ភ្នំពេញ ៖ លោក ឃ្លាំងហួត អភិបាលខណ្ឌជ្រោយចង្វា រួមជាមួយនឹងមន្ត្រីសាលាខណ្ឌជ្រោយចង្វាបានជួបសំណេះសំណាលជាមួយប្រជាពលរដ្ឋ ដែលមានដីធ្លីចម្ងាយ១០០ម៉ែត្រពីអ័ក្សផ្លូវជាតិលេខ៦ ស្ថិតនៅក្នុងសង្កាត់ចំនួន៣ ពោលគឺសង្កាត់ជ្រោយចង្វា សង្កាត់ព្រែកតាសេក និងសង្កាត់ព្រែកលៀប ដែលមានប្រជាពលរដ្ឋម្ចាស់ដីពាក់ព័ន្ធចំនួនជាង១០០គ្រួសារ និងពាក់ព័ន្ធក្នុងតំបន់អភិវឌ្ឍន៍ជ្រោយចង្វាដទៃទៀត ដើម្បីពិភាក្សាគ្នាពន្លឿនក្នុងការដោះស្រាយ និងការកសាងផ្លូវបេតុងមួយខ្សែ ស្របនឹងផ្លូវជាតិលេខ៦ចម្ងាយ១០០ម៉ែត្រពីអ័ក្សផ្លូវជាតិលេខ៦ ហើយអាជ្ញាធរសន្យាថានឹងធ្វើប្លង់កម្មសិទ្ធិជូនពួកគាត់ដោយមិនឱ្យព្រួយឡើយ។
ដោយការជួបគ្នានោះ ពួកគាត់បានជំរុញឱ្យអាជ្ញាធរជួយពន្លឿនក្នុងការរកដំណោះស្រាយផ្លូវកណ្ដាលណាមួយដែលអាចទទួលយកបានទាំងសងខាង ដោយមិនមានខាងណាមានប្រៀបជាងខាងណាឡើយ។
ការជួបគ្នារវាងអាជ្ញាធរនិងប្រជាពលរដ្ឋធ្វើឡើងនាព្រឹកថ្ងៃទី៩ ខែវិច្ឆិកា ឆ្នាំ២០១៥ នៅសាលប្រជុំសាលាខណ្ឌជ្រោយចង្វា ដែលមានប្រជាពលរដ្ឋចូលរួមប្រមាណជាង២០នាក់តំណាងឱ្យប្រជាពលរដ្ឋជាង១០០គ្រួសារ ដោយសំណូមពរនូវលក្ខខណ្ឌចំនួន៦ចំណុច បើមិនដូច្នេះទេពួកគាត់នឹងរារាំងរាល់សកម្មភាពរបស់ក្រុមហ៊ុន។
មានប្រសាសន៍សំណេះសំណាលនាឱកាសនេះ លោក ឃ្លាំង ហួត បានលើកឡើងអំពីការអភិវឌ្ឍន៍របស់រាជរដ្ឋាភិបាលដែលដឹកនាំដោយសម្ដេចតេជោហ៊ុន សែន និងការចរចាគ្នារវាងអាជ្ញាធរជាមួយក្រុមហ៊ុននិងប្រជាពលរដ្ឋ ដោយលោកឡើងថាការអភិវឌ្ឍនេះលោកប្រើពាក្យថាយកក្រុងចិញ្ចឹមក្រុង។ ការជួបគ្នានេះគឺលោកក៏បានលើកឡើងពីការធ្វើផ្លូវមួយខ្សែដែលស្របនឹងផ្លូវជាតិលេខ៦ ចម្ងាយ១០០ម៉ែត្រពីអ័ក្សផ្លូវជាតិលេខ៦ មានទទឹងទំហំ១២ទៅ១៥ម៉ែត្រ ចាប់ពីគល់ស្ពានជ្រោយចង្វាទៅដល់ផ្លូវបេតុង សម្ដេច ជា ស៊ីម នឹងដាក់ប្រព័ន្ធលូដើម្បីរំដោះទឹក។ លោកបន្តថា ការធ្វើផ្លូវនិងលូថ្មីនេះ មិនមានការវិភាគទានឬរៃអង្គាសពីបងប្អូនប្រជាពលរដ្ឋនោះទេ ពោលគឺខាងក្រុមហ៊ុនជាអ្នករ៉ាប់រងទាំងអស់។
