ភ្នំពេញ ៖ គណៈកម្មការនីតិកម្ម និងយុត្តិធម៌ (គណៈកម្មការទី៦) នៃរដ្ឋសភា ដឹកនាំដោយលោក ប៉ែន បញ្ញា ជាប្រធានកាលពីព្រឹកថ្ងៃទី១២ ខែកុម្ភៈ ឆ្នាំ២០១៥ បានដឹកនាំគណៈប្រតិភូរបស់ខ្លួន ជួបពិភាក្សាការងារជាមួយលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌នៅទីស្ដីការក្រសួងយុត្តិធម៌។
ការជួបពិភាក្សានេះ គឺដើម្បីស្វែងយល់ពីការងាររបស់ក្រសួងយុត្តិធម៌ដែលបានធ្វើកន្លងមក រួមទាំងផែនការយុទ្ធសាស្ត្របន្តទៅមុខរបស់ក្រសួងយុត្តិធម៌ និងពិភាក្សាទៅលើបញ្ហាសំខាន់មួយចំនួន ហើយបើតាមលោក ជិន ម៉ាលីន អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌បានថ្លែងទៅកាន់អ្នកសារព័ត៌មានបន្ទាប់ពីជំនួបពិភាក្សានាព្រឹកនោះថា នៅក្នុងជំនួបនោះបានលើកឡើងពីបញ្ហាជាច្រើនដូចជា បញ្ហាច្បាប់ទាំង៣ បញ្ហាបង្កើតសាលាឧទ្ធរណ៍តំបន់ បញ្ហាប្រជាពលរដ្ឋភ័យខ្លាចនៅពេលកោះហៅឡើងតុលាការ បញ្ហាសង្គមស៊ីវិលរិះគន់លើច្បាប់ទាំង៣ បញ្ហាពលរដ្ឋដឹងកក់ដែលត្រូវចាប់ខ្លួន បញ្ហាផ្សេងៗមួយចំនួនទៀត។
ទាក់ទងបញ្ហាការបង្កើតច្បាប់ទាំង៣នោះ លោក ជិន ម៉ាលីន បានលើកឡើងថា នឹងធ្វើឲ្យការដោះស្រាយបញ្ហាឲ្យចំជំនាញនីមួយៗ ដោយមិនមានការដោះស្រាយរបៀបច្របូកច្របល់ទៀតនោះទេ ហើយច្បាប់ទាំងបីនេះ នឹងនាំឲ្យមានការបង្កើតសាលាឧទ្ធរណ៍តំបន់ ហើយសាលាឧទ្ធរណ៍តំបន់នេះ ត្រូវបង្កើតចំនួន៧ តែជំហានដំបូង គឺបង្កើត៣សិន ដែលមាននៅខេត្តត្បូងឃ្មុំ ខេត្តបាត់ដំបង និងខេត្តព្រះសីហនុ ហើយការបង្កើតសាលាឧទ្ធរណ៍តំបន់បន្ថែមនេះ វានឹងជួយសម្រួលដល់ការកកស្ទះ និងមិនពិបាកឲ្យប្រប្រជាពលរដ្ឋឡើងមកភ្នំពេញ។ លោកបន្តថា នៅពេលដាក់ឲ្យអនុវត្តន៍ច្បាប់ទាំង៣នេះ ក្រសួងយុត្តិធម៌នឹងមានបញ្ហាប្រឈមមួយចំនួន ដូចជា ធនធានមនុស្ស និងហិរញ្ញវត្ថុជាដើម។
