ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជាបានមានប្រសាសន៍ថា ក្នុងឋានៈជាសមាជិកនៃគ្រួសារមហាអនុតំបន់មេគង្គ និងនៃសហគមន៍អាស៊ាន កម្ពុជាមានការប្ដេជ្ញាចិត្តយ៉ាងមោះមុតក្នុងការរួមចំណែកជាមួយនឹងគ្រប់បណ្ដាប្រទេសពាក់ព័ន្ធ ដើម្បីជំរុញអនុវត្តគម្រោងនានានៅក្នុងក្របខ័ណ្ឌនៃគំនិតផ្ដួចផ្ដើម«ក្រវាត់សេដ្ឋកិច្ច និងវិថីសូត្រ» នេះ ឲ្យក្លាយជាការពិត សំដៅសម្រេចឲ្យបាននូវ«សតវត្ស និងក្ដីស្រមៃអាស៊ី» ដែលជាបំណងប្រាថ្នារួមរបស់យើងទាំងអស់គ្នា។
ក្នុងសន្និសីទអន្តរជាតិនៃគណបក្សនយោបាយប្រចាំតំបន់អាស៊ី ដែលរៀបចំឡើងដោយបក្សកុម្មុយនិស្តចិន ស្ដីពី«ការកសាងឡើងវិញនូវវិថីសូត្រ» កាលពីថ្ងៃទី១៤ ខែតុលា ឆ្នាំ២០១៥ នៅទីក្រុងប៉េកាំង សម្ដេចតេជោថ្លែងថា កម្ពុជា និងបណ្ដាប្រទេសតាមដងទន្លេមេគង្គ មានចំណងទាក់ទងដ៏យូរលង់មកហើយជាមួយប្រទេសចិន។ យើងទាំងអស់គ្នាបានទទួលផលប្រយោជន៍ជាអនេកពីទន្លេមេគង្គ ដែលតាមរយៈនេះ យើងក៏បានចែករំលែកផងដែរនូវសន្តិភាព សន្តិសុខ ស្ថិរភាព រួមទាំងប្រវត្តិសាស្ត្រ និងវាសនារួមគ្នា។ ទន្លេមេគង្គ ផ្ដល់ទឹកដ៏មានសារៈប្រយោជន៍ និងដីដ៏មានជីជាតិ ដែលអាចបម្រើផលប្រយោជន៍ ជាជង្រុកសម្រាប់ធានាសុវត្ថិភាព ស្បៀងនៅក្នុងតំបន់។ ភាពសម្បូរបែបនៃមរតកវប្បធម៌ និងធម្មជាតិ បានផ្ដល់ឱកាស និងតម្លៃសម្រាប់ការត.ភ្ជាប់ រវាងប្រជាជន និងប្រជាជន និងការចែករំលែកវប្បធម៌ជាមួយគ្នាដែលអាចផ្សព្វផ្សាយបានវែងឆ្ងាយដោយវិថីសូត្រ។ មានពាក្យសុភាសិតចិនដ៏ល្បីល្បាញមួយបានលើកឡើងថា «ដំណើររាប់ពាន់ជំហានដែលសម្រេចដល់គោលដៅបាន គឺត្រូវតែចាប់ផ្ដើមពីជំហានដំបូងដែលប្រកបដោយជោគជ័យ»។ ក្នុងន័យនេះ កិច្ចសហប្រតិបត្តិការនៃតំបន់ទន្លេមេគង្គអាចជាជំហានជោគជ័យដំបូងមួយនៃទស្សនាទាន«ក្រវាត់សេដ្ឋកិច្ច និងវិធីសូត្រ»។ ដូចនេះ តំបន់នេះគួរតែមានឥទ្ធិពលនៅក្នុងការពិចារណារបស់យើងក្នុងការអនុវត្តគំនិតផ្ដួចផ្ដើមនេះ។ ខណៈទឹកទន្លេមេគង្គបាននិងកំពុងបន្តផ្ដល់ផលប្រយោជន៍យ៉ាងច្រើនដល់បណ្ដាប្រទេសពាក់ព័ន្ធ ខ្ញុំរំពឹងថា សាធារណរដ្ឋប្រជាមានិតចិន នឹងផ្ដល់អាទិភាពពិសេសដល់ការអភិវឌ្ឍអាងទន្លេមេគង្គនៅក្នុងបរិការណ៍នៃការអនុវត្តគំនិតផ្ដួចផ្ដើមវិថីសូត្រនេះ ដើម្បីវឌ្ឍនភាព និងបុលភាពរួមគ្នា។ សរុបសេចក្ដីមកវិញ កម្ពុជាសូមសម្ដែងនូវអំណរសាទរអស់ពីដួងចិត្ត និងការគាំទ្រពេញទំហឹងចំពោះសាធារណរដ្ឋប្រជាមានិតចិន ដែលបានផ្ដួចផ្ដើមដាក់ចេញនូវទស្សនាទាន«វិថីសូត្រ»នេះ ដើម្បីគោលដៅសន្តិភាព សន្តិសុខ ការត.ភ្ជាប់ កិច្ចសហប្រតិបត្តិការ និងវិបុលភាពចម្រើនរុងរឿងនៃបណ្ដាប្រទេសនៅក្នុងតំបន់ដែលមានវិសាលភាពដ៏ទូលំទូលាយ។
សម្ដេចតេជោនាយករដ្ឋមន្ត្រីគូសបញ្ជាក់ថា តាមរយៈគោលនយោបាយ «ឈ្នះ-ឈ្នះ» របស់រាជរដ្ឋាភិបាលកម្ពុជានៅចុងទសវត្សរ៍ឆ្នាំ១៩៩០ បានបង្កើតឡើងនូវកាលានុវត្តភាពដែលមិនធ្លាប់មានពីមុនមក សម្រាប់ការកែទម្រង់ក្នុងគ្រប់វិស័យ ដែលធ្វើឲ្យសាធារណជនកាន់តែមានជំនឿ និងទំនុកចិត្តជាងមុន ជាពិសេសវិស័យឯកជនទាំងក្នុងស្រុក និងក្រៅស្រុក ក្នុងការដាក់ទុនវិនិយោគរបស់ខ្លួននៅកម្ពុជា ដែលនិន្នាការនេះកំពុងតែបន្តស្ថិតក្នុងស្ថានភាពរឹងមាំ។ លទ្ធផលទាំងនេះសម្រេចបានដោយសារកត្តាជាច្រើន ពិសេសស្ថិរភាពនយោបាយ សន្តិសុខល្អប្រសើរ ភាពកាន់តែប្រសើរឡើងនៃបរិយាកាសវិនិយោគ កម្លាំងពលកម្មវ័យក្មេង ដែលមានចំនួនច្រើន និងមានតម្លៃសមរម្យ ការផ្ដល់កូតា និងការលើកលែងពន្ធពីទីផ្សារធំៗ និងការរីកលូតលាស់នៃទំហំទីផ្សារដែលបណ្ដាលមកពីការកើនឡើងនៃចំណូល និងសមាហរណកម្មសេដ្ឋកិច្ច។
ជាក់ស្ដែង នៅក្នុងរយៈកាល២ទសវត្សរ៍ចុងក្រោយនេះ សេដ្ឋកិច្ចកម្ពុជាសម្រេចបានកំណើនជាមធ្យមប្រមាណ៧,៧% ក្នុងមួយឆ្នាំ ដែលត្រូវបានធនាគារពិភពលោកចាត់ទុកជាប្រទេសទី៦ ក្នុងចំណោមឯកទក្ករកំណើន ទាំង៨ នៅលើសកលលោក។ លើមូលដ្ឋាននេះ អត្រាភាពក្រីក្រ ត្រូវបានកាត់បន្ថយពី៥៣,២% នៅឆ្នាំ២០០៤ មកត្រឹម១៣,៥% នៅឆ្នាំ២០១៤ ដែលធ្វើឲ្យកម្ពុជាទទួលបានចំណាត់ថ្នាក់ជាប្រទេសជោគជ័យបំផុតទី៤ លើពិភពលោក ក្នុងការកាត់បន្ថយភាពក្រីក្រ។
