២.៥០០​នាក់​ចូលរួម​រត់ប្រណាំង​ស្ត្រី​ និង​កីឡា​

ទិវា​រត់ប្រណាំង​ស្ត្រី​ និង​កីឡា ក្រោម​ប្រធានបទ​«​រត់​ដើម្បី​ក្តី​ស្រឡាញ់​» ដែល​ផ្ដួចផ្ដើម​ឡើង​ដោយ​គណៈកម្មាធិការ​ជាតិ​អូឡាំពិក​កម្ពុជា គណៈកម្មការ​ស្ត្រី​ និង​កីឡា​ បាន​ចាប់ផ្តើម​នៅ​ព្រឹក​ព្រលឹម​ថ្ងៃទី​១៤ ខែ​កុម្ភៈ​ ឆ្នាំ​២០១៥ នៅ​មជ្ឈមណ្ឌល​សន្និបាត​ពិព័រណ៍​កោះ​ពេជ្រ​។​

លោក វ៉ា​ត់ ចំរើន អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា​បាន​ឲ្យ​ដឹង​ថា ក្នុង​ព្រឹត្តិការណ៍​នេះ​មាន​អត្តពលិក​ចូលរួម​ប្រមាណ​២.៥០០​នាក់ ដែល​ភាគច្រើន​ជា​យុវនារី​មកពី​គ្រប់​មជ្ឈដ្ឋាន​នានា​ក្នុង​រាជធានី​ភ្នំពេញ​។​

ចំពោះ​វិញ្ញាសា​ដាក់​ឲ្យ​ប្រកួត​រត់​ពេលនោះ មាន​រត់ប្រណាំង​លើ​ប្រភេទ​អាយុ​១៥​ឆ្នាំ អាយុ​១៦​ដល់​៣០​ឆ្នាំ អាយុ​៣១​ឆ្នាំ​ឡើង និង​ការ​រត់​ប្រណាំង​ជើង​បី​។ លោកស្រី ម៉ក់ វណ្ណ​ស៊ីថា ប្រធាន​គណៈ​កម្មការ​ស្រី​ និង​កីឡា ដែល​ជា​អ្នក​បាញ់​កាំភ្លើង​ចេញដំណើរ​ការប្រកួត​នោះ​បាន​មានប្រសាសន៍​ថា កាល​ដែល​គណៈកម្មការ​ស្រី​ និង​កីឡា​ជ្រើស​រើស​យក​ថ្ងៃទី​១៤ ខែកុម្ភៈ ដែល​អ្នកខ្លះ​ហៅថា​បុណ្យ​សង្សារ​ ឬ​ថ្ងៃបុណ្យ​នៃ​ក្តី​ស្រឡាញ់ (Valentine Day) សម្រាប់​ប្រារព្ធ​ទិវា​រត់ប្រណាំង​ស្ត្រី​ និង​កីឡា គឺ​«​រត់​ដើម្បី​ក្តី​ស្រឡាញ់​»​វិញ​នោះ ក្នុង​គោលបំណង​ចូលរួម​ពង្រឹងស្មារតី និង​កែតម្រូវ​នូវ​ការ​យល់​ច្រឡំ​របស់​ប្អូនៗ ក្មួយៗ ជា​យុវជន​មួយចំនួន​ដែល​គិតថា ថ្ងៃ​១៤​ ខែកុម្ភៈ គឺជា​ថ្ងៃ​ដែល​ត្រូវ​លះបង់​អ្វីៗ​ដល់​ដៃគូ​របស់​ខ្លួន ដើម្បី​បង្ហាញ​ពី​ចិត្ត​ស្មោះ​ភក្តី​នឹង​គ្នា ក្នុង​រយះ​ប៉ុន្មាន​ឆ្នាំ​កន្លង​មក​ចាប់តាំងពី​ពិធីបុណ្យ​នេះ​បាន​សាយភាយ​មកដល់​កម្ពុជា​នោះ​។​ លោកស្រី​បន្ត​ថា ទង្វើ​នេះ​បាន​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​វប្បធម៌ ប្រពៃណី ទំនៀមទម្លាប់​ដ៏​ល្អ​ផូរផង់​របស់​ប្រជា​ជាតិខ្មែរ​យើង​។

លោកស្រី​បាន​បញ្ជាក់​ទៀត​ថា គណៈកម្មការ​ស្រី​ និង​កីឡា មានបំណង​ចង់​ផ្សារភ្ជាប់​ថ្ងៃនេះ ទៅ​នឹង​កីឡា គឺ​យើង​លេង​កីឡា​ជាមួយគ្នា​លេង​ដោយ​ក្តី​ស្រឡាញ់ ដោយ​យុត្តិធម៌ ដោយ​ថ្លៃថ្នូរ ដោយ​បរិសុទ្ធ និង​ដោយ​រីករាយ​។ មួយទៀត ដើម្បី​ជំរុញ​លើកទឹកចិត្ត​ប្រជាពលរដ្ឋ​មិន​ថា​ចាស់​ ឬ​ក្មេង បុរស ​ឬ​ស្ត្រី​ឲ្យ​យល់​ពី​អត្ថប្រយោជន៍​នៃ​កីឡា និង​ចូលរួម​លេង​កីឡា​ឲ្យ​បាន​គ្រប់ៗ​គ្នា​។​ ហើយ​មួយទៀត​ដើម្បី​ឲ្យ​ស្ត្រី​យើង​យល់ថា កីឡា​គ្រប់​ប្រភេទ​មិនមែន​សម្រាប់​តែ​បុរស​ទេ​ដែល​អាច​លេង​បាន​ស្ត្រី​ក៏​អាច​លេង​បាន​ដូចគ្នា​ដែរ ហើយ​ស្ត្រី​អាច​ដណ្ដើម​យក​មេដាយ និង​ពានរង្វាន់​ជូន​ប្រទេស​ជាតិ​មិន​ចាញ់​បុរស​ឡើយ​។​

