ភ្នំពេញ ៖ អ្នកកាសែតអាស៊ានបានបន្តទៅទស្សនកិច្ចទៅកាន់មន្ទីរពេទ្យអន្តរជាតិKITAHARA និងនាយកដ្ឋានពន្លត់អគ្គិភ័យនៃប្រទេសជប៉ុនកាលពីថ្ងៃ១១ ខែកុម្ភៈ ឆ្នាំ២០១៥ ដែលជាថ្ងៃទី៤នៃការទស្សនកិច្ចនៅប្រទេសជប៉ុន។
ក្នុងឱកាសនោះ អ្នកកាសែតអាស៊ានទាំង២០នាក់បានស្វែងយល់ពីសេវាកម្មសុខភាពដែលមន្ទីរពេទ្យឯកជនKITAHARAផ្តល់ជូនប្រជាពលរដ្ឋទាំងជប៉ុនទាំងបរទេស។ មន្ទីរពេទ្យដែលមានជាង១០០គ្រែ និងបុគ្គលិកសរុបប្រមាណ៦០០នាក់នេះ ត្រូវបានបង្កើតឡើងកាលពីអំឡុងឆ្នាំ១៩៩៥ ដើម្បីជួយសង្គ្រោះអាយុជីវិតប្រជាជន ដែលផ្ដោតសំខាន់លើការវះកាត់ខួរក្បាល ប្រព័ន្ធឆ្អឹង និងប្រការសង្គ្រោះបន្ទាន់ ជាពិសេសគឺការធ្វើឲ្យប្រសើរឡើងវិញនូវកាយសម្បទា។
នាថ្ងៃនោះដែរ អ្នកកាសែតអាស៊ានបន្តដំណើរទៅកាន់មជ្ឈមណ្ឌលការសិក្សាដើម្បីជីវិតមានសុវត្ថិភាព IKEBUKURO របស់នាយកដ្ឋានពន្លត់អគ្គិភ័យនៃក្រុងតូក្យូ ដើម្បីស្វែងយល់ពីសកម្មភាពរបស់ការងាររបស់មជ្ឈមណ្ឌល។
មជ្ឈមណ្ឌលការសិក្សាដើម្បីជីវិតមានសុវត្ថិភាព IKEBUKURO គឺជាទីតាំងមួយដែលផ្តល់ឱកាសដល់ប្រជាពលរដ្ឋទូទៅទាំងបរទេសផងដែរបានយល់ពីការបញ្ចៀស និងការបង្ការ ក៏ដូចជាសកម្មភាពឆ្លើយតបទៅនឹងគ្រោះធម្មជាតិ (រញ្ជួយដី ទឹកជំនន់) និងវិធីសាស្ត្រនៃការពន្លត់អគ្គិភ័យ។
សូបជម្រាបថា អ្នកសារព័ត៌មានអាស៊ានទាំង២០នាក់ក៏បានសាកល្បងអនុវត្តជាក់ស្តែងនូវការឆ្លើយតបទៅនឹងការរញ្ជួយដី ការគេចចេញពីផ្សែងពេលមានអគ្គិភ័យ និងវិធីសាស្ត្រនៃការពន្លត់អគ្គិភ័យ។
អ្នកសារព័ត៌មានទាំងនោះនឹងបំពេញទស្សនកិច្ចក្នុងប្រទេសជប៉ុនចំនួន៩ថ្ងៃ ចាប់ពីថ្ងៃទី០៨ដល់១៦ ខែកុម្ភៈ ឆ្នាំ២០១៥។ តាមកម្មវិធី អ្នកសារព័ត៌មានទាំង២០នាក់នឹងធ្វើទស្សនកិច្ចក្នុងទីក្រុងតូក្យូ និងទីក្រុងមួយចំនួនទៀត ជួបពិភាក្សាជាមួយអ្នកជំនាញ និងចែករំលែកព័ត៌មានទាក់ទងនឹងសេដ្ឋកិច្ច សង្គម ទេសចរណ៍ និងវប្បធម៌ អំពីប្រទេសជប៉ុន ផ្សារភ្ជាប់ការស្រាវជ្រាវ និងការរាយការណ៍៕
ណយ គីមហុង
0 Comments