ព្រះសីហនុ ៖ យើងឃើញមានវីឡាឈើដ៏ប្រណីតតូចៗចំនួន២៧ខ្នងកំពុងបង្អួតសោភ័ណនៅរង់ចាំស្វាគមន៍ភ្ញៀវទេសចរជាតិ និងអន្តរជាតិក្នុងដំណើរកំសាន្តប្រកបដោយភាពសប្បាយរីករាយនិងរ៉ូម៉ែនទិកបំផុតនៅលើដែនដីកោះសង្សារ ដែលកំពុងតែបង្អួតសម្រស់ឆើតឆាយនៅកណ្ដាលមហាសាគរនាខេត្តព្រះសីហនុនោះ។
កោះសង្សារស្ថិតនៅប្រជុំកោះរុងភាគនិរតីនៃតំបន់ឆ្នេរសមុទ្ររបស់ប្រទេសកម្ពុជា ហើយនៅទីនេះគឺប្រៀបបានទៅនឹងឋានសួគ៌ធម្មជាតិសំរាប់ភ្ញៀវទេសចរលំអទៅដោយសណ្ឋាគារ និងរមណីយដ្ឋានដ៏ប្រណីតបំផុតដែលគ្មានកន្លែងណាប្រៀបប្រដូចបានឡើយ ព្រោះអីសម្រស់ទេសភាពនៅទីនេះស្រស់ត្រកាលណាស់ល្វឹងល្វើយដោយលំហ ផ្ទៃសមុទ្រឆ្ងាយផុតកន្ទុយភ្នែក មានឆ្នេរខ្សាច់សស្អាត ខ្យល់ជំនោរបរិសុទ្ធ នៅលើដែនកោះមានដើមរុក្ខជាតិលាស់ស្លឹកគ្រប់រដូវកាលខៀវស្រងាត់ រួមទាំងមានហ្វូងមច្ឆជាតិតូចៗជាច្រើនប្រភេទហិចហែលប្រដេញគ្នាក្នុងផ្ទៃទឹកប្រៃដែលចាំងឆ្លុះមើលឃើញដល់បាតខ្សាច់គួរឲ្យចេតនាណាស់សម្រាប់អ្នកទេសចរដែលមកសម្រាកលំហែកាយនៅលើកោះសង្សារ។
កោះសង្សារជារមណីយដ្ឋានមួយមានស្តង់ដារខុសប្លែកពីកន្លែងកំសាន្តផ្សេងៗអ្វីៗដែលមាននៅទីនេះគឺពោរពេញទៅដោយភាពល្អប្រណីត ស្ថិតនៅចំងាយ២៩គីឡូម៉ែត្រតែប៉ុណ្ណោះ ហើយវាជាការងាយស្រួលបំផុតសម្រាប់ភ្ញៀវទេសចរមានបំណងចង់មកលេងឬស្នាក់នៅលើដែនកោះ ដែលកំពុងតែបង្អួតសម្រស់តាមរយៈការអភិវឌ្ឍន៍និងការកែច្នៃពីប្រតិបត្តិករមគ្គទេសក៍សុទ្ធតែលំដាប់ផ្កាយនោះ គឺអាចធ្វើដំណើរដោយការជិះទូកពីកំពង់ផែខេត្តព្រះសីហនុ ប្រហែល៤០នាទីឬតាមឧទ្ធម្ភាគចក្រក៏បាន។ កោះនេះរៀបចំឡើងដោយផ្ដោតលើគំនិតច្នៃប្រឌិតជាកោះឯកជនមានម៉ូដអគារផ្ទះវីឡាតូចៗបណ្ដែតខ្លួនលើផ្ទៃទឹកសមុទ្រលំអបន្ថែមដោយព្រៃឈើតំបន់ឆ្នេរ ពិសេសកោះសង្សារទាំងគូដែលនៅមិនឆ្ងាយពីគ្នាប៉ុន្មាននេះ ក៏មានស្ពានឈើដើរឆ្លងពីកោះមួយទៅកោះមួយបានយ៉ាងរំភើប។
បន្ទាប់ពីនោះនៅរមណីយដ្ឋានកោះសង្សារមានទាំងភោជនីយដ្ឋាន ស្ប៉ា ម៉ាស្សា កន្លែងមុជទឹកមើលផ្កាថ្មបាតសមុទ្រ កន្លែងលំហាត់ប្រាណ លេងកីឡាក្នុងទឹក និងលើគោក មានយានជំនិះជិះកំសាន្តដើរមើលទេសភាពបរិស្ថាននៅជុំវិញកោះដែលសំបូរដោយធនធានជីវចម្រុះយ៉ាងសំបូរបែបទាំងនៅលើគោកនិងក្នុងបាតសមុទ្រ។ ក្នុងចំណោមកោះទាំងពីរនេះគឺកោះបងនិងកោះអូនកោះដែលមានទិដ្ឋភាពស្រស់ស្អាត និងសំបូរដើមឈើធំៗនោះគឺកោះបង ហើយអ្វីដែលមាននៅលើកោះសង្សារទាំងគូក្រោមការអភិវឌ្ឍពីក្រុមហ៊ុនឯកជននេះ បច្ចុប្បន្នបានក្លាយទៅជាចំណីចក្ខុ និងជាទីចំណាប់អារម្មណ៍របស់ភ្ញៀវទេសចរបរទេសដែលចូលមកទស្សនាចរណ៍នៅប្រទេសកម្ពុជា។