ចំពោះ​លទ្ធផល​ក្រោយ​ការ​រត់​ប្រណាំង​ចំណាត់ថ្នាក់​រត់​សម្រាប់​អាយុ​១៥​ឆ្នាំ​ចុះ ​បុរស​លេខ​១ កីឡាករ ​ឈឹម ចាន់​សុភា កម្ពុជា​Smart លេខ​២ ប៉ិល ពុទ្ធិ​រិ​ទ្ធ សហព័ន្ធ​ចំបាប់ លេខ​៣ ឯក ចាន់ ប្រុស​ពៅ មកពី​ស្ទឹងមានជ័យ​។ សម្រាប់​អាយុ​ក្រោម​១៥​ឆ្នាំ​នារី លេខ​១​កីឡាការិនី​ឈុត សេរី​វី​រី​យ៉ា មកពី​សាលា East West លេខ​២​ នាក់ សូលី​តា​ មក​ពី​សាលា​សន្ធរម៉ុក និង​លេខ​៣ យ៉ាំ ឃី​ត​ធី​មកពី​សាលា​ច្បាប់​។ អាយុ​១៦​ឆ្នាំទៅ​៣០​ឆ្នាំ បុរស​លេខ​១ គង់ វិសិដ្ឋ លេខ​២ សួស វ៉ាន់​ធី និង​លេខ​៣ ជា សម្ផស្ស ដែល​ពួកគេ​មកពី​អង្គការ​ដើម្បី​ភាព​ញញឹម​នៃ​កុមារ​ជាមួយគ្នា​។ ចំពោះ​នារី​វិញ​លេខ​១ Sanne Sight លេខ​២ Malaya Camon និង​លេខ​៣ ម៉ៅ ស្រី​ណាក់​។​

ប្រភេទ​អាយុ​៣១​ឆ្នាំ​ឡើង​សម្រាប់​នារី​លេខ​១ គង់ សុ​ភី​ធិ​តា លេខ​២ សុស ផ្សា និង​លេខ​៣ យូ ចរិយា​។​ ចំពោះ​បុរស​លេខ​១ កីឡាករ​ទុ​ត កុសល មកពី​សាលា​ពេទ្យ លេខ យូ ច​ន្ធី មកពី Crown Caffe លេខ​៣ គឹម សារឿន​មកពី Western​។​

វិញ្ញាសា​រត់​ជើង​៣ ជា​គូ​លេខ​១ ជា យិន​នាង និង ឆាំ ពិ​ស៊ីន មកពី​សហព័ន្ធ​ចំបាប់ លេខ​២ គិ​ន ច័ន្ទ​តុលា និង ធូ បូរ​មី មកពី​ក្រុមហ៊ុន Smart និង​ចំណាត់ថ្នាក់​លេខ​៣ ឡៃ សុវណ្ណ និង ម៉ៅ វី​រះ​។​

ជាមួយនឹង​រង្វាន់​សម្រាប់​អត្តពលិក លោកស្រី ​ម៉ក់ វណ្ណ​ស៊ីថា ប្រធាន​គណៈកម្មការ​ស្រី្ត​ និង​កីឡា នៅ​បាន​ឧបត្ថម្ភ​ថវិកា​មួយចំនួន​ដល់​អតីត​កីឡាការិនី​ចាស់ៗ​ផង​ដែរ​។​

លោក ​វ៉ា​ត់ ចំរើន អគ្គលេខាធិការ​គណៈកម្មាធិការ​ជាតិ​អូឡាំពិក​បាន​អះអាង​ថា ទិវា​រត់​ប្រណាំង​ស្រី្ត​ និង​កីឡា គឺ​រត់​ដើម្បី​ក្តី​ស្រឡាញ់​នេះ​នឹង​ក្លាយជា​ព្រឹត្តិការណ៍​ប្រចាំឆ្នាំ​ដើម្បី​ឲ្យ​យុវជន យុវនារី​កែប្រែ​ទម្លាប់​យក​ថ្ងៃ​១៤ ខែ​កុម្ភៈ​គិត​រឿង​ផ្ដេសផ្ដាស​មក​ជា​ការ​រត់​កំសាន្ត​សប្បាយ​វិញ​៕

​វិ​សិទ្ធ

​

​