ភ្នំពេញ ៖ បុរសម្នាក់បានរងរបួសដោយសាររថយន្តស្រីស្អាតបើកបុកទាំងកំរោល រួចព្យាយាមបើកគេចមិនទទួលខុសត្រូវ តែគេចមិនរួច ក៏ត្រូវប្រជាពលរដ្ឋចាប់ប្រគល់ឲ្យសមត្ថកិច្ចចាត់ការតាមផ្លូវច្បាប់។
គ្រោះថ្នាក់នេះបានកើតឡើងកាលពីម៉ោងប្រមាណ២១និង៣០នាទីយប់ ថ្ងៃទី១៦ ខែតុលា ឆ្នាំ២០១៥ នៅចំណុចម្តុំរោងកុនគិរីរម្យ ផ្លូវព្រះសីហនុ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។
សាក្សីបានឲ្យដឹងថា នៅមុនពេលកើតហេតុគេឃើញរថយន្តស៊េរីទំនើបមួយគ្រឿងពាក់ស្លាកលេខ 2AE-7439 បើកបរដោយនារីម្នាក់បានធ្វើដំណើរតាមផ្លូវព្រះសីហនុក្នុងល្បឿនលឿន លុះដល់ចំណុចរោងកុនគិរីរម្យបានជ្រុលទៅបុកម៉ូតូទាំងកំរោល បណ្ដាលឲ្យរងរបួសភាគីម៉ូតូក្លីច ជិះ២នាក់ រងរបួសស្រាល ប៉ុន្តែក្រោយពីកើតហេតុរថយន្តដែលបើកបរដោយស្ត្រីវ័យជាង២០ឆ្នាំនោះ មិនបានឈប់ដោះស្រាយទេ គឺបានព្យាយាមបើកគេចរហូតដល់ចំណុចផ្លូវលេខ១១១ ក្នុងសង្កាត់បឹងព្រលឹត ខណ្ឌ៧មករា ត្រូវបានប្រជាពលរដ្ឋស្ទាក់ចាប់បាន ហើយក៏ត្រូវកម្លាំងអាវុធហត្ថខណ្ឌ៧មករាចុះទៅកាន់កន្លែងកើតហេតុដើម្បីអន្តរាគមន៍ និងដោះស្រាយតាមផ្លូវច្បាប់៕
នារីវ័យក្មេងបើករថយន្តបុកអ្នកជិះម៉ូតូបណ្ដាលឲ្យរបួស រួចព្យាយាមបើកគេច
0 Comments