ឧត្តរមានជ័យ ៖ ជនសង្ស័យ២នាក់ប្ដីប្រពន្ធ ត្រូវបានកម្លាំងកងរាជអាវុធហត្ថស្រុកអន្លង់វែងធ្វើការឃាត់ខ្លួនកាលពីវេលាម៉ោង២និង៣០នាទីរសៀលថ្ងៃទី២៣ ខែសីហា ឆ្នាំ២០១៥ ពាក់ព័ន្ធករណីជួញដូរ និងចែកចាយគ្រឿងញៀន។
ការឃាត់ខ្លួនជនសង្ស័យធ្វើឡើង ដោយមានការចង្អុលបង្ហាញ និងដឹកនាំបញ្ជាផ្ទាល់ពីលោកឧត្ដមសេនីយ៍ត្រីពុទ្ធ សារ៉ាន់ មេបញ្ជាការកងរាជអាវុធហត្ថខេត្ត និងលោកវរសេនីយ៍ត្រីងួន ទ្ធីរិទ្ធ មេបញ្ជាការកងរាជអាវុធហត្ថស្រុក ហើយនៅក្នុងការឃាត់ខ្លួននេះសមត្ថកិច្ចបានដកហូតវត្ថុតាងថ្នាំញៀនប្រភេទមេតំហ្វេតាមីនWYចំនួន១៧គ្រាប់ ប្រាក់រៀលចំនួន៣សែនរៀល ទូរស័ព្ទដៃម៉ាកNokia១គ្រឿង ម៉ាកSAMSUNG.១គ្រឿង។
លោកវរសេនីយ៍ត្រីងួន ទ្ធីរិទ្ធ មេបញ្ជាការអាវុធហត្ថស្រុកអន្លង់វែងបានឲ្យដឹងទៀតថា ការឃាត់ខ្លួនជនសង្ស័យ២នាក់ប្តីប្រពន្ធនោះ ធ្វើឡើងនៅចំណុចភូមិកណ្ដាលលើ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។ ជនសង្ស័យទី១. ឈ្មោះស៊ុន ភារុន ភេទប្រុស អាយុ២៥ឆ្នាំ ត្រូវជាប្តី ទី២. ឈ្មោះប៊ុត រ៉ានី ភេទស្រី អាយុ២៩ឆ្នាំរស់នៅចំណុចកើតហេតុខាងលើ។ បច្ចុប្បន្ន កម្លាំងកងរាជអាវុធហត្ថស្រុកកំពុងកសាងសំណុំរឿងបញ្ជូនទៅសាលាដំបូងខេត្តឧត្តរមានជ័យដើម្បីចាត់ការទៅតាមនីតិវិធីច្បាប់៕
ឃាត់ខ្លួនជនសង្ស័យ២នាក់ប្ដីប្រពន្ធ ករណីជួញដូរគ្រឿងញៀន
0 Comments