បន្ទាយមានជ័យ ៖ ស្ត្រីជួញដូរគ្រឿងញៀនម្នាក់ត្រូវបានកម្លាំងនគរបាលក្រុងសិរីសោភ័ណចុះស៊ើបអង្កេត និងឈានដល់ការបង្ក្រាប ឃាត់ខ្លួនបាននៅនឹងកន្លែង ព្រមទាំងដកហូតបានវត្ថុតាងថ្នាំញៀនទូរស័ព្ទដៃ និងប្រដាប់ប្រដាជក់មួយចំនួនដើម្បីធ្វើការសាកសួរ។ ការចាប់បានជនសង្ស័យដែលកំពុងជួញដូរគ្រឿងញៀនយ៉ាងសកម្មនោះនៅវេលាម៉ោង៧ព្រឹក ថ្ងៃទី១៣ ខែកុម្ភៈ ឆ្នាំ២០១៥ នៅចំណុចភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ លោកវរសេនីយ៍ត្រី ស៊ីវសុជាតិ អធិការក្រុងសិរីសោភ័ណបានប្រាប់ឲ្យដឹងថា ជនសង្ស័យមានឈ្មោះ ចាន់ សុខា ភេទស្រី អាយុ២៩ឆ្នាំ រស់នៅភូមិសែសិនសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ លោកបានបន្តថា មុនពេលកើតហេតុ ដោយមានការចូលរួមពីប្រជាពលរដ្ឋ និងកម្លាំងស៊ើបអង្កេតរបស់នគរបាលក្រុងសិរីសោភ័ណផងនោះ ទើបនគរបាលក្រុងសិរីសោភ័ណ ដែលដឹកនាំដោយលោក ស៊ីវ សុជាតិ បានចុះពួនស្ទាក់ឈានដល់ការចាប់បានស្ត្រីម្នាក់ដែលមានឈ្មោះ ចាន់ សុខា និងដកហូតបានគ្រឿងញៀនប្រភេទមេតំហ្វេតាមីន ពណ៌ក្រហម ដែលមានអក្សរWY ចំនួន៥០គ្រាប់ និងទូរស័ព្ទចំនួន១គ្រឿងយកអធិការក្រុងសិរីសោភ័ណដើម្បីសាកសួរបន្ត។ នៅមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាចានជួញដូរ និងចែកចាយគ្រឿងញៀនបានចំនួន៤លើកមកហើយរយៈពេលកន្លងមក។ លោកបានបញ្ជាក់ទៀតថា ជនសង្ស័យ និងគ្រឿងញៀន ត្រូវបានកម្លាំងនគរបាលកសាងសំណុំរឿងបញ្ជូនទៅតុលាការដើម្បីដាក់ទោសទៅតាមផ្លូវច្បាប់៕
គង្គា
0 Comments