ភ្នំពេញ ៖ ថ្លែងក្នុងឱកាសបិទសន្និបាតបូកសរុបលទ្ធផលការងារប្រចាំឆ្នាំ២០១៤ និងទិសដៅការងារឆ្នាំ២០១៥ របស់ធនាគារជាតិនៃកម្ពុជាកាលពីរសៀលថ្ងៃទី១០ ខែកុម្ភៈ ឆ្នាំ២០១៥កន្លងមកនេះលោក ជា ចាន់តូ ទេសាភិបាលធនាគារជាតិនៃកម្ពុជាបានមានប្រសាសន៍ថាឆ្នាំ២០១៤កន្លងមកវិស័យធនាគារ និងហិរញ្ញវត្ថុ មានសុវត្ថិភាព និងមានភាពរឹងមាំ ហើយស្ថានភាពម៉ាក្រូសេដ្ឋកិច្ចមានស្ថិរភាព គាំទ្រដល់ការអភិវឌ្ឍន៍សេដ្ឋកិច្ច និងសង្គម ដោយសេដ្ឋកិច្ចជាតិមានអត្រាកំណើនជាមធ្យម៨ភាគរយ។
ការរីកចម្រើនទាំងអស់នេះគឺជាសមិទ្ធផលនិងជាមោទនភាពរួមដែលកើតចេញពីការខិតខំ ប្រឹងប្រែងរបស់មន្ត្រីបុគ្គលិកយើងទាំងអស់គ្នានៅទូទាំងប្រទេសរបស់ក្រុមប្រឹក្សាភិបាលធនាគារជាតិនៃកម្ពុជា និងកិច្ចសហប្រតិបត្តិការល្អពីក្រសួង.ស្ថាប័នរបស់រាជរដ្ឋាភិបាលផងដែរ។
លោកបានបន្តថា សមិទ្ធផលទាំងនេះពិតជាបានរួមចំណែកក្នុងការអភិវឌ្ឍប្រព័ន្ធធនាគារឲ្យប្រព្រឹត្តទៅប្រកបដោយសុវត្ថិភាព រក្សាបាននូវស្ថិរភាពថ្លៃ និងបានរួមចំណែកពង្រឹងស្ថិរភាពម៉ាក្រូសេដ្ឋកិច្ចឆ្ពោះទៅគាំទ្រកំណើនសេដ្ឋកិច្ចប្រកបដោយចីរភាពស្របតាមយុទ្ធសាស្ត្រចតុកោណដំណាក់កាលទី៣ និងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១១.២០២០របស់រាជរដ្ឋាភិបាល។ ការសម្រេចបាននូវគោលដៅនៃកំណើនស្របតាមគោលនយោបាយរបស់រាជរដ្ឋាភិបាល គឺទាមទារឲ្យមានការចូលរួមចំណែកពីអាជ្ញាធរពាក់ព័ន្ធក្នុងការបន្តពង្រឹងស្ថិរភាពម៉ាក្រូសេដ្ឋកិច្ច និងអនុវត្តគោលនយោបាយគាំទ្រមួយចំនួនទៀតដូចជាការធ្វើពិពិធកម្មមូលដ្ឋានសេដ្ឋកិច្ច ការបន្តអភិវឌ្ឍហេដ្ឋារចនាសម្ព័ន្ធរូបវន្ត ព្រមទាំងការគ្រប់គ្រង និងបែងចែកធនធានមនុស្សប្រកបដោយសមភាព និងប្រសិទ្ធភាពផងដែរ។
ក្រៅពីការរៀបរាប់សមិទ្ធផលដែលធនាគារសម្រេចបានលោក ជា ចាន់តូ បានឲ្យដឹងផងដែរពីការងារសហប្រតិបត្តិការអន្តរជាតិថា ការងារសហប្រតិបត្តិការអន្តរជាតិមានសារៈសំខាន់ណាស់សម្រាប់ធនាគារជាតិនៃកម្ពុជាក្នុងការពង្រឹងកិច្ចសហប្រតិបត្តិការមិត្តភាព និងផ្លាស់ប្ដូរបទពិសោធន៍ក្នុងការដឹកនាំគោលនយោបាយរូបិយវត្ថុ និងការពង្រឹងប្រតិបត្តិការធនាគារកណ្ដាល។ តាមរយៈកិច្ចសហប្រតិបត្តិការនេះ ធនាគារជាតិនៃកម្ពុជាបានពង្រឹងកិច្ចសហប្រតិបត្តិការជាមិត្តភាពជាមួយស្ថាប័នហិរញ្ញវត្ថុអន្តរជាតិដូចជា IMF , ADB, WB, និងធនាគារកណ្ដាលក្នុងតំបន់ និងពិភពលោក. លើកកម្ពស់កិត្យានុភាព និងតួនាទីធនាគារជាតិនៃកម្ពុជានៅក្នុងតំបន់ និងឆាកអន្តរជាតិ ជំរុញការធ្វើសមាហរណកម្មវិស័យធនាគារនៅកម្ពុជាចូលទៅក្នុងតំបន់ ពិភពលោក និងលើកកម្ពស់ការបណ្តុះបណ្តាលឯកទេសកម្មដល់មន្ត្រីជំនាញ និងផ្លាស់ប្ដូរយោបល់ពីការងារគ្រប់គ្រងធនាគារកណ្ដាល និងការដឹកនាំនយោបាយរូបិយវត្ថុឆ្ពោះទៅរួមចំណែកពង្រឹងស្ថិរភាពម៉ាក្រូសេដ្ឋកិច្ចជាតិ និងតំបន់។
លោកបានបន្តថា ដោយឡែកចំពោះការងារអាស៊ានវិញ កន្លងមកធនាគារជាតិនៃកម្ពុជាបានគាំទ្រ និងចូលរួមយ៉ាងសកម្មនៅក្នុងគំនិតផ្ដួចផ្ដើមនានារបស់អាស៊ាន សំដៅរួមចំណែកនៅក្នុងការបង្កើតសហគមន៍សេដ្ឋកិច្ចអាស៊ាននៅចុងឆ្នាំ២០១៥នេះ។ ទន្ទឹមនឹងអត្ថប្រយោជន៍ដែលកម្ពុជាអាចទទួលបានដូចជាការមានមូលដ្ឋានផលិតកម្មក្នុងទីផ្សារតែមួយ ការលើកកម្ពស់ការប្រកួតប្រជែង ការអភិវឌ្ឍសេដ្ឋកិច្ចដោយសមភាពមួយចំនួនផងដែរ។ ដូច្នេះដើម្បីរួមចំណែកសម្រេចបានគោលដៅរបស់សហគមន៍សេដ្ឋកិច្ចអាស៊ាន និងដោះស្រាយបញ្ហាប្រឈមទាំងនេះ "ខ្ញុំសូមស្នើឲ្យនាយកដ្ឋានពាក់ព័ន្ធនានា និងក្រុមការងារបច្ចេកទេសរបស់ធនាគារជាតិនៃកម្ពុជាទាំងអស់បន្តខិតខំប្រឹងប្រែងពង្រឹងសមត្ថភាពជាប់ជាប្រចាំ និងរៀនសូត្រពីបទពិសោធន៍ពីបណ្ដាប្រទេសជាមិត្តក្នុងការអភិវឌ្ឍវិស័យធនាគារនៅកម្ពុជាឲ្យកាន់តែរឹងមាំ និងមានភាពប្រកួតប្រជែងខ្ពស់"៕
វុទ្ធី
0 Comments