ភ្នំពេញ ៖ មនុស្សប្រុស/ស្រីចំនួន១១នាក់ដែលបានណាត់គ្នាចូលទៅសេព និងចែកចាយគ្រឿងញៀននៅក្នុងហាងម៉ាស្សាកោសជប់មួយកន្លែងយ៉ាងពពាក់ពពូន ត្រូវបានកម្លាំងកងរាជអាវុធហត្ថខណ្ឌពោធិ៍សែនជ័យសហការជាមួយកម្លាំងអាវុធហត្ថក្រុងភ្នំពេញ ដឹកនាំដោយលោក មាស ចាន់ពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញបានធ្វើការចាប់ឃាត់ខ្លួនមនុស្សទាំងនោះ រួមទាំងដកហូតបានវត្ថុតាងជាថ្នាំញៀនមួយចំនួនធំ។
ហេតុការណ៍នេះបានកើតឡើងកាលពីវេលាម៉ោង៥ព្រលប់ ថ្ងៃទី១១ ខែកុម្ភៈ ឆ្នាំ២០១៥ នៅចំណុចក្នុងហាងម៉ាស្សាកោសជប់យីហោ៧៨៩ ដែលមានទីតាំងនៅក្បែរវិមានសពកងទ័ពវៀតណាម ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា មុនពេលឈានទៅដល់ការចុះឆែកឆេរនៅក្នុងហាងម៉ាស្សាកោសជប់មួយនេះ គេបានដាក់កម្លាំងតាមដានជាយូរមកហើយបន្ទាប់ពីមានគេលួចរាយការណ៍មកថា នៅក្នុងហាងមួយនេះមានក្រុមយុវជនប្រុស្រីបាននាំគ្នាមកពពាក់ពពូនសេព ចែកចាយគ្រឿងញៀន និងមានបង្កប់នូវការរួមភេទលាក់លួចផងដែរ។ បន្ទាប់ពីទទួលបានដំណឹងនេះសមត្ថកិច្ចបានដាក់កម្លាំងតាមអស់មួយរយៈ ទើបនៅល្ងាចថ្ងៃកើតហេតុនេះដោយសារដឹងថា មានក្រុមនេះចូលទៅពពាក់ពពូនដូចសព្វដងនោះ ទើបសមត្ថកិច្ចបានចុះទៅក្រសោមបានទាំងអស់តែម្ដង។
ការចុះទៅឆែកឆេរនិងឃាត់ខ្លួនក្រុមខាងលើនេះ កម្លាំងសមត្ថកិច្ចបានរកឃើញថ្នាំញៀនប្រភេទម្សៅក្រាមពណ៌សថ្លាចំនួន២៤កញ្ចប់តូច និង៦កញ្ចប់ធំថ្នាំពណ៌ក្រហម១កញ្ចប់តូច ទូរស័ព្ទដៃចំនួន៨គ្រឿង រថយន្ត១គ្រឿង និងម៉ូតូ២គ្រឿង។ មនុស្សទាំង១១នាក់ដែលត្រូវឃាត់ខ្លួនទី១-ឈ្មោះពេជ្រ សុដានី ភេទស្រី អាយុ៤៧ឆ្នាំ ជាម្ចាស់ហាង ទី២-ឈ្មោះ ធី ភេទស្រី អាយុ២២ឆ្នាំ ទី៣-ឈ្មោះហេង ស្រស់ ភេទស្រី អាយុ២៥ឆ្នាំ ទី៤-ឈ្មោះ ហេង សុធី ភេទប្រុស អាយុ៤១ឆ្នាំ ទី៥-ឈ្មោះ ពេជ្រនីវ័ន ភេទប្រុស អាយុ៣០ឆ្នាំ ទី៦-ឈ្មោះ ម៉ែន អេនជី ភេទស្រី អាយុ២១ឆ្នាំ ទី៧-ឈ្មោះ កុយ វ៉ាន់ភេទប្រុស អាយុ១៩ឆ្នាំ ទី៨-ឈ្មោះ អឿន សុភា ភេទស្រី អាយុ១៧ឆ្នាំ ទី៩-ឈ្មោះ សៅ វិទូ ភេទប្រុសអាយុ២៣ឆ្នាំ ទី១០-ឈ្មោះ មឿន តយ ភេទស្រី អាយុ២៥ឆ្នាំ និងទី១១-ឈ្មោះ ឆេង ម៉េងហ៊ន ភេទប្រុស អាយុ២៩ឆ្នាំ។
រាល់វត្ថុតាងនិងមនុស្សទាំងអស់ ត្រូវបានបញ្ជូនទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីចាត់ការបន្ត ក៏ដូចជាបន្តតានដាន និងស្រាវជ្រាវស្វែងរកមេខ្លោងជាបន្តទៀត៕
វិទូ
0 Comments