បន្ទាយមានជ័យ ៖ និស្សិតសកលវិទ្យាល័យមានជ័យឆ្នាំទី៤ម្នាក់ដែលគេដឹងថាជិតនឹងប្រលងបញ្ចប់ឆ្នាំទី៤ហើយនោះ ត្រូវបានរថយន្តបុកពេញទំហឹងបណ្ដាលឲ្យរងរបួសជាទម្ងន់ ហើយត្រូវបានរថយន្តសង្គ្រោះរបស់ស្នងការដ្ឋាននគរបាលខេត្តដឹកទៅសង្គ្រោះជាបន្ទាន់ភ្លាមៗនៅមន្ទីរពេទ្យ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៥និង៣០នាទីល្ងាច ថ្ងៃទី១១ ខែកុម្ភៈ ឆ្នាំ២០១៥ នៅលើកំណាត់ផ្លូវជាតិលេខ៥ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។ លោក សន គីមសួគ៍ នាយការិយាល័យចរាចរផ្លូវគោកបានឲ្យដឹងថា ជនរងគ្រោះត្រូវបានគេស្គាល់ឈ្មោះ សំ ប៉ានយៀប ភេទប្រុស អាយុ២៤ឆ្នាំ មានទីលំនៅភូមិយាងវៀន ឃុំផ្គាំ ស្រុកស្វាយ ចេកខេត្តបន្ទាយមានជ័យ គ្រាដែលជនរងគ្រោះជានិស្សិតឆ្នាំទី៤ សិក្សាផ្នែកកសិឧស្សាហកម្មនៅសកលវិទ្យាល័យមានជ័យ។ ជនរងគ្រោះបើកបរម៉ូតូម៉ាកហុងដាធ្រីមធុនសេ១២៥សេរី២០០៨ ពាក់ស្លាកលេខប.មានជ័យ1A.7576។ ចំណែកឯរថយន្តដែលបុកម៉ាកតូយូតាកាមារី ពណ៌ទឹកប្រាក់ ពាក់ស្លាកលេខ ប.មានជ័យ.2A.4438 អ្នកបើកបរត្រូវបានគេស្គាល់ឈ្មោះ ចែត សំណាង ភេទប្រុស អាយុប្រហែល៤៦ឆ្នាំ ជាមន្ត្រីកងរាជអាវុធហត្ថស្រុកអូរជ្រៅ មានឋានន្តរស័ក្តិជាអនុសេនីយ៍ឯក។ ប្រភពពីសមត្ថកិច្ចបានបញ្ជាក់ថា មុនពេលកើតហេតុគេបានឃើញ ម៉ូតូបើកមកពីទិសខាងកើតទៅលិច ពេលដល់ចំណុចកើតហេតុបានបត់ឆ្លងផ្លូវចូលទៅផ្ទះដែលជួលស្នាក់នៅ ស្រាប់តែរថយន្តមកពីក្រោយបុកពេញទំហឹង បណ្ដាលឲ្យមនុស្សផ្លោងខ្ទាតចម្ងាយជាង៤០ម៉ែត្រ រងរបួសធ្ងន់ ហើយត្រូវបាននគរបាលចរាចរណ៍ដឹកតាមរថយន្តសង្គ្រោះរបស់ស្នងការដ្ឋាននគរបាលខេត្តយកទៅសង្គ្រោះភ្លាមៗផងដែរនៅមន្ទីរពេទ្យ ចំណែកម៉ូតូខ្ទាតប្រហែល៦០ម៉ែត្រខូចខាតទាំងស្រុង។ លោកបានបញ្ជាក់ទៀតថា រថយន្តបង្កនិងម៉ូតូរងគ្រោះត្រូវនគរបាលចរាចរណ៍ដឹកយកទៅរក្សាទុកនៅស្នងការដើម្បីដោះស្រាយទៅតាមផ្លូវច្បាប់៕
គង្គា
0 Comments