ភ្នំពេញ ៖ មានភាពភ្ញាក់ផ្អើលមួយបានកើតឡើង បន្ទាប់ពីគេឮសំឡេងផ្ទុះអាវុធមួយគ្រាប់នៅក្នុងហាងផឹកស៊ីយីហោ(3M) ដែលជាហាងមួយឧស្សាហ៍មានរឿងកើតឡើងញឹកញាប់ ដោយសារតែមានភ្ញៀវក្រុមចំនួន៥ទៅ៦នាក់ជាអង្គរក្សបានផ្ទុះកំហឹងគ្នាឯងបាញ់គំរាមគ្នា១គ្រាប់ ហើយភ្លាមៗនោះដែរជនដៃដល់បាញ់បោះសេរីនោះត្រូវបានកម្លាំងប៉េអឹមខណ្ឌដូនពេញចុះមកក្របួចកនាំទៅដុសក្អែលនៅទីបញ្ជាការអាវុធហត្ថរាជធានីភ្នំពេញភ្លាមៗដែរ។
ហេតុការណ៍ផ្ទុះអាវុធនោះបានកើតឡើងកាលពីវេលាម៉ោង១២និង៤០៥នាទីយប់រំលងអធ្រាត្រឈានចូលថ្ងៃទី២៧ ខែកញ្ញា ឆ្នាំ២០១៥ នៅចំណុចហាងផឹកស៊ីយីហោ(3M) ដែលមានទីតាំងនៅផ្លូវលេខ១៤៤កែងផ្លូវលេខ៤៧ ក្នុងសង្កាត់ផ្សារថ្មី៣ ខណ្ឌដូនពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញភ្ញៀវមួយក្រុមមានគ្នា៥ទៅ៦នាក់ ដែលទើបចេញពីខួបកំណើតកន្លែងផ្សេង ដោយផឹកមិនអស់ចិត្តបាននាំគ្នាមកផឹកស៊ីបន្តទៀតនៅក្នុងហាង(3M)នោះ ដោយនាំគ្នាអង្គុយផឹកប្រាជ្ញគ្នាលេងសប្បាយបានមួយសន្ទុះស្រាប់តែពួកគាត់ទាំងនោះបានគំហកសម្តីដាក់គ្នាខ្លាំងៗ។ ខណៈនោះដែរស្រាប់តែជនដៃដល់ម្នាក់ក្នុងចំណោមគ្នាឯង៥ទៅ៦នាក់នោះ ដែលគេស្គាល់ថាជាអង្គរក្សបានដកកាំភ្លើងខ្លីចេញពីចង្កេះមកបាញ់ឡើងលើមួយគ្រាប់ធ្វើឲ្យមានការភ្ញាក់ផ្អើលដល់ភ្ញៀវដទៃអង្គុយតុផ្សេងក៏ដូចជាបុគ្គលិកថៅកែហាងនាំគ្នាជ្រួលច្របល់ពេញហាងតែម្តង ពីព្រោះម្នាក់ៗខ្លាចត្រូវគ្រាប់កាំភ្លើងរបស់ជនប្រមឹករូបនោះបាញ់ថែមទៀត។
ប្រភពព័ត៌មានបានបន្តទៀតថា ក្នុងហេតុការណ៍ផ្ទុះអាវុធភ្លាមៗនោះដែរ កម្លាំងកងរាជអាវុធហត្ថខណ្ឌដូនពេញបានចុះមកដល់កន្លែងកើតហេតុភ្លាមៗចាប់ក្របួច.កជនដៃដល់រូបនោះនាំទៅទីបញ្ជាការអាវុធហត្ថរាជធានីភ្នំពេញ ព្រោះគោរពតាមបញ្ញាថ្នាក់លើមិននាំទៅទីបញ្ជាការអាវុធហត្ថខណ្ឌដូនពេញនោះទេ ដោយសារជនបង្កភាពអនាធិបតេយ្យបាញ់បោះសេរីនោះជាអង្គរក្ស។
ពាក់ព័ន្ធនឹងការចាប់បង្ក្រាបជនបាញ់បោះសេរីរូបនោះគេចាំមើលថាតើកម្លាំងអាវុធហត្ថរាជធានីភ្នំពេញកសាងសំណុំរឿង និងនីតិវិធីបញ្ជូនជនដៃដល់រូបនោះមកសាលាដំបូងរាជធានីភ្នំពេញដើម្បីចាត់ការតាមផ្លូវច្បាប់ដែរឬអត់ ឬក៏ពិន័យតាមរយៈអង្គភាពហើយដោះវិញនោះ។ដូច្នេះហើយគេជឿថាសមត្ថកិច្ចជំនាញមិនបណ្ដែតបណ្ដោយឲ្យជនបង្កភាពអនាធិបតេយ្យក្នុងសង្គមបានរួចខ្លួនដោយងាយៗនោះទេ ពោលគឺប្រហែលជាគេចមិនរួចពីសំណាញ់ច្បាប់ឡើយ។
សមត្ថកិច្ចបានបញ្ជាក់ថាជនសង្ស័យបាញ់បោះសេរីនោះឈ្មោះ ឃឺថារះ ប្រាចក ភេទប្រុស អាយុ៣៣ឆ្នាំ។ ក្នុងការឃាត់ខ្លួននោះសមត្ថកិច្ចបានដកហូតវត្ថុតាងរួមមានអាវុធខ្លីម៉ាកGLOCK19 ចំនួន០១ដើម មានបង់០៣ ហើយមានគ្រាប់ពេញទាំងអស់ ម៉ូតូ០១គ្រឿងម៉ាក CBR ពណ៌ក្រហម គ្មានស្លាកលេខ ទូរស័ព្ទម៉ាកអាយហ្វូនសិច ចំនួន០២គ្រឿង ខ្សែកធ្វើពីលោហធាតុពណ៌ទង់ដែងចំនួន០១ខ្សែ លុយចំនួន៣៨ម៉ឺនរៀល។
សមត្ថកិច្ចបញ្ជាក់ទៀតថា ជនដៃដល់សមាសភាពជាកម្លាំងប្រដាប់អាវុធដែរ តែមិនអាចបង្ហើបប្រាប់ឲ្យច្បាស់ថានៅខាងអង្គភាពណាឡើយ៕
ចូលផឹកស៊ីនៅហាង(3M)មានទំនាស់គ្នាឯងដកកាំភ្លើងបាញ់គំរាមមួយគ្រាប់
0 Comments