កំពង់ស្ពឺ ៖ រថយន្តដឹកទំនិញធន់យក្សមួយគ្រឿងបានបើកបុកប៉ារាស់ត្រួតពិនិត្យច្បាប់ចរាចរណ៍ផ្លូវគោក ខេត្តកំពង់ស្ពឺធ្វើឱ្យក្រុមនគរបាលរត់គេចទាំងតក់ស្លុតព្រលឹងចុងសក់ កិនសាជីបែកអស់ចំនួន២ និងមួយទៀតជាប់ក្រោមរថយន្តអូសជាច្រើនគីឡូម៉ែត្រ ទើបសមត្ថកិច្ចស្ទាក់ចាប់បាន ស្រាប់តែមានការអន្តរាគមន៍ពីថ្នាក់លើធំទៅកាន់លោកស្នងការខេត្ត គ្រាន់តែរឿងបន្តិចបន្តួចនេះបណ្ដាលឱ្យមានការរិះគន់យ៉ាងខ្លាំងពីសំណាក់ប្រជាពលរដ្ឋ។
ហេតុការណ៍រថយន្តធន់យក្សដឹកទំនិញសំពីងសំពោងរបស់អ្នកមានអំណាចបុកបារ៉ាស់ត្រួតពិនិត្យច្បាប់ចរាចរណ៍នេះ បានកើតមានឡើងនៅវេលាម៉ោង១៥និង២០នាទីរសៀល ថ្ងៃទី១០ ខែកុម្ភៈ ឆ្នាំ២០១៥ ស្ថិតលើផ្លូវជាតិលេខ៤ ត្រង់ចំណុចគោលដៅក្នុងសង្កាត់ច្បារមន ក្រុងច្បារមន រួចរត់គេចរហូតដល់មុខផ្សារចំបក់ ឃុំវល្លិស ស្រុកសំរោងទង ខេត្តកំពង់ស្ពឺ ទើបសមត្ថកិច្ចតាមស្ទាក់ចាប់បាន ប៉ុន្តែតៃកុងមិនព្រមចុះពីលើរថយន្តតាមការអញ្ជើញរបស់នគរបាលឡើយ។
ក្រុមនគរបាលដែលបានអនុវត្តច្បាប់ចរាចរណ៍ផ្លូវគោកបាននិយាយថា មុនពេលកើតហេតុមានរថយន្តមួយគ្រឿងម៉ាកហ៊ីណូ ក្បាលពណ៌ស ទ្រុងខ្មៅរបស់កងដឹកជញ្ជូនអក្សរM ឬ(M70) គ្មានស្លាកលេខ បើកបរតាមផ្លូវជាតិលេខ៤ ធ្វើដំណើរមកពីទិសខាងលិចទៅកើត ពេលធ្វើដំណើរមកដល់ក្រុងច្បារមន នគរបាលចរាចរណ៍បានបាញ់ល្បឿនឃើញថារថយន្តនោះ បើកបរលើកល្បឿនកំណត់។ ប្រភពបន្តថា ក្រោយពេលពិនិត្យឃើញថា រថយន្តនេះល្មើសច្បាប់ចរាចរណ៍ កម្លាំងឈរជើងគោលដៅបានស្ទាក់ដើម្បីធ្វើកិច្ចសន្យា និងផាកពិន័យតាមច្បាប់កំណត់ ប៉ុន្តែពេលឈប់បានប្រហែល១០នាទី ក៏បើករថយន្តចេញបុកបារ៉ាស់ (សាជី) របស់ប៉ូលិសធ្វើឲ្យក្រុមនគរបាលនាំគ្នារត់ស្លន់ស្លោគេចពីគ្រោះថ្នាក់ និងជាប់សាជីមួយក្រោមរថយន្តអូសប្រមាណ៣គីឡូម៉ែត្រ ទើបនគរបាលស្ទាក់ចាប់បាន ហើយអ្នកបើកបរមិនចុះពីលើរថយន្តទេ ថែមទាំងបិទទ្វារចាក់សោឈប់កណ្តាលផ្លូវជាតិ ទោះបីជាឱ្យអែបខាងក៏មិនព្រមដែរ ដោយតៃកុងបាននិយាយយ៉ាងឈ្លើយថា ចាំដោះស្រាយជាមួយមេគេចុះ។
មហាជនដែលចោមរោមមើលនិយាយរិះគន់ថា អាងខ្នងថៅកែមានអំណាចមិនគោរពច្បាប់ហើយគំរាមសមត្ថកិច្ចទៀត មិនតែប៉ុណ្ណោះអ្នកបើកមិននិយាយជាមួយសមត្ថឡើយឱ្យចាំជួបមេរបស់គេរហូត។
សូមបញ្ជាក់ថា បន្ទាប់ពីសមត្ថកិច្ចឃាត់អស់ប្រមាណជិត៣ម៉ោង ទើបឃើញរថយន្តស៊េរីទំនើបមួយគ្រឿងបានមកដល់ មានគ្នា២នាក់ ហើយនិយាយជាមួយនគរបាលចរាចរណ៍ថា គ្រាន់តែរឿងប៉ុណ្ណឹងៗសោះធ្វើឱ្យមានការភ្ញាក់ផ្អើលដល់ថ្នាក់លើដែរ។ បុរសរូបនោះបានបន្តថា តៃកុងឡានរបស់គាត់ មុនទៅណាមកណាបានប្រាប់វាអស់ហើយ បើមានបញ្ហាអីតាមផ្លូវ សមត្ថកិច្ចទាំងនោះទុកឱ្យគាត់ និងបានបញ្ជាតៃកុងឡានឱ្យបើកឡានចេញភ្លាមៗ រឿងជាមួយប៉ូលិសទុកគាត់ជាអ្នកដោះស្រាយ។ ក្រុមនគរបាលចរាចរណ៍បានត្រឹមតែហួសចិត្ត រថយន្តដឹងទំនិញសំពីងសំពោង និងបើកហួសល្បឿនច្បាប់កំណត់ ហើយមិនបានធ្វើការផាកពិន័យផង ត្រូវបាក់មុខទៀត ព្រោះមានអន្តរាគមន៍រហូតដល់ស្នងការនគរបាលខេត្ត គ្រាន់តែរឿងកំប៉ិកកំប៉ុកសោះ។ ជុំវិញបញ្ហាកើតមានឡើងខាងលើ មេការរថយន្តដឹងទំនិញឡូហ្គោអក្សរMបានចេញថ្លៃសងសាជីដែលត្រូវរថយន្តបុកដើម្បីបញ្ចប់រឿងហេតុ៕
រដ្ឋឋានៈ
0 Comments