ភ្នំពេញ ៖ ប្រធានក្រុមអភិរក្សថ្មរបស់អាជ្ញាធរជាតិអប្សរាបានមានប្រសាសន៍ថា ថ្មដែលមានអាយុកាលយូរដូចជា ថ្មប្រាសាទជាដើមដែលមានភាពពុកផុយត្រូវការការជួសជុល ដើម្បីពង្រឹងសាច់ថ្មឡើងវិញប្រៀបដូចជា មនុស្សឈឺអស់កម្លាំង ឬមនុស្សចាស់មានកម្លាំងខ្សោយត្រូវការថ្នាំជំនួយកម្លាំងដូច្នោះដែរ។
លោកឡុង ណារីប្រធានក្រុមអភិរក្សថ្មរបស់អាជ្ញាធរជាតិអប្សរាមានប្រសាសន៍បែបនេះនៅក្នុងឱកាសដែលលោក និងក្រុមការងារកំពុងតែបាញ់ថ្នាំតាមបំពង់សេរ៉ូមចូលទៅក្នុងសាច់ថ្មបង្កាន់ដៃនាគដែលលោកកំពុងជួសជុលនៅប្រាសាទបន្ទាយសំរែ។ នេះបើយោងតាមការចេញផ្សាយរបស់គេហទំព័រអាជ្ញាធរជាតិអប្សរានៅថ្ងៃទី១៦ ខែតុលាដែលកាសែតកម្ពុជាថ្មីទើបនឹងទទួលបាននៅវេលាម៉ោង៧ព្រឹកថ្ងៃទី១៧ ខែតុលានេះ។ លោកឡុង ណារីបន្តថា ក្នុងថ្មមានជាតិស៊ីលីកាតដែលភ្ជាប់គ្រាប់ល្អិតៗនៃថ្មឲ្យមានភាពរឹងមាំ ប៉ុន្តែសារជាតិនេះនឹងថមថយបន្តិចម្តងៗនៅពេលដែលមានអាយុកាលកាន់តែច្រើន។ បើពុំមានថ្នាំចូលទៅពង្រឹងឡើងវិញទេ ថ្មផុយនេះនឹងចាប់ផ្តើមផុយរបេះបណ្ដើរៗ ហើយធ្លាក់បាក់ដូចដែលយើងធ្លាប់ឃើញកន្លងមក។
លោករៀបរាប់បន្តថា ថ្នាំដែលបាញ់បញ្ចូលទៅព្យាបាលថ្មនេះផ្សំឡើងពីអាកុល និងជាតិស៊ីលីកាត ដូចគ្នានឹងសារជាតិដែលមានស្រាប់ក្នុងស្រទាប់ថ្ម។ ក្រោយពេលបាញ់ថ្នាំបញ្ចូលទៅជាតិអាកុលនឹងរសាត់អស់នៅសល់តែជាតិស៊ីលីកាតដែលចូលទៅចាប់គ្រាប់ល្អិតៗនៃថ្មធ្វើឲ្យថ្មរឹងមាំឡើងវិញ។ ការចាក់ថ្នាំបញ្ចូលថ្មនេះ បើធ្វើចំពោះថ្មប្រាសាទធំៗត្រូវចំណាយពេលយូរទើបត្រូវព្យួរសេរ៉ូមទុកចោលរាប់ម៉ោងដូចជាដាក់សេរ៉ូមឲ្យមនុស្សឈឺដែរ។
ទាក់ទងនឹងគុណភាពវិញលោកបញ្ជាក់ថា បើនៅស្រុកគេដែលមានអាកាសធាតុត្រជាក់ដូចជា ប្រទេសអាល្លឺម៉ង់ជាដើមដែលបានប្រើប្រាស់ថ្នាំប្រភេទនេះចាក់ម្តងវាអាចជួយពង្រឹងថ្មបានដល់ទៅ៣០ឆ្នាំតែចំពោះស្រុកខ្មែរវិញ ដែលមានអាកាសធាតុក្តៅផង ត្រជាក់ផងផ្លាស់ប្ដូរគ្នាខ្លាំងៗបែបនេះ អាចមិនដល់៣០ឆ្នាំទេ។ តែទោះជាយ៉ាងណាបើរូបចម្លាក់ដែលស្ថិតនៅក្នុងទីម្លប់ដូចជាក្នុងសារមន្ទីរជាដើមវាអាចមានប្រសិទ្ធភាពច្រើនជាង៣០ឆ្នាំទៅទៀត។ អ្នកជំនាញជួសជុលថ្មដែលមានបទពិសោធន៍ជិត២០ឆ្នាំរូបនេះរៀបរាប់ថា ការអភិរក្សថ្មមិនខុសពីការថែរក្សាមនុស្សចាស់នោះទេពោលគឺឈឺមិនចេះឈប់។ តែទោះជាយ៉ាងណាក៏យើងនៅតែព្យាយាមបណ្តុះបណ្តាលមនុស្សក្មេងៗជំនាន់ក្រោយទៅទៀត ដើម្បីបន្តការងារណាដែលយើងមិនអាចបញ្ចប់បាន៕
ការជួសជុលភាពពុកផុយនៃប្រាសាទត្រូវការការព្យាបាលដូចជាមនុស្សដែរ
0 Comments