កំពង់ធំ ៖ លោកសេង អានប្រធានមន្ទីរទេសចរណ៍ខេត្តកំពង់ធំបានមានប្រសាសន៍ប្រាប់«កម្ពុជាថ្មី»ថា ប្រាសាទគុហនគរមានទីតាំងស្ថិតនៅក្នុងទឹកដីភូមិត្រដក់ ឃុំពង្រ ស្រុកបារាយណ៍ ខេត្តកំពង់ធំ ដែលមានចំងាយផ្លូវ៩៦គីឡូម៉ែត្រពីរាជធានីភ្នំពេញ ហើយប្រាសាទបុរាណដ៏ល្អវិចិត្រមួយនេះបច្ចុប្បន្នកំពុងត្រូវបានស្ថិតក្រោមការគ្រប់គ្រង អភិរក្សដោយឆ្មាំការពារប្រាសាទ និងខាងមន្ទីរវប្បធម៌និងវិចិត្រសិល្បៈខេត្តកំពង់ធំយ៉ាងយកចិត្តទុកដាក់បំផុត។
ប្រធានមន្ទីរទេសចរណ៍ខេត្តកំពង់ធំប្រាប់ឲ្យដឹងទៀតថា ប្រសិនបើភ្ញៀវទេសចរមកពីភ្នំពេញមានបំណងចង់មកទស្សនាប្រាសាទគុហនគរនោះ នៅពេលធ្វើដំណើរតាមផ្លូវជាតិលេខ៦ហួសព្រំប្រទល់ខេត្តកំពង់ចាមចូលដល់ទឹកដីខេត្តកំពង់ធំដល់ផ្សារតាំងគោកយើងនឹងបានឃើញខ្លោងទ្វារវត្តមួយឈ្មោះថា«វត្តគុហនគរ»នៅខាងឆ្វេងដៃ រួចបន្តដំណើរចូលតាមខ្លោងទ្វារវត្តនោះប្រហែលជា២គីឡូម៉ែត្រទៀតលោកអ្នកនឹងបានទៅដល់ប្រាសាទគុហនគរដែលស្ថិតនៅក្នុងបរិវេណនៃវត្តគុហនគរតែម្តង ដោយប្រាសាទនេះមានទ្រង់ទ្រាយប្រហាក់ប្រហែលគ្នានឹងប្រាសាទទន្លេបាទីដែលកសាងឡើងអំពីថ្មបាយក្រៀមក្នុងសតវត្សទី១១ក្នុងរជ្ជកាលព្រះបាទសូរ្យវរ្ម័នទី១។
លោកសេង អានបញ្ជាក់ថា ប្រាសាទគុហនគរជាប្រាសាទបុរាណមួយដ៏ល្អនៅខេត្តកំពង់ធំដែលជាទីចាប់អារម្មណ៍របស់ភ្ញៀវទេសចរ ជាពិសេសភ្ញៀវអន្តរជាតិទៅទស្សនានិងសិក្សាស្វែងយល់បន្ទាប់ពីប្រាសាទសំបូរព្រៃគុហ៍និងតំបន់ទេសចរណ៍ភ្នំសន្ទុក ប្រាសាទនេះកំពុងត្រូវបានយកចិត្តទុកដាក់ថែរក្សាការពារពីអាជ្ញាធរភូមិ ឃុំ ស្រុក គណៈកម្មការវត្ត ឆ្មាំការពារប្រាសាទនិងមន្ទីរវប្បធម៌វិចិត្រសិល្បៈខេត្តកំពង់ធំ ហើយប្រាសាទគុហគរត្រូវបានកសាងឡើងក្នុងរជ្ជកាលព្រះបាទសូរ្យវរ័ន្មទី១ក្នុងសតវត្សទី១១តាមរចនាប័ទ្មឃ្លាំង ដោយប្រាសាទនេះកសាងឡើងនៅលើដីរាបស្មើលើខឿនតែមួយរាងចតុកោណកែងធ្វើអំពីថ្មបាយក្រៀម និងថ្មភក់បែរមុខទៅទិសខាងកើតមានកំផែងព័ទ្ធជុំវិញលាតសន្ធឹងពីកើតទៅលិចមានបណ្តោយ៤៥ម៉ែត្រ និងទទឹង៣៥ម៉ែត្រព័ទ្ធជុំវិញដោយរបងថ្មបាយក្រៀមដែលមានកម្ពស់៣ម៉ែត្រ និងចែកចេញជាបីផ្នែកផ្នែកទី១មានកម្ពស់៨ម៉ែត្រផ្នែកទី២មានកម្ពស់១២ម៉ែត្រនិងផ្នែកទី៣មានកម្ពស់១៥ម៉ែត្រ។
