ព្រឹត្តិការណ៍«ភ្នំពេញទីក្រុងកើតឡើងវិញ» នឹងត្រូវដាក់តាំងបង្ហាញនៅក្នុងមហោស្រពវប្បធម៌អន្តរជាតិលើកទី៤ «លីស៣០០០» ដែលប្រព្រឹត្តទៅចាប់ពីថ្ងៃទី២៦ ខែកញ្ញា ឆ្នាំ២០១៥ ដល់ថ្ងៃទី ១៧ ខែមករា ឆ្នាំ២០១៦ នៅទីក្រុងលីស ប្រទេសបារាំង ក្រោមប្រធានបទ «ការកើតឡើងវិញ»។
សេចក្ដីប្រកាសព័ត៌មានរបស់ស្ថានទូតបារាំងថ្ងៃទី២៥ ខែកញ្ញា ឆ្នាំ២០១៥ បានឲ្យដឹងថា រាជធានីភ្នំពេញ និងសិល្បករកម្ពុជានឹងចូលរួមជាកិត្តិយស ក្នុងមហោស្រពវប្បធម៌អន្តរជាតិលើកទី៤«លើស៣០០០» ដែលនឹងប្រព្រឹត្តទៅចាប់ពីថ្ងៃទី២៦ ខែកញ្ញា ឆ្នាំ២០១៥ ដល់ថ្ងទី១៧ ខែមករា ឆ្នាំ២០១៦នៅទីក្រុងលីសប្រទេសបារាំង ក្រោមប្រធានបទ«ការកើតឡើងវិញ»។ ក្នុងរយៈពេល៤ខែ ស្នាដៃសិល្បករចំនួន២០រូប នឹងត្រូវដាក់តាំងជូនសាធារណជនទស្សនា នៅក្នុងមហោស្រពវប្បធម៌មហោឡារិកនេះ ដោយមានការអញ្ជើញចូលរួមផងដែរពីសិល្បករមកពីទីក្រុងសេអ៊ូល រីយូ ឌីត្រយ និងអេដហូវែន។ ការអញ្ជើញសិល្បករកម្ពុជាទៅចូលរួមក្នុងព្រឹត្តិការណ៍នេះ បង្ហាញពីការទទួលស្គាល់ដ៏ធំធេង ចំពោះភាពរស់រវើកនៃស្នាដៃសិល្បករកម្ពុជា។
វត្តមានរបស់រាជធានីភ្នំពេញក្នុងចំណោមទីក្រុងមួយចំនួនតូច ដែលត្រូវបានអញ្ជើញជាកិត្តិយសក្នុងមហោស្រពនេះ មិនមែនជារឿងចៃដន្យនោះឡើយ។ ភ្នំពេញគឺជានិមិត្តរូបនៃទីក្រុងតែមួយគត់ក្នុងសម័យបច្ចុប្បន្ន ដែលធ្លាប់មានការជម្លៀសប្រជាជនទាំងអស់ឲ្យចាកចេញដោយបង្ខំ ហើយជាទីក្រុងដែលស្ទើរតែត្រូវបានគេបោះបង់ចោលក្នុងរយៈពេលប្រមាណជិត៤។ បន្ទាប់ពីឆ្នាំ១៩៧៩ ភ្នំពេញត្រូវបានកសាងឡើងវិញ ខណៈដែលសិល្បករ និងបញ្ញវន្តខ្មែរប្រមាណ៩០%បានបាត់បង់ជីវិត។ ការរស់ឡើងវិញនេះ ទីក្រុងភ្នំពេញ បានបណ្ដុះគំនិតដល់សិល្បករកម្ពុជាជាច្រើន ដែលបានបង្កើតស្នាដៃថ្មីៗតាមឯកទេសរបស់ខ្លួន ( មានការផលិតវីដេអូ ការសម្ដែងការថតរូបចម្លាក់ ។ល។) ជាពិសេសដោយសារមានការគាំទ្រពីវិទ្យាស្ថានបារាំងនៅកម្ពុជា។
មហោស្រពនេះក៏ជាឱកាសមួយផងដែរ ក្នុងការផ្សព្វផ្សាយឲ្យអន្តរជាតិបានស្គាល់នូវស្នាដៃរបស់សិល្បករខ្មែរ ដែលមិនសូវបានចេញក្រៅប្រទេស។ ក្រៅពីពិព័រណ៍ស្នាដៃសិល្បៈ ព្រឹត្តិការណ៍ពិសេសមួយ នឹងផ្ដោតលើរាជធានីភ្នំពេញពីថ្ងៃទី៤ ដល់ថ្ងៃទី១០ ខែមករា ឆ្នាំ២០១៦។ នោះគឺព្រឹត្តិការណ៍«ទីក្រុងកើតឡើងវិញ»ដែលត្រូវបានផ្ដួចផ្ដើមឡើងដោយលោក គ្រីស្យង់ កូហ្ស៊ូល ។ សិល្បករបារាំងរូបនេះធ្លាប់បានធ្វើការយ៉ាងសកម្មជាមួយសិល្បករកម្ពុជាក្នុងការរៀបចំ«មហោស្រពរូបថតភ្នំពេញ»៕
ព្រឹត្តិការណ៍«ភ្នំពេញទីក្រុងកើតឡើងវិញ» នឹងត្រូវដាក់បង្ហាញក្នុងមហោស្រពវប្បធម៌អន្តរជាតិនៅប្រទេសបារាំង
0 Comments