រាល់សម្ភារៈបំពាក់សុទ្ធតែទំនើបៗទៅតាមស្តង់ដារ ស្ថិតនៅក្នុងកូនវីឡាតូចៗទាំងនោះមានផ្ទាំងគំនូរ គ្រឿងសង្ហារិមផ្សេងៗប្រកបដោយក្បូរក្បាច់ល្អវិចិត្រ មានអាងងូតទឹកនៅក្នុងកូនវីឡាដែលអាចឲ្យភ្ញៀវទេសចរត្រាំកាយបណ្ដើរ គយគន់មើលទេសភាពបណ្ដើរ តាមប្រឡោះមាត់បង្អួច និងមានសេវាបម្រើជូនដោយម្ហូបអាហារយ៉ាងពិសេសៗ ដែលមានរសជាតិឆ្ងាញ់ពិសាកំដរដោយការស្តាប់តូរ្យតន្ត្រីបំពេអារម្មណ៍ឲ្យលន្លង់លន្លោចលើកកែវស្រាបៀ និងស្រាសាំប៉ាញក្រេបរសជាតិប្រកបទៅដោយភាពរ៉ូម៉ែនទិកណាស់។ អ្នកទេសចរចូលចិត្តមកកំសាន្តនៅលើកោះសង្សារនឹងបានរីករាយជាមួយបរិយាកាសធម្មជាតិបរិសុទ្ធ ហែលទឹក ដើរលេងតាមឆ្នេរមើលព្រះសុរិយារះ និងពេលថ្ងៃលិច រួមទាំងការញាំអាហារជួបជុំក្រុមគ្រួសារ មិត្តភក្ដិ ឬគូស្នេហ៍ ដោយភ្ញៀវទេសចរអាចបន្តស្នាក់នៅក្នុងកូនវីឡាដ៏ប្រណីតទាំងនោះបានចំណង់ចំណូលចិត្ត។
នៅកោះសង្សារលោកអ្នកអាចកុម្ម៉ង់អាហារញាំបានតាមតម្រូវការ ពោលមានអាហារបែបខ្មែរនិង អឺរ៉ុប ឬម្ហូបកូនកាត់ដែលល្បីឈ្មោះចំអិនដោយស្នាដៃជនបរទេសនៅទីនេះគឺឆាមឹកអីតាលី និងការីភ្លៅកង្កែប។ ទីនេះប្រសិនបើលោកអ្នកមិនធ្លាប់មកទេប្រាកដជាគិតថាជាកោះនៅឆ្ងាយដាច់ស្រយាលគ្មានអ្វីប្លែកឬសប្បាយនោះឡើយ ប៉ុន្តែនៅពេលយើងបានមកដល់ហើយម្នាក់ៗពិតជាមិនអាចអត់ទ្រាំនឹងជញ្ជក់មាត់ស្ងើចសរសើរនោះឡើយ ព្រោះអ្វីៗដែលយើងបានប្រទះឃើញនៅមានលើកោះតូចច្រឡឹងនេះវាពិតជាអស្ចារ្យណាស់ថែមទាំងមានរោងភាពយន្តបញ្ចាំងរឿងបែបហូលីវូដសម្រាប់ភ្ញៀវទេសចរចូលមើលកំសាន្តនាពេលរាត្រីនៅលើកោះថែមទៀតផង។
មួយថ្ងៃពេញដំណើរកំសាន្តនៅលើកោះសង្សារទាំងពេលសុរិយារះរហូតដល់ព្រះទិនកររលត់អស្តង្គតទៅវិញនោះ គឺសុទ្ធតែជាផ្ទាំងទស្សនីយភាពធម្មជាតិដ៏ស្រស់បំព្រងរកគ្មាន ពិសេសនៅក្បែរកោះសង្សារនេះដែរ ក៏នៅមានសម្រស់ព្រៃកោងកាងលាតសន្ធឹងប្រឹងលូតចេញពីទឹកពណ៌បៃតងខ្ចីរាប់រយហិកតា រឹតតែបង្ហាញនូវការទាក់ទាញ ប៉ុន្តែតម្លៃនៃការស្នាក់នៅលេងកំសាន្តលើកោះសង្សារនេះក៏វាញាក់សាច់តាមហ្នឹងដែរ គឺក្នុងមួយបន្ទប់ត្រូវចំណាយប្រាក់ចាប់ពី១.០៤០ទៅ៣.០០០ដុល្លារឯណោះ៕
ឥន្ទ្រីយ៍ទេព
0 Comments