ភ្នំពេញ ៖ ទឹម សាន្ត អ្នកប្រដាល់មិនសូវដែលឈ្នះនៃក្លិបកុសលកីឡានឹងឡើងប្រកួតសងសឹក សរ រាជសីហ៍ អ្នកប្រដាល់ស្រករក្រោយនៃក្លិបមោងឫស្សីមរតកគុនខ្មែរខេត្តបាត់ដំបង នាល្ងាចថ្ងៃសុក្រ ទី១៣ ខែកុម្ភៈនេះ នៅលើសង្វៀនស្ទឹងមានជ័យ។
ទឹម សាន្ត ជាអ្នកប្រដាល់ចាស់វស្សាយូរហើយ ប៉ុន្តែមិនមានឈ្មោះល្បីនោះទេ ដោយសារតែគេទន់ជ្រាយពេក ហើយប្រកួតពុំសូវដែលឈ្នះនរណាទេ ដោយសារតែការវាយរបស់គេអត់មានផ្លែ ។ ដោយសារតែយ៉ាងនេះហើយទើប ទឹម សាន្ត មិនសូវបានឡើងប្រកួតញឹកញាប់ប៉ុន្មានទេ។ គេប្រកួតលើកចុងក្រោយ កាលពីថ្ងៃទី២៩ ខែវិច្ឆិកា ឆ្នាំ២០១៤ ដោយប្រកួតចាញ់ ផុន ផាន់ណា អ្នកប្រដាល់ក្លិបអប្សរាគុនខ្មែរនៅក្នុងទឹកទី៣។ តាំងពីនោះរហូតមកដល់ពេលនេះ គេទើបបានឡើងប្រកួតទៀតប៉ុណ្ណោះ។
សាន្ត ឥឡូវនេះវាយកាន់តែស្ពឹក និងយឺតជាងមុនទៅទៀត ដោយសារតែទម្ងន់របស់គេសព្វថ្ងៃកាន់តែធ្ងន់ចូលជិតដល់៧០គីឡូក្រាមទៅហើយនោះ។ រាជសីហ៍នេះជាអ្នកប្រដាល់ស្រករក្រោយទេ តែគេមានស្នៀតប្រដាល់ល្អថែមទាំង មានចិត្តប្រដាល់ធំទៀតផង។ អ្នកប្រដាល់ចំណូលថ្មីរូបនេះ វាយមិនដកដៃទេ គ្រាន់តែការវាយរបស់គេមិនមានផ្លែល្អប៉ុណ្ណោះ។
គេបានលេចមុខលើសង្វៀននៅភ្នំពេញប៉ុន្មានប្រកួតហើយ ដែលការប្រកួតពីរប្រកួតចុងក្រោយនេះ វាយឈ្នះ សូយ យក្សតឿ ជើងខ្លាំងក្លិបពោធិជ័យកីឡា ក្នុងទឹកទី៣ និង វាយឈ្នះ ពេជ្រ អារុណ ជើងចាស់ក្លិបសម្រែករាជសីហ៍បង្ក្រាបគ្រឿងញៀនក្នុងទឹកទី២។ ការដែលអាចវាយឈ្នះអ្នកប្រដាល់ជើងចាស់ទាំងពីរនេះពុំមែនជារឿងធម្មតានោះទេ គឺអាចចាត់ទុកថា សរ រាជសីហ៍ គេខ្លាំងហើយ។ តែយ៉ាងណាសម្រាប់ការប្រកួតសងសឹកជាមួយ សរ រាជសីហ៍លើកនេះ គេក៏មិនហ៊ានមើលស្រាល ទឹម សាន្តដែរ។ ដូច្នេះចាំមើល ទឹម សាន្ត អាចសងសឹក សរ រាជសីហ៍ បានសម្រេចឬអត់ ? ។ ចាន់ ឆាយម៉ៅ អ្នកប្រដាល់ក្លិបនិរោធមានជ័យ ក៏នឹងឡើងសងសឹក វី សេរីចាន់ឌីន អ្នកប្រដាល់ក្លិបខ្លារខិនមានរិទ្ធដែរ។ ពីរនាក់បានជួបគ្នាកាលពីថ្ងៃទី១៩ ខែតុលា ឆ្នាំ២០១៤កន្លងមក ដោយ ឆាយ ម៉ៅ ប្រកួតចាញ់ ចាន់ឌីន ដោយពិន្ទុ បន្ទាប់ពីវាយគ្នាប្រាំទឹកពេញនោះ។ តែយ៉ាងណា ចាន់ឌីននេះ ក៏ធ្លាប់វាយចាញ់ ឆាយ ម៉ៅ ក្នុងទឹកទី៥ម្តងមកហើយដែរ។
ឆាយ ម៉ៅ ពេលជួប ចាន់ឌីន គេវាយប្ដូរជង្គង់ ប្ដូរកណ្ដាប់ដៃ ទាត់ និងកែងគ្នាទៅវិញទៅមក គ្មានបន្ធូរដៃនោះទេ តែដោយសារ ចាន់ឌីនខ្ពស់ជាង ជង្គង់វែងជាង ធ្វើឲ្យ ចាន់ឌីនមានចាញ់ប្រៀបឈ្នះ។ ពួកគេវាយប្ដូរទៅវិញទៅមករហូតដល់ធ្លាក់ពីលើរេញមកក្រោមថែមទៀត។
ទោះជាយ៉ាងណាសម្រាប់ការជួបគ្នាលើកនេះ មិនដឹងថា ចាន់ ឆាយម៉ៅ គេអាចសងសឹក វី សេរីចាន់ឌីន បានសម្រេចឬអត់នោះឡើយ? សេរី ចាន់ឌីន ប្រកួតចុងក្រោយវាយឈ្នះ មាស ឆូយ អ្នកប្រដាល់ក្លិបសុភានូក្នុងទឹកទី៤ ខណៈដែលការប្រកួតចុងក្រោយរបស់ ចាន់ ឆាយម៉ៅ គឺចាញ់ចាន់ឌីននេះឯង។
ម៉ន រិទ្ធី អ្នកប្រដាល់ក្លិបការិយាល័យទី៥ កងទ័ពជើងគោកនឹងជួបប្រកួតជាមួយ ភួង ពិសិដ្ឋ អ្នកប្រដាល់ក្លិបកងពលតូចឆ័ត្រយោង៩១១ ខណៈដែល ម៉ូ ណារ៉ុង ក្លិបព្រៃទទឹងខេត្តបាត់ដំបងជួបជាមួយ ពេជ្រ សាម៉ុន ក្លិបកងពលតូចលេខ៧០៕
វិសិទ្ធ
0 Comments