ភ្នំពេញក្រោន និងខេមបូឌានថៃហ្គ័រ ប្រកួតមិត្តភាពចុងសប្ដាហ៍នេះចំពេលលីកកម្ពុជាកំពុងសម្រាក

ក្រុមបាល់ទាត់​ភ្នំពេញ​ក្រោ​ន នឹង​ជា​ក្រុម​ជើងឯក​ឆ្នាំ​ចាស់ កំពុងតែ​នាំមុខ​កំពូល​តារាង​លី​ក​បាល់ទាត់​កម្ពុជា ជា​បណ្ដោះអាសន្ន​នេះ​នឹងត្រូវ​ប្រកួត​កម្ដៅ​សាច់ដុំ​មិត្តភាព​ជាមួយ​ក្រុម​ខេ​ម​បូ​ឌា​ន​ថៃ​ហ្គ័​រ (Cambodian Tiger) នៅ​ចុងខែ​សីហា នេះ​អំឡុងពេល​លី​ក​បាល់ទាត់​មិត្ត​ហ្វូ​ន​ខេ​បូ​ឌា​ន​លី​ក២០១៥ (Metfone Cambodian League 2015) ផ្អាក​ការប្រកួត​មួយរយៈ។

ជំនួប​មិត្តភាព​រវាង​ក្រុម​ខ្លាំង​ទាំង ២ នេះ​នឹង​ធ្វើឡើង​នៅ​កីឡដ្ឋាន RSN Stadium ទឹកដី​របស់​ក្លិប​ភ្នំពេញ​ក្រោ​ន ដែលមាន​ទីតាំងនៅ​ខណ្ឌទួលគោក រាជធានី​ភ្នំពេញ នា​វេលា​ម៉ោង ៤ រសៀល​តទៅ នៅ​ថ្ងៃ សៅ​រិ៍ ទី ២៩ ខែ សីហា ឆ្នាំ ២០១៥ ខាងមុខ។

សូមបញ្ជាក់ថា​លី​ក​កំពូល​កម្ពុជា​ត្រូវ​ផ្អាក​ការប្រកួត​ជិត១ ខែ​ពោលគឺ​ចាប់ពី​ថ្ងៃទី១៦ ខែសីហា រហូតដល់​ថ្ងៃទី១២ ខែកញ្ញា ឆ្នាំ២០១៥ ដោយសារ​ទុក​ឱកាស​ឱ្យ​ក្រុមបាល់ទាត់​ជម្រើសជាតិ​កម្ពុជា​រើស​កីឡាករ​ទៅ​ចូលរួម​ប្រកួត​ជម្រុះ 2018 FIFA World Cup Russia ប្រចាំ​ទ្វីបអាស៊ី​ជាមួយ​ក្រុម​ខ្លាំង​ជប៉ុន និង ស៊ី​រី​ក្នុង​វគ្គ​សន្សំ​ពិន្ទុ​តាម​ពូ​ល E ជើង​ទី។

សម្រាប់​ក្រុម​ភ្នំពេញ​ក្រោ​ន ដែល​ដឹកនាំ​ដោយ​លោក Sam Schweingruber ជា​ជនជាតិ​ស្វី​ស នឹងត្រូវ​អវត្តមាន​កីឡាករសំខាន់ៗមួយចំនួន​ដូចជា កែវ សុខ​ផេង, ធា​រី ចន្ថា​ប៊ី​ន, កុក បូរី​ស និង សុះ ស៊ូ​ហា​ណា ព្រោះ​ពួកគេ​ជាប់​ចូល​លេង​ក្នុង​ក្រុម​ជម្រើសជាតិ​ដែល​ត្រៀម​ទៅ​ជម្រុះ World Cup នៅ​ជប៉ុន។

គិតត្រួសៗ ភ្នំពេញ​ក្រោ​ន ឈរ​កំពូល​តារាង MCL 2015 បណ្ដោះអាសន្ន ក្រោយ​ប្រកួត​បាន ១៤ សប្ដាហ៍​ឈ្នះ ១១ ស្មើ ៣ និង​មិន​ធ្លាប់​ចាញ់ ព្រមទាំង​ទាត់​ចូល​ទី​គូប្រកួត​បាន ៤២ គ្រាប់​ហើយ​របូត​វិញ ១៣ គ្រាប់​មាន ៣៦ ពិន្ទុ​ក្នុង​ដៃ។

ចំណែក​ក្រុម​ខេ​ម​បូ​ឌា​ន​ថៃ​ហ្គ័​រ វិញ​ឈរ​នៅ​ចំណាត់ថ្នាក់​លេខ៣ បណ្ដោះអាសន្ន​ដែរ​ក្រោយ​ប្រកួត​បាន ១៤ លើក​ឈ្នះ ៧ ស្មើ ៣ និង ចាញ់ ៤ លើក​ហើយ​ទាត់​ចូល​ទី​គេ​បាន ៣២ គ្រាប់ របូត​គ្រាប់​បាល់​វិញ ២៣ គ្រាប់ មាន ២៤ ពិន្ទុ។ កីឡាករសំខាន់ៗដូចជា សុខ ចាន់​រស្មី, ហែម ស៊ី​ម៉ៃ, សួង វីរៈ,ចាន់ រិទ្ធី សុទ្ធតែ​អាច​នឹង​បង្ហាញខ្លួន​ក្នុងជំនួប​មិត្តភាព​មួយ​នេះ៕

ភ្នំពេញក្រោន និងខេមបូឌានថៃហ្គ័រ ប្រកួតមិត្តភាពចុងសប្ដាហ៍នេះចំពេលលីកកម្ពុជាកំពុងសម្រាក