សៀមរាប ៖ សណ្ឋាគារ The Luxury ត្រូវបានអគ្គិភ័យឆាបឆេះអស់មួយបន្ទប់ ដោយគេបានដាក់ការសង្ស័យថា ទុស្សេខ្សែភ្លើង តែសំណាងល្អត្រូវបានអ្នកជិតខាងជួយពន្លត់ទាន់ពេល រីឯក្រុមភ្ញៀវបានរត់ចេញទាន់។
ហេតុការណ៍បង្កឲ្យមានការភ្ញាក់ផ្អើលទាំងព្រឹកនេះ កើតឡើងកាលពីវេលាម៉ោង៩ព្រឹកថ្ងៃទី១៥ខែតុលាឆ្នាំ២០១៥ ស្ថិតនៅចំណុចជាប់របងអតីតមន្ទីរអប់រំយុវជន និងកីឡាខេត្ត ក្នុងក្រុមទី១៤ ភូមិ វិហារចិន សង្កាត់ស្វាយដង្គំ ក្រុងសៀមរាប។
តាមសម្ដីពីម្ចាស់សណ្ឋាគារបានប្រាប់ថា មុនពេលកើតហេតុលោកមិនបានដឹងថា មានភ្លើងឆេះចេញពីបន្ទប់នោះទេ ព្រោះបន្ទប់ដែលឆេះនេះ គ្មានភ្ញៀវស្នាក់នៅក្នុងនោះទេ ហើយគាត់បានដោតកង្ហារទុកនៅក្នុងបន្ទប់នោះចោល ស្រាប់តែហុយផ្សែងចេញពីក្នុងបន្ទប់ជាន់ក្រោមនោះខ្ញុំសន្និដ្ឋានថាមកពីទុស្សេខ្សែកង្ហារនោះ ទើបខ្ញុំបានទូរស័ព្ទទៅប្រាប់សមត្ថកិច្ចឲ្យមកជួយអន្តរាគមន៍ ដើម្បីហៅឡានទឹក ប៉ុន្តែមួយសន្ទុះក្រោយមក នៅមិនឃើញឡានទឹករបស់នគរបាល រហូតដល់ឆេះហុយខ្លាំងទៅៗគ្មាននរណាចូលបាន ដើម្បីពន្លត់បានឡើយ មានតែប្រើបំពង់បាញ់ពន្លត់អស់ចំនួន១០បំពង់ហើយ ទើបឃើញឡានទឹករបស់កងរាជអាវុធហត្ថខេត្តមកដល់ជួយបាញ់ពន្លត់បានដោយ ជោគជ័យ។
សមត្ថកិច្ចបានបញ្ជាក់ថា ម្ចាស់សណ្ឋាគារមានឈ្មោះ សាំង វិទូ ភេទប្រុសអាយុ៤៥ឆ្នាំរស់នៅភូមិ សង្កាត់កើតហេតុខាងលើ។ ចំណែកសម្ភារៈខូចខាតដែលត្រូវឆេះដោយសារទុស្សេខ្សែភ្លើងនៅក្នុងបន្ទប់គ្មានភ្ញៀវដេកនោះមានៈពូក១,ភួយ១,កន្លែងពោះគោ និងកង្ហារចំនួន១ផងដែរ។ ប៉ុន្តែគ្មានប៉ះពាល់ដល់ភ្ញៀវដែលបានចូលគេងនៅបន្ទប់ផ្សេងៗទេ។ ពលរដ្ឋស្នើឲ្យខាងរថយន្តពន្លត់អគ្គិភ័យខេត្ត
សៀមរាប ត្រូវមានឆន្ទៈចុះមកជួយសង្គ្រោះឲ្យទាន់ពេល និងជៀសវាងលួចទាមទារលុយស្ងាត់ៗជាថ្នូរនឹងការមកជួយសង្គ្រោះ៕
ទុស្សេខ្សែភ្លើងសណ្ឋាគារLuxuryឆេះអស់មួយបន្ទប់ សំណាងល្អសង្គ្រោះទាន់
0 Comments