ភ្នំពេញ ៖ អ្នកប្រដាល់ជើងខ្លាំងស្រករក្រោយ អ៊ុំ ចំរើន ក្លិបតាឡីដំរីមានរិទ្ធនឹងឡើងប្រកួតសងសឹកអ្នកប្រដាល់ រឿម វណ្ណះ ក្លិបកីឡាកងយោធពលខេមរភូមិន្ទនាល្ងាចថ្ងៃអាទិត្យ ទី១៤ ខែកុម្ភៈ ឆ្នាំ២០១៥ នៅលើសង្វៀនTV3។
អ៊ុំ ចំរើន ធ្លាប់វាយចាញ់ រឿម វណ្ណះ ចំនួន៣លើកហើយកាលពីពេលកន្លងមក ដែលជួបលើកទី១កាលពីថ្ងៃទី២១ ខែកញ្ញា ឆ្នាំ២០១២ គេចាញ់ វណ្ណះ ក្នុងទឹកទី៣ ហើយជួបលើកទី២ថ្ងៃទី២៦ ខែឧសភា ឆ្នាំ២០១៣ គេចាញ់ក្នុងទឹកទី១ និងជួបលើកទី៣នាថ្ងៃទី០៧ ខែមិថុនា ឆ្នាំ២០១៤ គេវាយចាញ់ក្នុងទឹកទី២ដែលធ្វើឲ្យគេមិនអស់ចិត្តហើយសុំប្រកួតទូទាត់បំណុលជាមួយ វណ្ណះ ម្តងនេះទៀត ។ សម្រាប់ការប្រកួតសងសឹករបស់ អ៊ុំ ចំរើនលើកទី៣នេះ ពុំដឹងថាគេអាចសម្រេចបំណងបានឬអត់នោះទេ? តែយ៉ាងណា អ៊ុំ ចំរើន សព្វថ្ងៃនេះពុំមែនដូចជា ចំរើន កាលពីពេលមុននោះឡើយ។ ការប្រកួតចុងក្រោយនេះ ចំរើន បានវាយជាមួយថៃ ដោយចាញ់ត្រឹមពិន្ទុប្រផិតប្រផើយប៉ុណ្ណោះ។ ដូច្នេះ អ៊ុំ ចំរើន គេខ្លាំងជាងមុន។ រឿម វណ្ណះ គេជាអ្នកប្រដាល់មិនធម្មតាឡើយ។ គេមានស្នៀតប្រដាល់កាចៗណាស់ ហើយថែមទាំងវាយមិនចេះខ្លាចគូប្រកួតទៀតផង។ ទោះជាឈ្នះឬចាញ់គូប្រកួត វណ្ណះ មិនគិតទេគឺដឹងតែវាយសម្រុកជានិច្ច។ ចំណុចពិសេសរបស់ រឿម វណ្ណះ គឺស្នៀតទាត់និងកែង។ ប៉ុន្តែសម្រាប់ឥឡូវ រឿម វណ្ណះ រាងចុះខ្សោយបន្តិចហើយ។ ការប្រកួតចុងក្រោយនេះ គេវាយចាញ់ ធី តុងហ៊ី អ្នកប្រដាល់ក្លិបសាលវ័នកីឡាដោយពិន្ទុ កាលពីថ្ងៃទី២៤ ខែមករាកន្លងមកនេះ។ អ៊ុំ ចំរើន ជាអ្នកប្រដាល់ជើងខ្លាំងស្រករក្រោយ។ អ្នកប្រដាល់រូបនេះ ឲ្យតែគេដាក់ចិត្តថាប្រកួត គឺវាយគ្មានប្រណីដៃដែរ។ ចំរើន មានទម្លាប់មួយគឺចង់ផ្ដួលដៃគូប្រកួតឲ្យសន្លប់ភ្លាមៗតែម្តង ពោលគឺក្នុងបីទឹកដំបូង ចំរើន វាយសម្រុកមិនសំចៃដៃទេ ធ្វើយ៉ាងណាផ្ដួលដៃគូភ្លាមៗ តែបើក្នុងបីទឹកនេះបំបាក់គេមិនបាននោះ គឺច្បាស់ជាចាញ់គេវិញមិនខាន ព្រោះទឹកចុងក្រោយគេអស់កម្លាំងស៊ុហ្វ។
រឿម វណ្ណះ ក៏មានទម្លាប់ដូចគ្នាជាមួយចំរើននេះដែរ គឺប្រកួតច្រើនចូលប្ដូរកណ្ដាប់ដៃ កែង ទាត់ និងចូលចាប់វ៉ៃជង្គង់ ហើយបើវាយពីរឬបីទឹកដំបូង ផ្ដួលគូប្រកួតមិនបានទេនោះ រឿម វណ្ណះ ច្បាស់ជាចាញ់គេវិញដែរ។