បើតាមឯកសារដែលបានចងក្រងទុកឲ្យដឹងថា ប្រាសាទគុហនគរនេះមានគោបុរៈ(ទ្វារឆ្លងកាត់កំពែងប្រាសាទ)ចំនួនបីដោយគោបុរៈខាងកើតកម្ពស់៩ម៉ែត្រមានទ្វារចូលចំនួន៣កន្លែងគឺទ្វារកណ្តាលមានលក្ខណៈតូចចង្អៀត ហើយងងឹតបន្តិចនិងមាននៅសងខាងចំនួនពីរទៀត។ គោបុរៈខាងលិចមានទំហំតូចមានទ្វារមួយចូលទៅខាងក្នុងតែមិនអាចចេញវិញទៅខាងក្រៅបានទេនិងគគោបុរៈខាងត្បូងអែបជាប់នឹងព្រះវិហារមិនស្ថិតនៅចំកណ្ដាលកំពែងទេមានទ្វារចូលពីប្រាសាទទៅខាងក្នុងតែមិនអាចចេញខាងក្រៅកំពែងបានទេមានតែចង្អូរមួយដែលគេចោះទម្លុះជញ្ជាំងទៅខាងក្រៅសម្រាប់បង្ហូរទឹកមន្តនៅពេលគេធ្វើពិធីស្រោចទឹកនៅលើលិង្គ(ស្ថាណាទ្រោនី)។
ចំណែកឯនៅចំកណ្តាលមានប៉មខ្ពស់ទោលមួយមានបន្ទប់និងយ៉យ៉ាងវែងចេញទៅទិសខាងកើត ហើយនៅចំពីមុខមានសសរពេជ្ររាង៨ជ្រុងនៅសងខាង និងនៅផ្នែកខាងលើនៃសសរពេជ្រមានតុបតែងជាក្បាច់ខ្លួននាគព័ទ្ធកោងដោយបញ្ចេញក្បាលទៅខាងពាំផ្កាចន្ទន៍ ហើយនៅលើសសរពេជ្រនេះមានផ្ដែរមួយផ្ទាំងរចនាដោយក្បាច់ផុសល្អវិចិត្រ។ នៅចំកណ្តាលផ្តែរនោះមានរូបព្រះឥន្ទ្រជិះដំរីក្បាលបីឯតួប៉មកណ្តាលនេះត្រូវបានគេតុងតែងលំអចាប់ពីក្រោមរហូតដល់ខាងលើនិងនៅខាងលើកំពូលមានក្បាច់ត្របកឈូកច្រើនជាន់ដែលតំណាងឲ្យចក្រវាលទាំងមូល ហើយនៅក្បែរតួប៉មទិសអាគ្នេយ៍ក្បែរគោបុរៈខាងកើតមានហោត្រៃទោលមួយ (បណ្ណាល័យ)ធ្វើអំពីថ្មបាយក្រោយបែរមុខទៅទិសខាងលិចបញ្ច្រាសទិសប្រាសាទមានកម្ពស់មធ្យមសង់លើខឿនកម្ពស់១ម៉ែត្រ។
តាមការបញ្ជាក់ឲ្យដឹងបន្ថែមពីលោកសេង អាននិយាយថា នៅខាងកើតប្រាសាទមានស្ពានហាលមួយដែលក្រាលដោយថ្មបាយក្រៀមឆ្លងកាត់ស្រះដែលមើលទៅស្រះនេះហាក់ដូចជាគេជីកព័ទ្ធជុំវិញប្រាសាទតែក្រោយមកត្រូវបានលុបដើម្បីយកទីធ្លាសំរាប់កសាងវត្តទៅវិញ ដូច្នេះហើយបានជាគេមើលទៅឃើញថាតួប្រាសាទទាំងមូលហាក់ស្ថិតនៅក្នុងទីធ្លារបស់វត្តដោយកាលដើមឡើយនៅខាងមុខប្រាសាទនេះមានស្រះមួយយ៉ាងធំដែលទប់ទំនប់ព័ទ្ធជុំវិញហើយមានស្ពានហាលមួយពីទិសខាងលិចស្រះដែលតភ្ជាប់ពីតួប្រាសាទឆ្លងកាត់ស្ពានហាលនេះ តែបច្ចុប្បន្ននេះទំនប់ ស្រះ តួស្រះនិងទីធ្លាព័ទ្ធជុំវិញក្បែរៗនោះត្រូវបានក្លាយជាវាលកប់ខ្មោចទៅហើយ។
នៅតំបន់ទេសចរណ៍វប្បធម៌ប្រវត្តិសាស្ត្រប្រាសាទគុហនគរនេះដែរត្រូវបានលោកសេង អានប្រធានមន្ទីរទេសចរណ៍ខេត្តកំពង់ធំឲ្យដឹងថា ប្រសាទបុរាណនេះសព្វថ្ងៃមានភ្ញៀវទេសចរជាតិនិងអន្តរជាតិមកទស្សនាច្រើន ពិសេសថ្ងៃឈប់សម្រាកឬបុណ្យទានផ្សេងៗ ហើយនៅប្រាសាទគុហនគរនេះក៏ជាទីកន្លែងសក្តារៈសំរាប់គោរពបូជាដ៏ស័ក្ដិសិទ្ធិផងដែរ៕
ប្រាសាទគុហនគរជាតំបន់ទេសចរណ៍ប្រវត្តិសាស្ត្រកំពុងត្រូវបានអភិរក្ស
0 Comments