ភ្នំពេញ ៖ ក្នុងជំនួបសម្ដែងការគួរសមជាមួយសម្ដេចអគ្គមហាសេនាបតី តេជោ ហ៊ុន សែន នៅវិមានសន្តិភាពកាលពីថ្ងៃទី១២ ខែកុម្ភៈ ឆ្នាំ២០១៥ ឯកឧត្តមបណ្ឌិត Lee Duk Hoon ប្រធានធនាគារនីហរ័ណ អាហរ័ណ របស់សាធារណរដ្ឋកូរ៉េមានប្រសាសន៍ថា រដ្ឋាភិបាលកូរ៉េត្រៀមខ្លួនជាស្រេច ដើម្បីជំរុញកិច្ចសហប្រតិបត្តិការនៃប្រទេសទាំងពីរកម្ពុជា-សាធារណរដ្ឋកូរ៉េឱ្យកាន់តែរឹងមាំទ្វេឡើងថែមទៀត ពិសេសលើវិស័យសេដ្ឋកិច្ច តាមរយៈបទពិសោធន៍ និងគាំទ្រគោលនយោបាយរបស់រាជរដ្ឋាភិបាលកម្ពុជាផងដែរ។
លោក អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានប្រាប់ក្រុមអ្នកយកព័ត៌មាននៅក្រោយជំនួបនោះថា សម្ដេចតេជោ នាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅបំផុត ជូនចំពោះរដ្ឋាភិបាល និងប្រជាជនកូរ៉េ ដែលបានផ្តល់នូវជំនួយឥតសំណងក៏ ដូចជាឥណទានដល់កម្ពុជា ព្រមទាំងផ្តល់ជំនួយក្នុងការបណ្តុះបណ្តាលធនធានមនុស្ស និងការទទួលយកពលករខ្មែរទៅបំពេញការងារនៅប្រទេសកូរ៉េជាដើម។ សម្ដេចតេជោមានប្រសាសន៍បន្តថា ប្រទេសកូរ៉េបានឆ្លងកាត់នូវស្ថានភាពដ៏អាក្រក់ កាលពីទសវត្សរ៍៥០ ហើយកម្ពុជាក៏ទទួលរងនូវស្ថានភាពប្រហែលគ្នានោះដែរ ក្នុងន័យនេះ បទពិសោធន៍របស់កូរ៉េ គឺពិតជាមានសារៈសំខាន់ខ្លាំងណាស់ក្នុងការយកមកជំរុញការអភិវឌ្ឍនៅប្រទេសកម្ពុជានោះ។
តាមរយៈកិច្ចសន្ទនាគ្នានោះ សម្ដេចតេជោនាយករដ្ឋមន្ត្រីបានស្នើដល់ភាគីកូរ៉េ ពិនិត្យលទ្ធភាពធ្វើការសិក្សាលើការកសាងកំណាត់ផ្លូវជាតិលេខ៣ពីរាជធានីភ្នំពេញទៅកាន់ខេត្តកំពត និងវាលរេញ ពិនិត្យលទ្ធភាពក្នុងការជួយសិក្សាពីបញ្ហាគ្រោះទឹកជំនន់ និងគ្រោះរាំងស្ងួតនៅខេត្តបន្ទាយមានជ័យរបស់ប្រទេសកម្ពុជាផងដែរ។
សំណើដ៏មានសារៈសំខាន់ទាំងនោះត្រូវបានឯកឧត្តមបណ្ឌិត Lee Duk Hoon សន្យាថានឹងលើកយកទៅពិភាក្សាជាមួយនឹងថ្នាក់ដឹកនាំកូរ៉េ ពិសេសការពិភាក្សាក្នុងដំណើរទស្សនកិច្ចរបស់សម្ដេចតេជោទៅកាន់ប្រទេសកូរ៉េក្នុងពេលដ៏ខ្លីខាងមុខ៕
ស្នាយពល
0 Comments