ភ្នំពេញ ៖ នារី២នាក់បានស្លាប់ភ្លាមៗនៅនឹងកន្លេងកើតហេតុ និងម្នាក់ទៀតរងរបួសធ្ងន់បាក់ភ្លៅឆ្វេងបន្ទាប់ពីជិះម៉ូតូមួយគ្រឿងឌុបគ្នា៣នាក់ពេលខំបើកវ៉ារថយន្តកុងតឺន័រខាងស្ដាំដៃខ្លួនបានទៅបុកជាមួយពំនូកខ្សាច់ ហើយបានផ្លាតកង់ដួលបោកមកចូលក្រោមកង់រថយន្តកុងតឺន័របណ្ដាលឲ្យកិនស្លាប់ភ្លាមៗយ៉ាងអាណោចអាធម៌បំផុត ក្នុងនោះមានជនរងគ្រោះម្នាក់ត្រូវរថយន្តកិនបាក់ភ្លៅខាងឆ្វេងរងរបួសធ្ងន់ធ្ងរ។
ហេតុការណ៍នេះបានកើតឡើងកាលពីវេលាម៉ោង១៨ព្រលប់ ថ្ងៃទី១២ ខែកុម្ភៈ ឆ្នាំ២០១៥ នៅតាមបណ្ដោយផ្លូវអូដឹមកប់ស្រូវ ស្ថិតក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ។
ជនរងគ្រោះដែលស្លាប់ទី១-មានឈ្មោះ រតនា ភេទស្រី តែកាត់សក់ខ្លីដូចមនុស្សប្រុស អាយុ២១ឆ្នាំ(ជាអ្នកឌុប), ទី២-មានឈ្មោះ លន់ សុខហេង ភេទស្រី អាយុ២២ឆ្នាំ និងអ្នករងរបួសធ្ងន់មានឈ្មោះ ឌឿន ស្រីស្រស់ ភេទស្រី អាយុ២១ឆ្នាំ មុខរបររត់តុនៅហាងតែគុជ ស្នាក់នៅផ្ទះជួលក្នុងសង្កាត់ចោមចៅ។ ជនរងគ្រោះជិះម៉ូតូម៉ាកអាយខុនពណ៌សលាយក្រហម ពាក់ស្លាកលេខភ្នំពេញ1X 9000។ ចំណែករថយន្តកុងតឺន័រម៉ាកហ៊ីយ៉ាន់ដាយក្បាលពណ៌សលាយខៀវ ពាក់ស្លាកលេខភ្នំពេញ3A 1706 ជារថយន្តរបស់កំពង់ផែស្វយ័តភ្នំពេញ អ្នកបើកបរបានរត់គេចខ្លួនបាត់។
តាមប្រភពព័ត៌មានបានឲ្យដឹងថា មុនពេលកើតហេតុរថយន្តនិងម៉ូតូជនរងគ្រោះបានបើកបរធ្វើដំណើរស្របទិសគ្នាពីត្បូងទៅជើង ដោយម៉ូតូជនរងគ្រោះជិះឌុបគ្នា៣នាក់ពីក្រោយរថយន្តនោះតែដោយសារដីហុយខ្លាំងពេកអ្នកជិះម៉ូតូខំបើកវ៉ារថយន្តកុងតឺន័រខាងស្ដាំដៃរបស់ខ្លួន ពេលបើកនោះម៉ូតូបានទៅបុកជាមួយពំនូកដីខ្សាច់ដែលគេចាក់តាមចិញ្ចើមផ្លូវបណ្ដាលឲ្យកង់ម៉ូតូផាយដួលបោកចូលក្រោមកង់រថយន្ត ហើយក៏កិនស្លាប់២នាក់ភ្លាមៗតែម្ដង។
ចំណែកជនរងគ្រោះដែលរងរបួសធ្ងន់ត្រូវរថយន្តកិនបាក់ភ្លៅខាងឆ្វេង ហើយត្រូវបានគេបញ្ជូនទៅកាន់មន្ទីរពេទ្យព្រះកុសុមៈដើម្បីជួយសង្គ្រោះអាយុជីវិត។ សពជនរងគ្រោះត្រូវនគរបាលប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ហើយរថយន្តនិងម៉ូតូត្រូវនគរបាលយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគររាជធានីភ្នំពេញដើម្បីរង់ចាំដោះស្រាយតាមផ្លូវច្បាប់៕
វិទូ
0 Comments