លោកបានឲ្យដឹងដែរថា ក្រៅពីច្បាប់ទាំង៣ គឺកំពុងរៀបចំច្បាប់លក្ខន្តិកៈក្រឡាបញ្ជី អាជ្ញាសាលា និងសាការីជាដើម។ ចំណែកច្បាប់មួយទៀត ដែលទើបព្រមព្រៀងគ្នាថ្មីៗនេះ បន្ទាប់ពីមានការពិភាក្សារវាងគណបក្សទាំងពីរនៅក្នុងរដ្ឋសភា គឺសេចក្តីព្រាងច្បាប់ស្ដីពីការគ្រប់គ្រងតម្លៃការជួលផ្ទះ ដើម្បីសម្រួលដល់ប្រជាពលរដ្ឋ ដែលមានចំណូលទាប ដូចជា កម្មកររោងចក្រ អ្នកក្រីក្រ ឬមន្ត្រីរាជការក្រីក្រជាដើមមិនឲ្យមានការឡើងតម្លៃស្រេចតែចិត្តនោះទេ ហើយលោក ប៉ែន បញ្ញា បានបញ្ជាក់ហើយថានឹងរៀបចំឲ្យចេញជាសេក្តីព្រាងច្បាប់ ដោយមានការចូលរួមពីស្ថាប័នពាក់ព័ន្ធ ធ្វើយ៉ាងណាធ្វើឲ្យសេចក្តីព្រាងច្បាប់នេះ បានចូលរួមការផលប្រយោជន៍របស់ប្រជាពលរដ្ឋទាំងសងខាង។
ចំពោះបញ្ហាមួយទៀត គឺទស្សនៈរបស់ប្រជាពលរដ្ឋចំពោះតុលាការ ក៏ត្រូវបានលើកឡើងផងដែរ ហើយលោកបានបញ្ជាក់ថា នៅពេលប្រជាពលរដ្ឋត្រូវបានកោះហៅទៅសាកសួរ គឺពួកគាត់មានការភ័យខ្លាច ប៉ុន្តែតាមពិតនៅពេលនោះ មិនទាន់ត្រូវបានកំណត់ថា មានទោសនោះទេ ហើយបញ្ហានេះ ក្រសួងក៏បានបង្កើតកន្លែងប្រឹក្សាផ្នែកច្បាប់នៅតាមស្រុក/ខណ្ឌចំនួន៤០ទូទាំងប្រទេស ដើម្បីឲ្យពួកគាត់បានយល់ច្បាស់ពីតួនាទី និងអ្វីដែលគាត់ត្រូវធ្វើដើម្បីកុំឲ្យមានការភ័យខ្លាច។ ដោយឡែកបញ្ហាប្រាក់ខែ ក៏ត្រូវបានលើកឡើងផងដែរ។ លោកបញ្ជាក់ថា ប្រាក់ខែបានកើនឡើងហើយ តែមិនទាន់ឆ្លើយតបទៅនិងសេចក្តីត្រូវការរបស់មន្ត្រីតុលាការ និងចៅក្រមនោះទេ។ ជាមួយគ្នានោះ ក៏បានគិតគូរពីប្រាក់ឧបត្ថម្ភ និងបញ្ហាផ្ទះស្នាក់នៅផងដែរ ដោយហេតុថា ចៅក្រមត្រូវបានប្ដូរពីខេត្តមួយ ទៅកាន់ខេត្តមួយទៀត ដូច្នេះត្រូវគិតឲ្យបានដិតដល់លើបញ្ហានេះ។
លោកបានបន្តថា នៅក្នុងកិច្ចពិភាក្សានោះ ក៏បានលើកឡើងពីបញ្ហាដែលសង្គមស៊ីវិលរិះគន់លើច្បាប់ទាំង៣ដែរ ប៉ុន្តែតាមពិតការរិះគន់នោះជាការយល់ច្រឡំ ពីព្រោះការងារដែលរដ្ឋមន្ត្រីក្រសួងយុត្តិធម៌អាចសម្រេចបាននោះ គឺមានតែផ្នែករដ្ឋបាលបែបបទការងាររដ្ឋបាល និងហិរញ្ញវត្ថុតែប៉ុណ្ណោះ ចំណែកការសម្រេចក្តី ការអនុវត្តរឿងក្តី គឺជាសិទ្ធិរបស់តុលាការ ហើយរដ្ឋមន្ត្រីមិនអាចលូកដៃចូលទៅសម្រេចកិច្ចការជំនួសតុលាការបានទេ។ លោកបញ្ជាក់ថា កាលពីថ្មីៗនេះ ក្រសួងបានធ្វើសិក្ខាសាលាមួយ ដោយមានកាតចូលរួមពីភាគីពាក់ព័ន្ធទាំងអស់ ទាំងសង្គមស៊ីវិលជាតិ អន្តរជាតិ ដើម្បីពិភាក្សាលើបញ្ហានេះ ហើយក្រោយការរៀបចំសិក្ខាសាលានោះ ខាងសង្គមស៊ីវិលបានបន្ថយការរិះគន់ ដោយសារពួកគាត់បានយល់។
ទាក់ទងបញ្ហាសកម្មជនដីធ្លី និងសកម្មជនគណបក្សសង្គ្រោះជាតិ ដែលកំពុងជាប់នៅក្នុងពន្ធនាគារនោះ តាមរយៈលោក ជិន ម៉ាលីន លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ បានលើកឡើងថា ការដែលចាប់ខ្លួន ឬក៏ឃុំខ្លួនសកម្មជនដីធ្លី មិនមែនជាការរំលោភទៅលើសិទ្ធិសេរីភាពនៃការបញ្ចេញមតិ ឬក៏រំលោភទៅលើច្បាប់បាតុកម្មទេ ក៏ប៉ុន្តែវាជាការអនុវត្តនីតិវិធីព្រហ្មទណ្ឌ ពីព្រោះដោយសារតែពួកគេបានប្រព្រឹត្តបទល្មើសព្រហ្មទណ្ឌតែបើពួកគេគ្រាន់តែធ្វើបាតុកម្ម ការបញ្ចេញមតិ ទៅតាមគោលការណ៍ច្បាប់ដែលមានចែងនៅក្នុងច្បាប់បាតុកម្មដោយសន្តិវិធី វាមិនមានបញ្ហាអ្វីទេ ក៏ប៉ុន្តែពួកគេបានប្រព្រឹត្តនូវបទល្មើសព្រហ្មទណ្ឌ ដែលបានរំលោភទៅនឹងច្បាប់ព្រហ្មទណ្ឌ គឺពួកគេបានទៅបិទផ្លូវដែលធ្វើឲ្យរាំងស្ទះដល់ចរាចរណ៍ និងធ្វើឲ្យប៉ះពាល់ដល់សាធារណៈ ហើយការឃុំខ្លួននេះ គឺដំណើរការនីតិវិធីគឺមិនមែនសំអាងទៅលើច្បាប់បាតុកម្មដោយសន្តិវិធីទេ ក៏ប៉ុន្តែគឺជាការរំលោភទៅលើច្បាប់ព្រហ្មទណ្ឌដែលមានជាធរមាន ហើយគឺជាការអនុវត្តនីតិវិធីព្រហ្មទណ្ឌសុទ្ធសាធ មិនមែនជាការរឹតត្បិតសេរីភាពនៃការបញ្ចេញមតិ ឬក៏សិទ្ធិសេរីភាពក្នុងការធ្វើបាតុកម្មទេ។
លោកបានបន្តថា ទាក់ទងការចាប់ខ្លួនសកម្មជនគណបក្សសង្គ្រោះជាតិ គឺកំពុងតែស្ថិតនៅក្នុងដំណើរការនីតិវិធី ហើយការសម្រេចឲ្យឃុំខ្លួន នៅក្រៅឃុំបណ្ដោះអាសន្ន ឬក៏សម្រេចឲ្យដោះលែងយ៉ាងណានោះ វាគឺជាអំណាចរបស់តុលាការ ដែលត្រូវសម្រេចផ្អែកលើទិដ្ឋភាពច្បាប់ និងផ្អែកទៅលើភស្តុតាង និងស្ថានភាពជាក់ស្តែង ដែលកើតមាននៅក្នុងអំពើប្រព្រឹត្តល្មើសទាំងអស់នេះ ហើយបញ្ហានេះ ក្រសួងយុត្តិធម៌មិនអាចធ្វើអន្តរាគមន៍ទៅក្នុងវិស័យតុលាការបានទេ គឺជារឿងដំណើរការនីតិវិធីសុទ្ធសាធ ហើយនេះមិនមែនជារឿងនយោបាយទេ គឺជាការអនុវត្តច្បាប់ព្រហ្មទណ្ឌសុទ្ធសាធ ដោយសារតែពួកគេបានប្រព្រឹត្តនូវបទល្មើសព្រហ្មទណ្ឌ ហើយដំណើរការនីតិវិធីព្រហ្មទណ្ឌនេះ គឺស្ថិតនៅក្នុងតុលាការ ដែលក្រសួងយុត្តិធម៌មិនអាចជ្រៀតជ្រែកបានទេ។
អ្នកនាំពាក្យក្រសួងយុត្តិធម៌បានលើកឡើងថា ចំពោះការលើកឡើងបញ្ហារត់ការនៅតាមតុលាការ ឬមួយអំពើពុករលួយ ឬការឃុំខ្លួនខុសនីតិវិធី និងដំណើរការក្តីខ្លះចាត់ការយូរ ចាត់ការឆាប់ គឺក្រសួងយុត្តិធម៌មានយន្តការក្នុងការត្រួតពិនិត្យទៅលើយន្តការទាំងអស់នេះហើយ លោកទទួលស្គាល់ថា តុលាការរបស់យើងមួយចំនួនអាចកង្វះនូវសមត្ថភាព ការអនុវត្តនីតិវិធីទៅមានការខុសឆ្គងមួយចំនួន ឬមួយក៏មួយចំនួនទៀតប្រព្រឹត្តនូវទង្វើមិនសមស្របនៅតាមតុលាការ ហើយនៅពេលដែលយើងដាក់អនុវត្តច្បាប់ទាំងបីនេះ គឺវានឹងកាត់បន្ថយនូវបញ្ហាទាំងអស់នេះ ហើយនឹងឈានទៅដល់ការលុបបំបាត់ទាំងស្រុង។ ពីព្រោះថា ច្បាប់ទី១-ស្ដីពីអង្គការចាត់តាំងតុលាការ ក្រសួងនឹងរៀបចំរចនាសម្ព័ន្ធតុលាការដែលមានរដ្ឋបាលតុលាការសម្រួលការងារដល់ចៅក្រម និងព្រះរាជអាជ្ញា។ ច្បាប់ទី២-ទាក់ទងដល់លក្ខន្តិកៈចៅក្រម ព្រះរាជអាជ្ញា គឺទាក់ទងដល់ការគ្រប់គ្រងមនុស្ស និងរបៀបរបបធ្វើការ និងច្បាប់ទី៣-ការរៀបចំប្រព្រឹត្តទៅនៃឧត្តមប្រឹក្សាអង្គចៅក្រម គឺដើម្បីត្រួតពិនិត្យមើលឯករាជ្យភាពនៃអំណាចតុលាការ និងត្រួតពិនិត្យធានាតុលាការ គឺបំពេញការងាររបស់ខ្លួនទៅតាមនីតិវិធីច្បាប់ជាធរមាន។
តាមលោកបានបញ្ជាក់ថា នៅពេលដែលច្បាប់ទាំងបីនេះដាក់អនុវត្តបានពេញលេញ បញ្ហាទាំងអស់ដែលបានលើកឡើងនេះ កាត់បន្ថយ និងឈានដល់លុបបំបាត់ទាំងស្រុង ហើយនឹងលើកតម្កើងជំនឿទុកចិត្តរបស់ប្រជាពលរដ្ឋមកលើវិស័យតុលាការឡើងវិញ ហើយនឹងជួយសម្រួលសេវាយុត្តិធម៌ឲ្យវាកាន់តែឆាប់រហ័សកៀកជិតប្រជាពលរដ្ឋ និងមានប្រសិទ្ធភាពជាងមុន៕
កោះកែវ
0 Comments