ទោះបីជាយ៉ាងណា សម្រាប់ការជួបគ្នារវាង អ៊ុំ ចំរើន និង រឿម វណ្ណះ នេះ ពុំមាននរណាហ៊ានទាយមុនថា អ្នកណាឈ្នះ អ្នកណាចាញ់នោះឡើយ ព្រោះអ្នកប្រដាល់ពីរនាក់នេះមានផ្លែល្អប្រហាក់ប្រហែលគ្នា។ ដូច្នេះរឿងឈ្នះចាញ់ គឺអាស្រ័យលើកម្លាំងស៊ុហ្វរបស់ពួកគេធានាបានឬមិនបានប្រាំទឹកនោះ។
ជ័យ វណ្ណះ អ្នកប្រដាល់ក្លិបឃ្លាំងមឿងកីឡានឹងជួបប្រកួតជាមួយរឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១។ ពីរនាក់នេះ មានស្នៀតប្រដាល់ប្រដំប្រសងគ្នា គ្រាន់តែខុសគ្នារឿងកម្លាំងស៊ុហ្វតែប៉ុណ្ណោះ។ ដូច្នេះ ក្នុងការជួបគ្នានេះ ការឈ្នះចាញ់របស់ពួកគេទាំងពីរ គឺកំណត់ត្រង់ស៊ុហ្វនរណាខ្លាំងអ្នកហ្នឹងឈ្នះហើយ។
ការប្រកួតចុងក្រោយ ជ័យ វណ្ណះ វាយឈ្នះ ស៊ឹម ប៊ុនឆៃ អ្នកប្រដាល់ក្លិបព្រៃទទឹងខេត្តបាត់ដំបងដោយពិន្ទុ ឯ រឿង សារ័ត្ន ប្រកួតចុងក្រោយនេះ វាយចាញ់ ហ៊ែល វ៉ា ដោយពិន្ទុ។ អ៊ុង ស៊ីណា អ្នកប្រដាល់ក្លិបសុភានូមានជ័យ ត្រូវជួបប្រកួតជាមួយ សេង កំសត់ អ្នកប្រដាល់ក្លិបគីសែមានរិទ្ធ។ ពីរនាក់នេះ ធ្លាប់ជួបគ្នា២ដងហើយកាលពីចុងឆ្នាំ២០១២ ដោយ សេង កំសត់ ចាញ់ ស៊ីណាទាំងពីរដង។ សេង កំសត់ ទើបតែវាយឈ្នះ ឡុង ប៊ុនយីម អ្នកប្រដាល់ក្លិបសាលវ័នកីឡាដោយពិន្ទុ កាលពីថ្ងៃទី០១ ខែកុម្ភៈកន្លងមកនេះ។ ទោះជាយ៉ាងណា កំសត់គេល្អនិងវាយមានផ្លែទៀតផង។
អ៊ុង ស៊ីណា មានចិត្តប្រដាល់ធំមិនសូវខ្លាចទេ ម្ល៉ោះហើយការប្រកួតរបស់គេភាគច្រើនទទួលបានលទ្ធផលល្អ។ ប្រកួតចុងក្រោយ ស៊ីណា វាយឈ្នះ ឌីម សារិទ្ធ ក្លិបមជ្ឈមណ្ឌលកីឡាខ.ភ.មដោយពិន្ទុ។ ចាំមើល អ៊ុង ស៊ីណា គេអាចយកឈ្នះ សេង កំសត់ បានទៀតដែរឬអត់លើកនេះ?
ផាន់ ផាត់យុទ្ធ អ្នកប្រដាល់ក្លិបសាលវ័នកីឡានឹងប្រកួតជាមួយ ថន រ៉ាឌី(រាជសីហ៍ ចាន់ឌី) អ្នកប្រដាល់ក្លិបតាព្រហ្មមានជ័យ។ គូនេះ មិនដែលជួបគ្នាទេពីមុនមក ប៉ុន្តែសម្រាប់ការប្រកួតនេះ គេមិនមានជំនឿថា ផាត់ យុទ្ធ ឈ្នះ រ៉ាឌី នោះឡើយ ?
ភិន សុធី អ្នកប្រដាល់ក្លិបខ្លារខិនមានរិទ្ធនឹងជួបប្រកួតជាមួយ ខឿន ឡាក់គី អ្នកប្រដាល់ក្លិបកងពលតូចទ័ពឆ័ត្រយោង៩១១។ ពួកគេទាំងពីរជាអ្នកប្រដាល់ចំណូលថ្មីដូចគ្នា៕
0 Comments