ភ្នំពេញ ៖ នាយកប្រតិបត្តិរបស់ក្រុមហ៊ុន Jardine Matheson Holdings លោក Lord James Sassoon បានថ្លែងថា រូបលោកមានការអបអរសាទរយ៉ាងខ្លាំងជូនចំពោះសម្ដេចតេជោ ហ៊ុន សែន ដែលបានដឹកនាំប្រទេសកម្ពុជាអស់រយៈពេលជាង៣០ឆ្នាំកន្លងមកទទួលបាននូវភាពជោគជ័យដ៏ត្រចះត្រចង់បំផុតនោះ។
នៅពេលជួបសម្ដែងការគួរសមជាមួយសម្ដេចអគ្គមហាសេនាបតី តេជោ ហ៊ុន សែន កាលពីថ្ងៃទី១២ ខែកុម្ភៈ ឆ្នាំ២០១៥ លោក Lord James Sassoon បានជម្រាបជូនសម្ដេចតេជោថា រូបលោកបានមកកាន់ប្រទេសកម្ពុជាកាលពី២២ឆ្នាំមុន ហើយនៅពេលនេះបានឃើញយ៉ាងច្បាស់ពីវឌ្ឍនភាព និងការអភិវឌ្ឍរបស់ប្រទេសកម្ពុជា។ លោក Lord James Sassoon មានប្រសាសន៍ដែរថា ក្រុមហ៊ុនរបស់លោកមានអាយុកាលជាង១៨០ឆ្នាំមកហើយ និងមានការធ្វើជំនួញដោយដាក់ទុនប្រមាណ៩០% នៅក្នុងបណ្ដាប្រទេសក្នុងទ្វីបអាស៊ី ដោយឡែកក្រុមហ៊ុនរបស់លោកមានវត្តមាននៅកម្ពុជារយៈពេល១៥ឆ្នាំមកហើយ ដោយបានដាក់ទុនវិនិយោគជាមួយនឹងផ្សារទំនើបឡាក់គី ធនាគារអេស៊ីលីដា និងបណ្ដាក្រុមហ៊ុនអចលនវត្ថុជាច្រើនទៀត មិនតែប៉ុណ្ណោះក្រុមហ៊ុននឹងសាងសង់អគារការិយាល័យដ៏ទំនើបមួយនៅក្នុងឆ្នាំ២០១៦ដែលមានទឹកប្រាក់ជាង១០០លានដុល្លារអាម៉េរិក។
លោក អ៊ាង សុផល្លែត ជំនួយការសម្ដេចតេជោនាយករដ្ឋមន្ត្រីបានឱ្យដឹងថា សម្ដេចតេជោបានស្វាគមន៍ និងលើកទឹកចិត្តដល់ក្រុមហ៊ុនដែលបានបណ្ដាក់ទុនវិនិយោគនៅកម្ពុជា។ សម្ដេចនាយករដ្ឋមន្ត្រីមានប្រសាសន៍បន្តថា កម្ពុជាបានធ្វើការយកចិត្តទុកដាក់យ៉ាងខ្លាំងទៅលើបរិយាកាសវិនិយោគនៅក្នុងប្រទេស តាមរយៈការបង្កើតឡើងនូវវេទិការាជរដ្ឋាភិបាល និងវិស័យឯកជន ពោលគឺរាជរដ្ឋាភិបាលបានធ្វើការដោះស្រាយរាល់បញ្ហារបស់ផ្នែកឯកជន ហើយរាជរដ្ឋាភិបាលកំពុងកសាងបន្ថែមនូវហេដ្ឋារចនាសម្ព័ន្ធដឹកជញ្ជូន ផ្លូវគោក ផ្លូវអាកាស និងផ្លូវទឹក ដើម្បីបម្រើឱ្យវិស័យឯកជនក្នុងការជំរុញការវិនិយោគពីផ្នែកឯកជន។
នៅក្នុងជំនួបពិភាក្សាគ្នានោះដែរ សម្ដេចតេជោនាយករដ្ឋមន្ត្រីមានប្រសាសន៍ដែរថា ចំពោះតម្លៃអគ្គិសនីចាប់ពីពេលនេះតទៅគឺមានតែការចុះថ្លៃដោយមិនមានការឡើងថ្លៃនោះទេ៕
ស្នាយពល
0 Comments