ដើម្បីធានាចីរភាពនៃកំណើនខ្ពស់នេះ រាជរដ្ឋាភិបាលបានបង្កើនកិច្ចខិតខំប្រឹងប្រែងរបស់ខ្លួនក្នុងការធ្វើពិពិធកម្មសេដ្ឋកិច្ច ដែលក្នុងពេលបច្ចុប្បន្នពឹងផ្អែកលើវិស័យមួយចំនួនតូចដូចជា វិស័យកាត់ដេរ សំណង់ ទេសចរណ៍ និងអចលនទ្រព្យ ព្រមទាំងវិស័យកសិកម្ម។ ដើម្បីសម្រេចកិច្ចការនេះ រាជរដ្ឋាភិបាលបានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្ម២០១៥-២០២៥ ដែលនឹងដើរតួនាទីជាយុទ្ធសាស្ត្រកំណើនថ្មីរបស់កម្ពុជា ក្នុងការបន្តលើកកម្ពស់កំណើនសេដ្ឋកិច្ចប្រកបដោយចីរភាព និងបរិយាប័ន្នក្នុងរយៈពេលវែងផងដែរ។
សម្ដេចគូសបញ្ជាក់ទៀតថា ជាទស្សនវិស័យនៃកំណើនសម្រាប់រយៈពេលវែង កម្ពុជាកំពុងតែឈោងឆ្ពោះទៅចាប់យកនូវកាលានុវត្តភាពថ្មីចំពោះមុខរួមមានការចូលមកដល់នៃសហគមន៍សេដ្ឋកិច្ចអាស៊ានក្នុងដំណាច់ឆ្នាំនេះ ការបង្កើតឡើងនូវធនាគារអភិវឌ្ឍន៍ថ្មី BRICS ការបង្កើតធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដែលកម្ពុជាជាសមាជិកស្ថាបនិកមួយនៅក្នុងនេះដែរ ព្រមទាំងផ្ដួចផ្ដើមគំនិតរបស់ប្រទេសចិនស្ដីពី «ក្រវាត់សេដ្ឋកិច្ច និងវិថីសូត្រ»ព្រមទាំងគម្រោង និងមូលនិធិពាក់ព័ន្ធនានាជាអាទិ៍ មូលនិធិវិថីសូត្រ ( Silk Road Fund ) មូលនិធិសហប្រតិបត្តិការដែនសមុទ្រចិន-អាស៊ាន (China-ASEAN Maritime Cooperation Fund ) ។ល។ បន្ថែមលើនេះ ក្នុងទិសដៅធានាទទួលបាននូវផលប្រយោជន៍សមស្របពីគំនិតផ្ដួចផ្ដើម «ក្រវាត់សេដ្ឋកិច្ចនិងវិថីសូត្រ»នេះ រាជរដ្ឋាភិបាលកម្ពុជាក៏បានប្រកាន់នូវជំហរបុរេសកម្មក្នុងការសម្របសម្រួលរវាងគំនិតផ្ដួចផ្ដើមនេះ ជាមួយនឹង «យុទ្ធសាស្ត្រចតុកោណ» «ផែនការយុទ្ធសាស្ត្រអភិវឌ្ឍន៍ជាតិ» ព្រមទាំងឯកសារចក្ខុវិស័យអភិវឌ្ឍន៍ប្រទេសសម្រាប់រយៈពេលវែងរបស់យើងផងដែរ៕
សម្ដេចតេជោ ៖ កម្ពុជាប្ដេជ្ញាយ៉ាងមោះមុតក្នុងការអនុវត្តគំនិតផ្ដួចផ្ដើម«ក្រវាត់សេដ្ឋកិច្ច និងវិថីសូត្រ» ឲ្យក្លាយជាការពិត
0 Comments