ភ្នំពេញ ៖ លោកតាអាចារ្យម្នាក់ត្រូវបានរថយន្តបុកស្លាប់យ៉ាងអាណោចអាធ័មនៅលើផ្លូវជាតិលេខ៦ ខណៈជិះម៉ូតូស្របទិសគ្នាកាលពីវេលាម៉ោង១៤និង៣០នាទីរសៀល ថ្ងៃទី១៥ ខែតុលា ឆ្នាំ២០១៥ នៅចំណុចមុខសាលាសង្កាត់ព្រែកលៀប ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះឈ្មោះ នូ ធួន អាយុ៨៨ឆ្នាំ ជាអាចារ្យវត្តវ៉ារិន ហៅវត្តព្រែកលៀប មានទីលំនៅនៅភូមិសង្កាត់កើតហេតុខាងលើ រីឯរថយន្តបង្កម៉ាកអេសសាំយ៉ុងពណ៌លឿង ពាក់ស្លាកលេខភ្នំពេញ 2P 1654 ចំណែកឯអ្នកបើកបរក្រោយពីបុកជាប់ម៉ូតូអូសចម្ងាយ៥០ម៉ែត្ររួច ចុះដាក់មេប្រូចបាត់ស្រមោលតែម្ដង។
តាមប្រភពព័ត៌មានពីក្រុមគ្រួសារបានដឹងថា នៅវេលាកើតហេតុខាងលើ ជនរងគ្រោះបានជិះម៉ូតូគុបមូល គ្មានស្លាកលេខ ចេញទៅហូបកាហ្វេនៅម្តុំផ្សារព្រែកក្វិតដូចសព្វដង ដោយជិះម្នាក់ឯងតាមបណ្ដោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុ ជនរងគ្រោះជិះសសៀរឆ្លងផ្លូវបទឆ្វេង ខណៈនោះក៏មានរថយន្តបង្កបើកបរស្របទិសក្នុងល្បឿនយ៉ាងលឿនបានបុកម៉ូតូជនរងគ្រោះចំពីក្រោយពេញទំហឹង បណ្ដាលឲ្យប៉ើងជនរងគ្រោះធ្លាក់បោកទៅថ្នល់បែកក្បាលស្លាប់ភ្លាមៗនៅនឹងកន្លែងកើតហេតុ ចំណែកឯរថយន្តបង្កពេលបុកគាបម៉ូតូអូសទៅមុខប្រហែលជិត៥០ម៉ែត្រ ទើបបើកអែបចិញ្ចើមឈប់ ហើយអ្នកបើកបរបើកទ្វាររត់បាត់ស្រមោល។
ក្រោយពេលកើតហេតុសមត្ថកិច្ចបានចុះទៅកន្លែងកើតហេតុធ្វើការវាស់វែង និងយករថយន្តបង្ក និងម៉ូតូយកមករក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំការដោះស្រាយគ្នាទៅតាមផ្លូវច្បាប់ រីឯសពលោកតាអាចារ្យត្រូវបានប្រគល់ឲ្យក្រុមគ្រួសារយកទៅធ្វើបុណ្យទៅតាមប្រពៃណី៕
លោកតាអាចារ្យវត្តវ៉ារិនអាយុ៨៨ឆ្នាំត្រូវរថយន្តបុកស្លាប់
0 Comments