ភ្នំពេញ ៖ ព្រឹត្តិការណ៍ប្រកួតប្រដាល់ដណ្ដើមខ្សែក្រវាត់ K-Cement ទម្ងន់៦០គីឡូក្រាម លើសង្វៀនSEA-TV នឹងចាប់ផ្តើមពីថ្ងៃទី១៤ ខែកុម្ភៈ ឆ្នាំ២០១៥នេះទៅហើយ។ នេះជាការបើកសង្វៀនថ្មីរៀងរាល់ល្ងាចថ្ងៃសៅរ៍របស់SEA-TV។
ថ្លែងក្នុងសន្និសីទកាសែតនាថ្ងៃទី០៩ ខែកុម្ភៈ លោក គិត គឹមអ៊ន តំណាង K-Cemant បញ្ជាក់ថា កន្លងមកខេស៊ីមេនធ្លាប់បង្កើតព្រឹត្តិការណ៍កំពូលអ្នកប្រដាល់ជើងឯកខេស៊ីមេននេះម្តងរួចមកហើយ ដោយទទួលបានការគាំទ្រយ៉ាងខ្លាំងពីសំណាក់ទស្សនិកជន ហើយការបង្កើតព្រឹត្តិការណ៍ថ្មីលើកនេះ ក៏ដោយសារចង់ចែករំលែកដល់អ្នកស្នេហា និងគាំទ្រកីឡាប្រដាល់នូវឱកាសក្នុងការទស្សនាការប្រកួត ដែលពីមុនប្រកួតតែមួយម៉ោងប៉ុណ្ណោះ ប៉ុន្តែលើកនេះគឺបន្ថែមការប្រកួតដល់២ម៉ោង ហើយរង្វាន់ជើងឯកក៏ធំជាងមុនដែរគឺ៥.០០០ដុល្លារ។
សម្រាប់ការប្រកួតកំពូលជើងឯកខេស៊ីមេនទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន៨រូបចូលរួមប្រកួត។ អ្នកប្រដាល់ទាំង៨នាក់នោះរួមមាន មាស ច័ន្ទមាន សមាគមកីឡាប្រដាល់ក្រសួងការពារជាតិ ,ឃីម បូរ៉ា ក្លិបរស្មីភូមិគាបខេត្តបន្ទាយមានជ័យ , ជ័យ ប៊ុនសង់ ក្លិបគីសែមានរិទ្ធ , លាស់ យីន ក្លិបសម្រែករាជសីហ៍បង្ក្រាបគ្រឿងញៀន , ថុល មករា ក្លិបឃ្លាំងមឿងកីឡាខេត្តពោធិ៍សាត់ , សូត្រ ប៊ុនធី ក្លឹបបក្សីស្លាបដែក , ឪម សំរេច ក្លិបកងពលតូចឆ័ត្រយោង៩១១ និង ណាម ម៉ូរ៉ាក់ ក្លិបពន្លឺសាមគ្គីខេត្តបាត់ដំបង។
ការប្រកួតតាមរូបមន្តវិលជុំជម្រុះដោយគិតពិន្ទុ ដែលមានបីជុំ។ ជុំទី១-អ្នកប្រដាល់ទាំង៨នាក់ ត្រូវប្រកួតវិលជុំដោយជម្រុះចោល២នាក់ ដោយក្នុងជុំទី១នេះ តម្លៃខ្លួនក្នុងអ្នកឈ្នះបាន៦០ម៉ឺនរៀល អ្នកចាញ់៤០ម៉ឺនរៀល។ ជុំទី២-អ្នកប្រដាល់ដែលនៅសល់៦នាក់នោះ ត្រូវប្រកួតវិលជុំជម្រុះដោយគិតពិន្ទុដដែល ដោយជម្រុះចោល២នាក់ទៀត