លោកបានបន្តទៀតថា តើការធ្វើផ្លូវនេះដើម្បីប្រយោជន៍អ្នកណា គឺយើងចំណេញទាំងអស់គ្នារវាងក្រុមហ៊ុននិងប្រជាពលរដ្ឋដែលមានការអភិវឌ្ឍរួមគ្នា ចំណែកលោកគឺបានមកវិញនូវការស្រលាញ់ជឿជាក់ពីប្រជាពលរដ្ឋ ព្រោះលោកនៅក្មេងនឹងអាចឈរឈ្មោះឱ្យប្រជាពលរដ្ឋបោះឆ្នោតទៅអនាគត ជាពិសេសលោកចង់សំដែងឱ្យប្រជាពលរដ្ឋដឹងនូវទង្វើល្អរបស់អាជ្ញាធរ។ ដោយលោកមានគំនិតអភិវឌ្ឍន៍អាណិតស្រលាញ់ជាមួយប្រជាជន ដូច្នេះសូមបងប្អូនធ្វើការយោគយល់ តែលោកនៅតែប្រកាន់ជំហរធ្វើផ្លូវនេះដើម្បីប្រយោជន៍រួម។
លោកបានមានប្រសាសន៍ទៀតថា ចំណែកដីរបស់បងប្អូនដែលសល់ពី១០០ម៉ែត្រ ពាក់ព័ន្ធជាមួយគម្រោងអភិវឌ្ឍក្រុមហ៊ុន OCIC យើងមិនទាន់មានកម្មសិទ្ធិទេ ហើយអ្នកណាក៏ចង់បានកម្មសិទ្ធិដែរ ដូច្នេះតំបន់នេះបើមានកម្មសិទ្ធិនឹងឡើងថ្លៃ ហើយលក់បានថ្លៃទៀត ខណៈធ្វើផ្លូវរួចអាចមួយម៉ែត្រការេរាប់ពាន់ដុល្លារ។
ជាមួយគ្នានោះ លោកអភិបាលខណ្ឌក៏បានសន្យាថាធ្វើការចរចាសម្របសម្រួលរកផ្លូវកណ្ដាលមួយចំណេញទាំងសងខាង ដោយមិនឱ្យមានទំនាស់ ឬការប្រើអំពើហិង្សាជាដាច់ខាត និងត្រូវប្រើរយៈពេលយូរ ដោយលោកសុំឱ្យជំនាញធ្វើការវាស់វែង សាកល្បងមើល ថាតើមានផលប៉ះពាល់ប៉ុណ្ណា។
នាឱកាសនោះដែរ បងប្អូនប្រជាពលរដ្ឋបានយល់ព្រមឱ្យមានការវាស់វែង តែមិនទាន់យល់ព្រមថាត្រូវអនុញ្ញាតឱ្យធ្វើផ្លូវនោះទេ គឺយើងចរចាគ្នាសិន ប៉ុន្តែពួកគាត់បានសុំឱ្យអាជ្ញាធរពន្លឿនក្នុងការធ្វើប្លង់កម្មសិទ្ធិឱ្យបានឆាប់ ព្រោះពួកគាត់តិចឮចេះឮចុះមានអារម្មណ៍មិនស្ងប់ឡើយ ហើយពួកគាត់សុំឱ្យលោកឃ្លាំងហួតនៅជាមួយប្រជាជនមិនត្រូវបោះបង់ពួកគាត់ឡើយ ព្រោះពួកគាត់នៅជិតអាជ្ញាធរខណ្ឌជាងគេ។
លោកបានបញ្ជាក់ថា ប្រជាពលរដ្ឋខ្លះបានមកទិញដីនេះក្រោយការបង្កកមិនឱ្យលក់ដូរតាំងពីឆ្នាំ១៩៩៤ ពោលគឺប្រជាពលរដ្ឋបានទិញក្រោយឆ្នាំ១៩៩៤ ដូច្នេះការដោះស្រាយគឺមានលក្ខណៈខុសគ្នា ហើយបានជំរុញឱ្យបងប្អូនប្រជាពលរដ្ឋជួបគ្នាដោះស្រាយរវាងសាលារាជធានីភ្នំពេញ និងក្រុមហ៊ុន ដើម្បីបញ្ចប់ ដោយការយល់យោគទន់ភ្លន់ជាមួយគ្នាយល់ចិត្តគ្នា។ លោកបានបន្តថា មកដល់ពេលនេះ ក្រុមហ៊ុនបានដោះស្រាយរួចរាល់ជូនប្រជាជនបាន៥០ភាគរយ ហើយដោយប្រើយុទ្ធសាស្ត្រចាប់ក្រុមហ៊ុន និងប្រជាពលរដ្ឋឱ្យជួបគ្នាដោះស្រាយដោយសន្តិវិធីឈរលើជំហរឈ្នះឈ្នះទាំងអស់គ្នា៕
ឌីរៀ
0 Comments