គង់​ សំបូរ​-​អាំង​សំអាត ​និង​បាង​កា​យ៉ាក ត្រៀម​ជួប​ថៃ​នៅ​ថ្ងៃអាទិត្យ​នេះ​

ភ្នំពេញ ៖​ អ្នក​ប្រដាល់​កម្ពុជា​បី​រូប​ត្រៀម​ជួប​ប្រកួត​ជាមួយ​អ្នក​ប្រដាល់​ថៃ​នៅក្នុង​កម្មវិធី​ប្រដាល់​ពេល​ព្រឹក​Ganzberg Top Fighter លើ​សង្វៀន​SEA-TV ថ្ងៃទី​១៥ ខែកុម្ភៈ​ខាងមុខនេះ​។ ក្នុង​នោះ​អ្នក​ប្រដាល់​គង់ សំបូរ អ្នក​ប្រដាល់​ក្លិប​បូរី​រាជសីហ៍​មាន​រិ​ទ្ធ ត្រូវ​ជួប​ប្រកួត​ជាមួយ​អ្នក​ប្រដាល់​ថៃ​ឈ្មោះ​King Kong ។ ពួកគេ​ប្រកួត​គ្នា​ក្នុង​ប្រភេទ​ទម្ងន់​៦០​គីឡូក្រាម​។​

អ្នក​ប្រដាល់ គង់ សំបូរ ជា​លើក​ទី​៣​របស់​គេ​ហើយ​ដែល​ជួប​ប្រកួត​ជាមួយ​អ្នក​ប្រដាល់​ថៃ​នេះ មិន​ដឹង​ថា​យ៉ាងណា​នោះ​ទេ ព្រោះ​កាលពី​ឡើង​ប្រកួត​ជាមួយ​ថៃ​លើក​ទី​២​កន្លងមក សំបូរ​ វាយ​ចាញ់​ដោយ​ពិន្ទុ​។ តែ​យ៉ាងណា​បើ​តាម​លោក​ ញាណ សុធី អ្នកចាត់ចែង​កម្មវិធី​ប្រដាល់​SEA-TV​បាន​ឲ្យ​ដឹង​នោះ​ថា អ្នក​ប្រដាល់​ថៃ​King Kong មិនជា​ខ្លាំង​ប៉ុន្មាន​ទេ គ្រាន់តែ​គេ​មាន​ប្រវត្តិ​ប្រកួត​ច្រើនជាង​សំបូរ​ជាង​ដប់​ដង​ប៉ុណ្ណោះ​។ លោក​ថា អ្នក​ប្រដាល់​ថៃ​រូប​នេះ​ធ្លាប់​ប្រកួត​បាន​៥៤​លើក ឈ្នះ​៣៧​លើក ចាញ់​១៤​លើក និង​ស្មើ​៣​លើក បើ​ប្រៀប​ជាមួយ​សំបូរ​ដែល​ប្រកួត​បាន​២៨​លើក ឈ្នះ​២១​លើក ចាញ់​៥​លើក និង​ស្មើ​២​លើក​នោះ គឺ​ច្រើនជាង​ជិត​ពាក់កណ្ដាល​ឯណោះ​។

ចាំ​មើល អ្នក​ប្រដាល់ ​គង់ សំបូរ ប៉ះ​ជាមួយ​អ្នក​ប្រដាល់​ថៃ​ King Kong នេះ តើ​ជួប​សំណាងល្អ ឬមួយ​ជួប​សំណាងអាក្រក់​នោះ​? អាំង សំអាត អ្នក​ប្រដាល់​ក្លិប​តា​ព្រហ្ម​មានជ័យ ត្រូវ​ជួប​ជាមួយ​អ្នក​ប្រដាល់​ថៃ​ឈ្មោះ​ Phit Thong Chhai ដោយ​ប្រកួត​ក្នុង​ទម្ងន់​៥៤​គីឡូក្រាម​។ អ្នក​ប្រដាល់​ថៃ​រូប​នេះ ធ្លាប់​មក​ប្រកួត​នៅ​ស្រុក​ខ្មែរ​ម្តង​ហើយ ដែល​កាលណោះ​គេ​វាយ​ចាញ់​ពេជ្រ​ម្ទេសខ្មាំង​។​ នេះ​បើ​តាម​លោក​ ញាណ សុធី ឲ្យ​ដឹង​។​

