រូវទទួលខុស ត្រូវចំពោះធាតុសារធាតុនៅក្នុងគោលដៅទទួលខុសត្រូវ។ លោក ចាន់ ស៊ីណា អធិការរងស្រុកបារាយណ៍បានឲ្យដឹងថា បច្ចុប្បន្នស្រុកបារាយណ៍បានធ្វើការបង្ក្រាបជាបន្តបន្ទាប់ និងធ្វើឲ្យទទួលបានជោគជ័យ តែក្នុងនោះសមត្ថកិច្ចបានជួបនូវផលលំបាក ខណៈពេលដែលមុខសញ្ញាណាត់គ្នា ទទួលវត្ថុតាង និងវេរលុយតាមវិន។
លោកវរសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោងបានឲ្យដឹងថា ចំពោះគ្រឿងញៀនបានថយចុះក្នុងឆ្នាំ២០១៤នេះ និងបានធ្វើការបង្ក្រាបជាបន្តបន្ទាប់ ក្នុងកិច្ចសហការល្អជាមួយកងកម្លាំង និងប្រជាពលរដ្ឋដើម្បីឲ្យមានការចូលរួមចំណែកផ្តល់ព័ត៌មានមកសមត្ថកិច្ចប្រចាំការមូលដ្ឋាន ដើម្បីថែរក្សានូវសន្តិសុខ សុវត្ថិភាព ក៏ដូចជាការគោរពនូវគោលនយោបាយភូមិ/ឃុំមានសុវត្ថិភាពទាំង៩ចំណុច។
លោក អ៊ិត សុធា ព្រះរាជអាជ្ញាខេត្តកំពង់ធំបានមានប្រសាសន៍ផ្តាំផ្ញើឲ្យមន្ត្រីនគរបាលយុត្តិធម៌ទាំងអស់យកចិត្តទុកដាក់ស៊ើបអង្កេតរកទីតាំង និងឃ្លាំមើលមុខសញ្ញាការចែកចាយគ្រឿងញៀនវែករកមុខមេខ្លោងធំដែលនៅពីក្រោយការចែកចាយគ្រឿងញៀន និងសូមឲ្យបន្តការស៊ើបអង្កេតបន្ថែមទៅមុខសញ្ញាដែលត្រូវបានបង្ក្រាប ក្រោយពីការបង្ក្រាបបានវត្ថុតាងត្រូវមានការវិចខ្ចប់ឲ្យបានត្រឹមត្រូវ និងការរៀបចំសំណុំបែបបទបញ្ជូនទៅតុលាការ។ លោកបានបន្តថា មាត្រាច្បាប់តាមមាត្រា៨៥ គឺត្រូវមានការណែនាំអប់រំចំពោះលើកទី១ លើកទី២ ចំណែកលើកទី៣គឺជាករណីមិនរាងចាល ត្រូវបានបញ្ជូនទៅដាក់ពន្ធនាគារតាមការឯកភាព អាណាព្យាបាល ក្នុងនោះក៏បាននែនាំឲ្យប៉ុស្តិ៍រដ្ឋបាលចុះណែនាំដល់អាជីវករដែលលក់កាវឲ្យក្មេងសម្រាប់យកទៅហិត ដែលជាសារធាតុ។ ចំណែកមន្ត្រីនគរបាលយុត្តិធម៌ហាមដាច់ខាតមិនឲ្យមានការចូលរួមលាក់លៀម ជួយមុខសញ្ញាចែកចាយគ្រឿងញៀន លក្ខណៈនៃការចុះបង្ក្រាបជាក់ស្តែង ពេលដែលបានជួបនឹងបទល្មើសជាក់ស្តែងត្រូវតែបង្ក្រាបភ្លាម ដោយមិនចាំបាច់រង់ចាំសុំការអនុញ្ញាតិនោះទេ ត្រូវតែបង្ក្រាបរួចចាំរាយការណ៍មកព្រះរាជអាជ្ញាតាមក្រោយ៕
ដោយ ប៊ុនរដ្ឋា.
0 Comments