ភ្នំពេញ ៖ នៅសាលាខណ្ឌឫស្សីកែវ នាព្រឹកថ្ងៃទី១១ ខែកុម្ភៈ ឆ្នាំ២០១៥ រៀបចំពិធីពិនិត្យ និងធ្វើពុម្ពត្រចៀកជូនប្រជាពលរដ្ឋ គ.ថ្លង់ មានក្មេង ចាស់ចំនួន២៣៨នាក់ ដើម្បីដាក់ប្រដាប់ស្តាប់ ដោយឥតគិតថ្លៃជាប្រយោជន៍ជួយឱ្យពួកគាត់ស្ដាប់ឮ និងនិយាយបានឡើងវិញ ងាយស្រួលធ្វើការបម្រើសង្គមជាតិ ដោយភាគច្រើនជាមនុស្សចាស់។
ពិធីនេះក្រោយអធិបតីភាព លោក ស្រីឡោក ខេង តំណាងរាស្ត្រមណ្ឌលភ្នំពេញ និងជាអនុប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ និងលោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ រួមនឹងលោកអភិបាលរងនៃគណៈអភិបាលខណ្ឌឫស្សីកែវ ព្រមទាំងម្ចាស់ជំនួយ និងប្រជាពលរដ្ឋជាច្រើននាក់មកពី៦សង្កាត់ ក្នុងខណ្ឌឫស្សីកែវ។
ការធ្វើពុម្ពត្រចៀកជូនប្រជាពលរដ្ឋទាំងអស់នេះ ក្រោមជំនួយឧបត្ថម្ភពីមូលនិធិ«ស្តារឃី»នៅសហរដ្ឋអាមេរិក តាមរយៈលោកស្រី ឡោក ខេង តំណាងរាស្ត្រមណ្ឌលភ្នំពេញ ហើយក្រុមការងារមនុស្សធម៌ដែលមកជួយចាក់ពុម្ពត្រចៀក គឺមកពីសកលវិទ្យាល័យ វិទ្យាសាស្ត្រសុខាភិបាល សកលវិទ្យាល័យអន្តរជាតិIU និងសកលវិទ្យាល័យចេនឡា ដោយកម្មវិធីនេះបានធ្វើរយៈពេលមួយព្រឹក។
លោក ស្រី ឡោក ខេង បានមានសាសន៍នាឱកាសសំណេះសំណាលនោះថា ដោយយល់ឃើញពីការលំបាករបស់បងប្អូនប្រជាពលរដ្ឋដែលមានពិការភាពដោយ គ.ថ្លង់ ដូច្នេះទើបលោកស្រីទំនាក់ទំនងរកមូលនិធិជួយបងប្អូន គ.ថ្លង់ទាំងអស់នេះ។ លោកស្រីបន្តថា តម្លៃនៃការធ្វើពុម្ពត្រចៀកនិងឧបករណ៍សម្រាប់ស្តាប់នេះ គឺថ្លៃណាស់ ហើយកន្លងមកក្នុងឆ្នាំ២០១៣យើងបានធ្វើជូនបងប្អូននៅខេត្តសៀមរាប និងខេត្តពោធិ៍សាត់ទទួលបានជោគជ័យ ព្រោះចង់ឃើញពួកគាត់ស្ដាប់ឮមានការសប្បាយចិត្តណាស់។ ដូច្នេះក្នុងឆ្នាំ២០១៥នេះ គាត់មកធ្វើជូនបងប្អូនក្នុងរាជធានីភ្នំពេញវិញម្តង ដោយមកដល់ពេលនេះបានធ្វើអំពើមនុស្សធម៌ដោយធ្វើពុម្ពត្រចៀកដើម្បីដាក់ប្រដាក់ស្តាប់បាននេះដោយឥតគិតថ្លៃបានចំនួន៦ខណ្ឌហើយ ពោលគឺទី១-ខណ្ឌជ្រោយចង្វា ទី២-ខណ្ឌពោធិសែនជ័យ ទី៣-ខណ្ឌសែនសុខ ទី៤-ខណ្ឌច្បារអំពៅ ទី៥-ខណ្ឌដង្កោ និងទី៦-ខណ្ឌឫស្សីកែវនេះ។
លោកស្រីបានបញ្ជាក់ទៀតថា ឧបករណ៍ដាក់ត្រចៀករបស់មូលនិធិ "ស្តារឃី" នេះ មានរាងតូចងាយស្រួលក្នុងការដាក់ក្នុងត្រចៀកមើលមិនឃើញផលិតនៅសហរដ្ឋអាមេរិក ហើយអាចឱ្យបងប្អូនគ.ថ្លង់ស្តាប់បាន និងនិយាយបាន។
លោកស្រីបានមានប្រសាសន៍ថា ថ្ងៃទី១១ ខែកុម្ភៈ ឆ្នាំ២០១៥នេះ គឺជាលើកទី២ហើយដែលលោកស្រី និងក្រុមការងារបានមកធ្វើជូនបងប្អូននៅខណ្ឌឫស្សីកែវតាមការស្នើសុំរបស់លោក ធុយសុខន អភិបាលនៃគណៈអភិបាលខណ្ឌឫស្សីកែវ ព្រោះនៅមានបងប្អូនប្រជាពលរដ្ឋច្រើនណាស់ដែលពិការដោយ គ.ថ្លង់នេះ ដែលលើកទី១មានបងប្អូន គ.ថ្លង់ចំនួន១២៨នាក់ ហើយលើកទី២នេះមានចំនួន២៣៨នាក់ និងនៅមានមកជាបន្តបន្ទាប់ទៀត។
ឆ្លៀតក្នុងឱកាសនោះ លោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺបានជម្រាបសួរសុខទុក្ខ និងសំណេះសំណាលជាមួយបងប្អូន គ.ថ្លង និងដើរពិនិត្យមើលក្រុមការងាររបស់គ្រូពេទ្យស្ម័គ្រចិត្តធ្វើពុម្ពត្រចៀក និងជួបសំណេះសំណាលជាមួយយុវជនខណ្ឌឫស្សីកែវ និងបានផ្តល់នូវអនុសាសន៍ រួមនឹងបទពិសោធន៍មួយចំនួនសម្រាប់ឱ្យយុវជនយើងយកទៅអនុវត្តក្នុងទិសដៅចូលរួមកសាងអភិវឌ្ឍន៍ប្រទេសឱ្យបានរីកចម្រើនជឿនលឿនបន្តវេនទៅថ្ងៃអនាគត៕
ឌីរៀ
0 Comments