កំពង់ឆ្នាំង ៖ កាលវេលាម៉ោង១២និង២០នាទី ឈានចូលថ្ងៃទី២២ ខែសីហា ឆ្នាំ២០១៥ នៅតាមបណ្ដោយផ្លូវជាតិលេខ៥ ត្រង់ចំណុចផ្លូវកោង ស្ថិតក្នុងភូមិត្រពាំងអញ្ចាញ ឃុំស្វាយជ្រំ ស្រុករលារប្អៀរ មានហេតុការណ៍គ្រោះថ្នាក់ចរាចរណ៍មួយបានកើតឡើង ដោយយុវជនម្នាក់របួសបែកក្បាលនិងបាក់ធ្មេញអស់យ៉ាងដំណំ ដោយសារឥទ្ធិពលនៃទឹកប្ដូរនិស្ស័យ បានបើកម៉ូតូលឿននៅពេលយប់ រេចង្កូតទៅបុកនឹងបង្គោលស្លាកគណបក្សហ្វ៊ុនស៊ីនប៉ិចធ្លាក់ប្រឡាយ បណ្ដាលឲ្យរងរបួសធ្ងន់ ត្រូវបានសមត្ថកិច្ចដឹកយកទៅសង្គ្រោះនៅមណ្ឌលសុខភាពឃុំ។
មន្ត្រីនគរបាល នៃអធិការដ្ឋាននគរបាលស្រុករលារប្អៀរបានឲ្យដឹងថា តាមសំដីជនរងគ្រោះក្នុងហេតុការណ៍នេះ នៅព្រឹកថ្ងៃទី២២ ខែសីហា ឆ្នាំ២០១៥ បានឲ្យដឹងថា ជនរងគ្រោះនេះឈ្មោះ ម៉ន កុសល អាយុ២៤ឆ្នាំ មានទីលំនៅក្នុងភូមិពោធិម្រះ ឃុំចក ស្រុកបរិបូរណ៍ ខេត្តកំពង់ឆ្នាំង។
មន្ត្រីនគរបាលរូបនេះបន្តឲ្យដឹងថា នៅមុនពេលកើតហេតុ រូបគេបានជិះម៉ូតូមួយគ្រឿងពណ៌ក្រហម ម៉ាកវ៉េវ ម្នាក់ឯង ដោយធ្វើដំណើរចេញពីក្រុងកំពង់ឆ្នាំង ត្រឡប់ទៅផ្ទះវិញ លុះពេលមកដល់ចំណុចកើតហេតុជាចំណុចផ្លូចកោង កាច់ចង្កូតមិនទាន់ ក៏ជ្រុលទៅបុកនឹងបង្គោលផ្លាកគណបក្ស បណ្ដាលឲ្យម៉ូតូ និងមនុស្សធ្លាក់ចូលទៅក្នុងប្រឡាយរងរបួសធ្ងន់តែម្ដង។ នៅយប់កើតហេតុនោះ មិនដឹងថាជនរងគ្រោះទៅដេកនៅទីណានោះទេ លុះព្រឹកឡើង គេបានដើរប្រាប់ប្រជាពលរដ្ឋថា រូបគេត្រូវចោរវាយប្លន់យកម៉ូតូកាលពីយប់មិញនៅចំណុចកើតហេតុខាងលើ។ តែនៅពេលដែលសមត្ថកិច្ចហៅទៅសួរនាំទៅ ទើបគេប្រាប់ថា គឺរូបគេជិះម៉ូតូបុកបង្គោលផ្លាក ហើយធ្លាក់ចូលប្រឡាយដោយខ្លួនឯង បន្ទាប់មកសមត្ថកិច្ចក៏បានឲ្យជនរងគ្រោះនាំទៅមើលកន្លែងកើតហេតុ ទើបឃើញម៉ូតូរបស់គេនៅក្នុងប្រឡាយនោះ។
ក្រោយមក សមត្ថកិច្ចបានអូសយកម៉ូតូមករក្សាទុកនៅប៉ុស្តិ៍រដ្ឋបាលឃុំស្វាយជ្រំ និងបានយកជនរងគ្រោះទៅលាងរបួសនៅមណ្ឌលសុខភាព រួចទំនាក់ទំនងរកក្រុមគ្រួសារដើម្បីមកយកជនរងគ្រោះត្រឡប់ទៅផ្ទះវិញដើម្បីព្យាបាលរបួសបន្ត៕
ជិះម៉ូតូធ្លាក់ចូលប្រឡាយរងរបួសខ្លួនឯង ស្រែកឆោឡោប្រាប់គេថាចោរវាយប្លន់យកម៉ូតូទៅវិញ
0 Comments