ភ្នំពេញ ៖ កញ្ញាធី សុវណ្ណថា ដែលមានភាពលេចធ្លោក្នុងបណ្ដាញទំនាក់ទំនងសង្គមហ្វេសប៊ុក និងជាបេក្ខជនម្នាក់នៅក្នុងការប្រឡងឆ្នាំនេះនោះ កំពុងមានការឈឺចាប់ អាម៉ាស់ និងបាក់ទឹកចិត្តយ៉ាងខ្លាំងរហូតសរសេរសុំទោសឪពុកម្ដាយ លោកគ្រូអ្នកគ្រូ និងអ្នកគាំទ្រនាងទាំងអស់ចំពោះការប្រឡងធ្លាក់របស់នាង។
កញ្ញាធី សុវណ្ណថាបានសរសេរនៅលើអាខោនហ្វេសប៊ុករបស់នាងនៅមុននេះប្រមាណ១ម៉ោងថា «សុំទោសពុកម៉ែ ដែលជួយឧបត្ថម្ភការសិក្សាឲ្យកូន សុំទោសលោកគ្រូអ្នកគ្រូ ដែលខំប្រឹងបង្រៀនបន្ថែមឲ្យខ្ញុំ សុំទោសបងប្អូនអ្នកគាំទ្រ ដែលជួយ ផ្តល់កម្លាំងចិត្តឲ្យខ្ញុំ ខ្ញុំបានខំប្រឹងអស់ពីលទ្ធភាពហើយ តែខ្ញុំនៅតែ “ធ្លាក់” ខ្ញុំពិតជាឈឺចាប់ អាម៉ាស់ និងបាក់ទឹកចិត្តខ្លាំងណាស់»។
គួរបញ្ជាក់ថា ការឈឺចាប់របស់នាងកើតឡើងក្រោយពីនាងបានសរសេរបង្ហោះលើអាខោនហ្វេសប៊ុករបស់ខ្លួនកាលពីថ្ងៃទី១១ ខែកញ្ញា(មុនថ្ងៃលទ្ធផល១ថ្ងៃ) ថា «ថ្ងៃស្អែក ចេញលទ្ធផលបាក់ឌុប ប្រសិន ខ្ញុំជាប់និទ្ទេសA ត្រូវទទួលរង្វាន់ពី លោក ហ៊ុន សែនតើខ្ញុំត្រូវធ្វើយ៉ាងណា?។ ក្រោយពីការសរសេរបង្ហោះរួចមកនាងបានទទួលនូវការរិះគន់យ៉ាងខ្លាំងពីសំណាក់អ្នកលេងហ្វេសប៊ុក ក៏ដូចអ្នកដែលបានដឹងរឿងនេះ។ ក្រោយមកនៅថ្ងៃទី១២ ខែកញ្ញា នាងក៏បានសរសេរសុំទោសវិញផងដែរ ដោយលើកឡើងថា «សុំទោសបងប្អូន ចំពោះការផូសម្សិលមិញ “បើខ្ញុំនិទ្ទេសA តើខ្ញុំទទួលរង្វាន់ពី លោកហ៊ុន សែន រឺទេ?”នេះគ្រាន់តែជាសំណួរ លេងសើចតែប៉ុណ្ណោះ តាមអារម្មណ៍របស់ខ្ញុំ បើខ្លាំងខ្ញុំអាចត្រឹមជាប់និទ្ទេសC ឬDបើសំណេរខ្ញុំកែពិសេស ក៏អាចជាប់និទ្ទេសE ល្ងាចនេះ ខ្ញុំកំពុងចាំមើលលទ្ធផល »។ ប៉ុន្តែផ្ទុយទៅវិញកុំថាឡើយនិទ្ទេសA សូម្បីតែB, C, D, ឬE ក៏មិនបានជាប់ដូចការរំពឹងទុករបស់នាងផង។ ការឈឺចាប់ និងសោកស្ដាយរបស់នាងក៏បានបញ្ជាក់តាមរយៈការសរសេរបង្ហោះលើអាខោនហ្វេសប៊ុករបស់នាងកាលពីល្ងាចថ្ងៃទី១២ ម្សិលមិញផងដែរ ដោយលើកឡើងថា«សុំទោសបងប្អូន អ្នកគាំទ្រទាំងអស់គ្នា លទ្ធផលខ្ញុំ(ធ្លាក់) ពេលនេះខ្ញុំមិនអាចទប់ទឹកភ្នែកខ្លួនឯងបានទេ ខ្ញុំបានខំប្រឹងអស់លទ្ធភាពហើយ ឆ្នាំមុនខ្ញុំដឹងថា ៖កាប្រឡងតឹង ខ្ញុំបានខំរៀនតាំងពីដើមឆ្នាំ និងរៀនបំប៉នទាំងយប់ថ្ងៃជាច្រើន ខ្ញុំបានធ្វើកិច្ចការមនុស្សធម៌ច្រើន តែខ្ញុំធ្វើថ្ងៃឈប់សម្រាកប៉ុណ្ណោះ តែនៅទីបំផុត ខ្ញុំនៅតែ(ធ្លាក់) នេះគឺជាការឈឺចាប់ អាម៉ាស់បំផុត»។
ទោះជាយ៉ាងណាក៏ដោយកញ្ញាធីសុវណ្ណថា នៅមានសង្ឃឹមនៅឡើយ ព្រោះក្រសួងអប់រំយុវជននិងកីឡាបានសរសេរបង្ហោះលើហ្វេសប៊ុករបស់ខ្លួនថា «ក្នុងករណីមិនពេញចិត្តនឹងលទ្ធផលប្រឡងនេះបេក្ខជន មាតាបិតា អ្នកអាណាព្យាបាល ឬអ្នកពាក់ព័ន្ធដែលមិនពេញចិត្តនឹងលទ្ធផល នៃការប្រឡង មានសិទ្ធិប្ដឹងតវ៉ាក្នុងរយៈពេល៣០ (សាមសិប)ថ្ងៃ ចាប់ពីថ្ងៃប្រកាសលទ្ធផលប្រឡង។ ដោយអ្នកប្ដឹងតវ៉ាត្រូវសរសេរជាលាយលក្ខណ៍អក្សរត្រឹមត្រូវ មានភស្តុតាង មានឈ្មោះ មុខរបរ អាសយដ្ឋានច្បាស់លាស់ និងមានការទទួលខុសត្រូវចំពោះមុខច្បាប់ជាធរមាន។ ទំព័រហ្វេសប៊ុកខាងលើបានឲ្យដឹងបន្តថា ក្នុងករណីមានពាក្យបណ្ដឹង ឬពិនិត្យឃើញថា ការប្រឡងមានភាពមិនប្រក្រតីលើកិច្ចការរបស់បេក្ខជន និងលើការអនុវត្តភារកិច្ចរបស់គណៈមេប្រយោគ និងគណៈកម្មការផ្សេងៗ ក្រសួងត្រូវបង្កើត គណៈកម្មការកោសល្យវិច័យ»៕
ធីសុវណ្ណថា កំពុងឈឺចាប់ អាម៉ាស់ និងបាក់ទឹកចិត្តខ្លាំងណាស់
0 Comments