ភ្នំពេញ ៖ ថ្ងៃនេះគឺជាថ្ងៃ បុណ្យសែនព្រះខែ ដែលជាប្រពៃណីរបស់ជនជាតិចិន ប៉ុន្តែយើងសង្កេតឃើញថា នៅក្នុងប្រទេសកម្ពុជា ជាពិសេសក្នុងរាជធានីភ្នំពេញតែម្ដង មិនថាបងប្អូនមានខ្សែស្រឡាយកាត់ចិន ឬប្រជាជនខ្មែរយើងទេ គឺគាត់តែងតែប្រារព្ធនូវពិធីបុណ្យប្រពៃណីនេះដែរ។
ដោយសារតែមិនសូវយល់ច្បាស់អំពីពិធីរៀបចំសែននាវេលាយប់នេះ កម្ពុជាថ្មី បានជួបជាមួយ លោកគ្រូចិនសែនៅក្នុងរាជធានីភ្នំពេញម្នាក់ ដើម្បីសួរនាំអំពីវិធីរៀបចំសែនឲ្យបានត្រឹមត្រូវតាមក្បួនខ្នាតដែលគាត់ចេះចាំតពីដូនតារបស់គាត់មក។
លោកគ្រូនិយាយខ្មែរមិនសូវច្បាស់ បានរៀបរាប់ប្រាប់អំពីរបៀបសែនដូចតទៅនេះ៖
១. រណ្ដាប់សែនព្រះខែ
•នំសែនព្រះខែចំនួន១ចាន៤នំ ឬច្រើនជាងនេះតាមចិត្តចង់
•នំសែនព្រះខែ អត់ស្នូល ចំនួន១តូច ឬធំតាមចិត្តចង់
•ផ្កាស្រស់ ៧ពណ៌ ចំនួន ២ថូ ហាមយកផ្កាពណ៌ស
•ផ្លែឈើចម្រុះ ៣មុខ ឬ៥មុខ ចំនួន២ចាន ឬច្រើនតាមចិត្តចង់
•ផ្លែក្រូចខ្លុងចំនួន២ផ្លែ
•ត្រាវចំហុយចំនួន១ចាន
•ម្ហូបបួស (ពពុះសណ្ដែក ជីឆាយ ត្រចៀកកណ្ដុល ផ្កាចេក មីសួ) ចំនួន ១ចាន
•តែមួយប៉ាន់
•កែវតែ ចំនួន ៣
•កែវ ឬកំប៉ុង ជើងធូប ដាក់អង្គរ ពេញ
•ក្រដាស មាសប្រាក់ សម្រាប់សែនមួយកំប្លេ
•ធូប វែងល្មម និងទៀនធំល្មម មួយគូ រៀបចំតុស្អាតមួយធំល្មម ដាក់របស់សែនទាំងអស់នេះ អោយមានរបៀប។
២. ពិធីសែន
•ម៉ោងល្អ ចាប់ផ្ដើមសែនគឺ ពីម៉ោង ៥ល្ងាច ដល់ម៉ោង ៧យប់ (ល្អណាស់) ឬ ពីម៉ោង ៧យប់ ដល់ម៉ោង ១១យប់ (ល្អមធ្យម)
•ឆុងនឹងឆ្នាំ ជូត អាយុ ៥៦ និង ៦៨ ដូចនេះហាមកុំឲ្យគាត់ចូលរួមក្នុងពិធីនេះ
•ពេលសែនបែមុខទៅទិស អាគ្នេយ៍ (ខាងកើតឈាងខាងត្បូង) ឬទិស ពាយព្យ (ខាងជើងឆៀងខាងលិច) ឬទិស និរតី (ខាងត្បូងឆៀងខាងលិច)
ពេលវេលាល្អមកដល់ អុជទៀន និងធូប ៣សរសៃ រួចបួងសួងតាមចិត្តដែលប្រាថ្នាចង់បានទៅព្រះខែដោយប្រាប់ពី ឈ្មោះ ថ្ងៃខែឆ្នាំកំណើត និងទីលំនៅ រួចហើយ ដោតធូបនោះក្នុងកំប៉ុងជើងធូប។ បន្ទាប់មកចាក់តែ ក្នុងកែវទាំង៣ រួចលើក កែវម្ដងមួយៗ ជូនព្រះខែ រួចហើយ លើកថ្វាយព្រះខែ នូវនំ ផ្លែឈើ និងរបស់ផ្សេងទៀត រួមទាំងក្រដាសមាសប្រាក់។ ចុងបញ្ចប់សំពះអរគុណ៣ដង ជាការស្រេច។
ជាចុងក្រោយ លោកគ្រូសូមជូនពរ ឲ្យគ្រប់ក្រុមគ្រួសារមានសិរីសួស្ដី រីករាយសប្បាយក្នុងថ្ងៃសែនព្រះខែ៕
លោកគ្រូចិនសែ រៀបរាប់អំពីពិធីសែន ព្រះខែនៅថ្ងៃនេះ
0 Comments