ស្ទឹងត្រែង ៖ មានការភ្ញាក់ផ្អើលមួយបានឡើងដោយសារគេប្រទះឃើញលោកតាម្នាក់បានដេកផ្កាប់មុខស្លាប់នៅចំណុចមាត់ត្រពាំងទឹកមួយកន្លែងកាលពីវេលាម៉ោង១០និង៣០នាទីព្រឹក ថ្ងៃទី១៤ ខែតុលា ឆ្នាំ២០១៥ ស្ថិតក្នុងភូមិញ៉ាងស៊ុម ឃុំថ្មកែវ ស្រុកសៀមប៉ាង ខេត្តស្ទឹងត្រែង ខណៈលោកតាបានយកលបទៅដាក់ត្រីក្នុងត្រពាំងបណ្តាលឲ្យរអិលដួលផ្កាប់មុខឈ្លោះទឹកស្លាប់តែម្ដង។
លោក វ៉ា សុផាន់ អធិការស្រុកសៀមប៉ាងបានឲ្យដឹងថា លោកតាដែលលង់ទឹកត្រពាំងស្លាប់នោះឈ្មោះ សើយ កង ភេទប្រុស អាយុ៧៥ឆ្នាំ រស់នៅញ៉ាងស៊ុំ ឃុំថ្មកែវ ស្រុកសៀមប៉ាង ខេត្តស្ទឹងត្រែង។
លោកអធិការបានបន្តទៀតថា នៅព្រឹកថ្ងៃកើតហេតុ លោកតាបានយកលបទៅដាក់ត្រីនៅត្រពាំងមួយកន្លែង ក្បែរភូមិដើម្បីយកមកធ្វើម្ហូប និងខ្លះទៀតយកទៅលក់ដើម្បីផ្គត់ផ្គង់ជីវភាពគ្រួសារ តែដោយបាត់លោកតាជិតមួយព្រឹកមិនដឹងទៅណា? ស្រាប់តែនៅម៉ោងកើតហេតុខាងលើ ក៏ត្រូវបានគេប្រទះឃើញលោកតាដេកផ្កាប់មុខនៅនឹងទឹកត្រពាំងស្លាប់ ធ្វើឲ្យមានការភ្ញាក់ផ្អើលដល់សមត្ថកិច្ចចុះពិនិត្យមើលតែម្តង។
លោកអធិការបន្តថា តាមការចុះស្រាវជ្រាវរបស់សមត្ថកិច្ចឃើញថាលោកតាបានយកលបទៅដាក់ត្រី តែដោយសារលោកតាមានវ័យចំណាស់ កម្លាំងខ្សោយ ក៏បានរអិលជើងដួលផ្កាប់មុខ ទៅក្នុងទឹកត្រពាំងងើបមិនរួច ក៏បណ្ដាលឲ្យឈ្លក់ទឹកស្លាប់បាត់បង់ជីវិតតែម្ដង។ ស្ថិតក្រោមការត្រួតពិនិត្យរបស់សមត្ថកិច្ចឃើញថា ការស្លាប់របស់លោកតាមិនមានការពាក់ព័ន្ធក្នុងករណីឃាតកម្ម ឡើយ ហើយសមត្ថកិច្ចក៏បានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណីផងដែរ៕
លោកតាម្នាក់យកលបទៅដាក់ត្រីរអិលផ្កាប់មុខឈ្លោះទឹកស្លាប់
0 Comments