ហើយតម្លៃខ្លួនក្នុងជុំទី២នេះក៏ដូចជាជុំទី១ដែរ។ ចំពោះជុំទី៣-អ្នកប្រដាល់សល់៤នាក់នោះ ក៏ត្រូវប្រកួតវិលជុំជម្រុះដោយគិតពិន្ទុដែរ ដោយជម្រុះចោល២នាក់បន្ថែមទៀត ទុក២នាក់សម្រាប់បន្តការប្រកួតនៅក្នុងវគ្គផ្តាច់ព្រ័ត្រដណ្ដើមចំណាត់ថ្នាក់លេខ១។ ក្នុងការប្រកួតជុំទី៣នេះ តម្លៃខ្លួនកីឡាករក៏ដូចជុំទី១និងជុំទី២ដែរ គឺឈ្នះ៦០ម៉ឺនរៀលចាញ់៤០ម៉ឺនរៀល។
លោក ហេង សុធា នាយកទីផ្សារនិងទំនាក់ទំនងសាធារណៈSEA-TV បានចាត់ទុកថា នេះជាព្រឹត្តិការណ៍ដ៏ធំមួយដែលបង្កឲ្យអ្នកប្រដាល់ទាំង៨រូបនេះ ត្រូវប្រជែងគ្នាយករង្វាន់ដែលអាចជួយកែប្រែជីវភាពបាន។ ការប្រកួតនេះ អ្នកដែលដណ្ដើមបានតំណែងជើងឯកម្ចាស់ខ្សែក្រវាត់ខេស៊ីមេន ទម្ងន់៦០គីឡូក្រាមនោះនឹងទទួលបានប្រាក់រង្វាន់ធំគឺ២០លានរៀល ដែលស្មើនឹង៥.០០០ដុល្លារអាមេរិក និងលេខ២ បាន១០លានរៀលស្មើនឹង២.៥០០ដុល្លារអាមេរិក។
លោកឧត្តមសេនីយ៍ឯក តែម ម៉ឺនប្រធានសហព័ន្ធកីឡាប្រដាល់កម្ពុជា បានក្រើនរំលឹកដល់គណៈកម្មការបច្ចេកទេស អាជ្ញាកណ្ដាល ចៅក្រម ត្រូវតែកាត់ក្តីឲ្យបានត្រឹមត្រូវ សុក្រឹត យុត្តិធម៌។ហើយលោកក៏បានប្រកាសនឹងដាក់ទណ្ឌកម្មដល់អ្នកប្រដាល់ ដែលប្រកួតដណ្ដើមខ្សែក្រវាត់ឲ្យធ្ងន់ជាងការប្រកួតធម្មតាផងដែរ ព្រោះនេះជាការប្រកួតក្នុងលក្ខណៈពិសេសបំផុត។
ជាមួយនឹងប្រាក់រង្វាន់ដ៏ធំនេះ លោក ម៉ិល កាដូ អគ្គនាយករងកីឡាតំណាងក្រសួងអប់រំបានផ្តាំផ្ញើដល់កីឡាករ ត្រូវតែធ្វើខ្លួនឲ្យបានល្អ គោរពឲ្យបានដាច់ខាតនូវវិន័យ សីលធម៌ ពិសេសត្រូវរក្សាទម្ងន់របស់ខ្លួន៦០គីឡូក្រាមឲ្យបានល្អ។
គួរបញ្ជាក់ថា ការប្រកួតនៅថ្ងៃសៅរ៍ ទី១៤ ខែកុម្ភៈនេះ អ្នកប្រដាល់ទាំង៨រូបនឹងឡើងប្រកួតទាំងអស់គ្នា ដែលមាន៤គូ គឺ ឪម សំរេច ជួបប្រកួតជាមួយ ណាម ម៉ូរ៉ាក់ , ថុល មករា ជួប មាស ច័ន្ទមាន , ជ័យ ប៊ុនសង់ ជួប ឃីម បូរ៉ា ហើយ សូត្រ ប៊ុនធី ជួប លាស់ យីន៕
វិសិទ្ធ
0 Comments