ប៉ោយប៉ែត ៖ តៃកុងរថយន្តដឹកដំឡូងមីនាំគ្នារអ៊ូមិនដាច់ពីមាត់ ដោយសារកុងត្រូលរបស់មន្ត្រីគយរដ្ឋាករខេត្តបន្ទាយមានជ័យនាំគ្នាជម្រិតជាន់.កពួកគាត់យកលុយដូចព្យុះកំបុតត្បូង ទង្វើបែបនេះគឺធ្វើឲ្យប្រជាពលរដ្ឋដែលជាកសិករដាំដំឡូងមីនាំគ្នាត្អូញត្អែរថា តម្លៃដំឡូងមីរបស់ពួកគាត់មិនសូវលក់បានថ្លៃដូចឆ្នាំមុនៗនោះទេ បែរជាអស់លោកម្ចាស់កុងត្រូលនៅតាមបណ្តោយផ្លូវជាតិលេខ៥ នាំគ្នាយកលុយរបស់ពួកគាត់ថែមទៀតនោះ។
គួររំលឹកដែរថា នៅរសៀលថ្ងៃទី១១ ខែកុម្ភៈ ឆ្នាំ២០១៥ ត្រង់ចំណុចកុងត្រូលរបស់គយរដ្ឋាករ ខេត្តដែលមានទីតាំងស្ថិតនៅត្រង់ចំណុចផ្លូវហា ដែលមានចម្ងាយពីក្រុងប៉ោយប៉ែតចំនួន៨គីឡូម៉ែត្រ តាមបណ្តោយផ្លូវជាតិលេខ៥ ពីប៉ោយប៉ែតមកខេត្តបន្ទាយមានជ័យ ដែលកុងត្រូលខាងលើនោះគ្រប់គ្រងដោយមន្ត្រីគយរដ្ឋាករស្នាក់ការខេត្តបន្ទាយមានជ័យតែម្តង ស្របពេលដែលមានការឯកភាពពីសាលាខេត្តអោយដាក់សម្រាប់ទប់ស្កាត់ និងប្រមូលពន្ធជូនរដ្ឋ។
មានការរអ៊ូពីសំណាក់ក្រុមតៃកុងរថយន្តជាច្រើនដែលបានដឹកកសិផលដំឡូងមីចេញពីក្រុងប៉ោយប៉ែតឆ្ពោះទៅបណ្ដាច្រករបៀង ឫច្រកតំបន់នានាក្នុងស្រុកម៉ាឡៃ ច្រកតំបន់បឹងត្រកួនក្នុង ស្រុកស្វាយចេកបាននាំគ្នាលើកកឡើងថា រាល់ពេលដែលពួកគាត់បានដឹកដំឡូងមីចេញពីក្រុងប៉ោយប៉ែតមកដល់ត្រង់ចំណុចគយរដ្ឋាករខាងលើ ត្រូវគេទាយលុយជារៀងរាល់ថ្ងៃ ដែលនាក់កាក់រថយន្តរបស់ពួកគាត់នោះគឺជាមន្ត្រីប៉េអិមដែលឈរចាំយាមកាក់ស្ទាក់រថយន្តយកលុយពីជនរងគ្រោះជាប្រចាំ។ ពលរដ្ឋបានបន្តទៀតថា ការយកលុយរបស់ពួកគាត់នោះ មិនដឹងថាបានចូលទៅដល់ចំណូលពន្ធដែរឫអត់? ឬមួយលុយដែលពួកគេយកពីតៃកុងរថយន្តនោះ បានត្រឹមចូលក្នុងហោប៉ៅអ្នកយាមតែប៉ុណ្ណោះ។ ប្រជាពលរដ្ឋបានលើកឡើងទៀតថា មានពេលខ្លះតៃកុងរថយន្តតាក់ស៊ីតូចតាចដែលដឹកផ្លែឈើ និងទំនិញផ្សេងៗ ត្រូវបានគេបង្ខំអោយដាក់ខែក្រៅពន្ធគយផងដែរ។ ជនរងគ្រោះជាច្រើននាក់បានលើកជាសំណួរថា តើការប្រមូលពន្ធជូនរដ្ឋក្រោមការឯកភាពរបស់មន្ត្រីសាលាខេត្តបន្ទាយមានជ័យនោះ គឺគេប្រមូលក្នុងបែបជាន់.កយកលុយ ទាំងឈ្មួញតូចទាំងឈ្មួញធំ សូម្បីតែកសិករដែលមានដំឡូងមីឫស្រូវ ក៏ត្រូវបង់ពន្ធចូលរដ្ឋឫមួយយ៉ាងណា?
លោក ថោង សុខាំភូ ប្រធានស្នាក់ការគយចល័តខេត្តបន្ទាយមានជ័យបានប្រាប់កម្ពុជាថ្មីតាមទូរស័ព្ទថា លោកគ្មានគម្រោងឲ្យកូនចៅទៅកាក់រថយន្តដឹកដំឡូងមីរបស់ប្រជាកសិករក្នុងស្រុកយកមកបង់ពន្ធនោះទេ។ លោកបានបញ្ជាក់ទៀតថា បើសិនជាមានកូនចៅណាធ្វើបែបនេះ លោកនឹងមានវិធានការទប់ស្កាត់ជាបន្ទាន់មិនឲ្យកើតមានតទៅទៀតទេ។
លោក គោ ស៊ុំសារឿត អភិបាលខេត្តបន្ទាយមានជ័យធ្លាប់បានលើកឡើងថា សាលាខេត្តបន្ទាយមានជ័យពិតជាបានឯកភាពឲ្យដាក់កុងត្រូលនៅចំណុចផ្លូវហានោះមែន ដើម្បីទប់ស្កាត់រាល់បទល្មើសគេចពន្ធ និងទប់ស្កាត់រាល់ការនាំចូលនៅទំនិញខូចគុណភាពទៀតផង។ លោកបានបន្តទៀតថា ពន្ធនៅក្នុងឆ្នាំ២០១៤កន្លងទៅ គឺមានការកើនឡើងរហូតដល់ជាង១០០លានឯណោះ បើប្រៀបធៀបក្នុងឆ្នាំ២០១៣កន្លងទៅ គឺមានត្រឹមតែជាង៩០លានតែប៉ុណ្ណោះ នេះគឺជាការកើនឡើងលើចំណូលពន្ធដែលមិនធ្លាប់មានក្នុងឆ្នាំមុនៗកន្លងមកនិងខិតខំបន្តអនុវត្តការប្រមូលពន្ធឲ្យបានច្រើនតទៅទៀតសម្រាប់ឆ្នាំ២០១៥ និងឆ្នាំតៗទៅមុខទៀត៕
ពៅរី
0 Comments