Phit Thong Chhai អ្នក​ប្រដាល់​ថៃ​រូប​នេះ​មាន​កម្ពស់​ប្រហាក់ប្រហែល​នឹង​ សំអាត​ដែរ ហើយ​ប្រវត្តិ​ប្រកួត​របស់​គេ ក៏​ប្រហាក់​ប្រហែល​គ្នា​ដែរ​។ Phit Thong Chhai ប្រកួត​ចំនួន​៦២​ដង ដោយ​ឈ្នះ​៥២​ដង ចាញ់​៩​ដង និង​ស្មើ​១​ដង ខណៈ​ដែល ​អាំង សំអាត​អ្នក​ប្រដាល់​កម្ពុជា យើង​ប្រកួត​បាន​ចំនួន​៦៦​ដង ឈ្នះ​៥៥​ដង ចាញ់​១១ ដង មិនដែល​ស្មើ​។​

អាំង សំអាត ធ្លាប់​ប្រកួត​ជាមួយ​ថៃ​៤​នាក់​ហើយ​កន្លងមក ដោយ​វាយ​ឈ្នះ​ថៃ​ដោយ​ពិន្ទុ​៣​ដង​និង​ស្មើ​ម្តង​។ ការប្រកួត​ជាមួយ​ថៃ​លើក​ចុង​ក្រោយ​នេះ សំអាត ​វាយ​ឈ្នះ Sen Thanong ដោយ​ពិន្ទុ​។ ជា​អ្នក​ប្រដាល់​ដែល​មាន​កណ្ដាប់ដៃ​លឿន រហ័ស និង​ខ្លាំង​នោះ សំអាត​ វាយ​មិន​ញញើត​អ្នក​ប្រដាល់​ថៃ​នោះ​ឡើយ​។

លោក​ មាស សុខ​គ្រី គ្រូបង្វឹក​របស់​សំអាត​និយាយ​ឲ្យ​ដឹង​ថា សំអាត​ បាន​ត្រៀមខ្លួន​បាន​ល្អ​សម្រាប់​ជំនួប​ជាមួយ​ថៃ​នេះ​។ ចាំ​មើល តើ​អាំង សំអាត អាច​យកឈ្នះ Phit Thong Chhai បាន​ឬ​អត់ ? ចំណែក បាង កា​យ៉ាក អ្នក​ប្រដាល់​ក្លិប​ក្រសួងកសិកម្ម​គេ​នឹង​ជួប​ជាមួយ​អ្នក​ប្រដាល់​ថៃ​ឈ្មោះ​Phit Leng Chhai ក្នុង​ប្រភេទ​ទម្ងន់​៥៧​គីឡូក្រាម​។ អ្នក​ប្រដាល់​ថៃ​រូប​នេះ ត្រូវ​បាន​អ្នក​រៀបចំ​ការប្រកួត​អួ​ត​ថា​ល្អ​និង​ខ្លាំង​ដែរ​។ Phit Leng Chhai មាន​ប្រវត្តិ​ប្រកួត​ចំនួន​៥៥​ដង ឈ្នះ​៤២​ដង​ និង​ចាញ់​១០​ដង​មិនដែល​ស្មើ​។​

បាង កា​យ៉ាក ខាន​ឡើង​ប្រកួត​ជាមួយ​បរទេស​យូរហើយ ក្រោយពី​ផ្ដួល​អ្នក​ប្រដាល់​ថៃ​ឈ្មោះ Kom Bang ដោយ​ពិន្ទុ កាលពី​ថ្ងៃទី​២៩ ខែ​វិច្ឆិកា​ ឆ្នាំ​២០១៤​នោះ​។ អ្នក​ប្រដាល់​កម្ពុជា​រូប​នេះ​មាន​ប្រវត្តិ​ប្រកួត​ចំនួន​តែ​២៦​ដង​ប៉ុណ្ណោះ តែ​ឈ្នះ​ទាំង​២៦​ដង មិនដែល​ចាញ់​មិនដែល​ស្មើ​ឡើយ​។

Phit Leng Chhai ពុំដែល​មក​ប្រកួត​នៅ​ស្រុក​ខ្មែរ​ទេ​។ អ្នក​ប្រដាល់​ថៃ​រូប​នេះ ខ្លាំង​ជាង​ គូ​អាំង សំអាត និង​គង់ សំបូរ ទៅទៀត​។ ​ចាំ​មើល អ្នក​ប្រដាល់​ថៃ​ដែល​ល្បីឈ្មោះ​រូប​នេះ​អាច​វាយ​ឈ្នះ ​បាង កា​យ៉ាក បាន​ឬ​អត់​នៅក្នុង​ជំនួប​គ្នា​នេះ​៕

​វិ​សិទ្ធ

​