ក្រសួងការពារជាតិរបស់ប្រទេសរុស្ស៊ីបាននិយាយថា ខ្លួននឹងចុះហត្ថលេខាលើកិច្ចព្រមព្រៀងស្ដីពីសុវត្ថិភាពហោះហើរក្នុងពេលឆាប់ៗនេះនៅលើប្រទេសស៊ីរីជាមួយនិងមន្ទីរបញ្ចកោណបន្ទាប់ពីភាគីទាំងពីរបានព្រមព្រៀងគ្នានៅលើគ្រប់បញ្ហាបច្ចេកទេសដែលចាំបាច់ទាំងអស់។
លោកវរសេនីយ៍ឯក Andrey Kartapolov បានប្រាប់អ្នកសារព័ត៌មានកាលពីថ្ងៃសុក្រថា “បញ្ហាបច្ចេកទេសទាំងអស់ត្រូវបានយល់ព្រមរួចហើយជាមួយរុស្ស៊ី ហើយមេធាវីរបស់សហរដ្ឋអាមេរិកនៅពេលនេះកំពុងពិនិត្យមើលអត្ថបទនៃឯកសារនេះ”។
យោងតាមលោក Kartapolov បានឲ្យដឹងថា អនុស្សរណៈស្ដីពីសុវត្ថិភាពការហោះហើរលើប្រទេសស៊ីរីនឹងត្រូវបានចុះហត្ថលេខាដោយទីក្រុងមូស្គូ និងទីក្រុងវ៉ាស៊ីនតោនក្នុងពេលយ៉ាងឆាប់ខាងមុខ។
លោកបានបន្ថែមថា ក្រសួងការពារជាតិ និងមន្ទីរបញ្ចកោណបានធ្វើសន្និសីទតាមវីដេអូចំនួនបីរួចទៅហើយក្នុងការពិភាក្សាគ្នាអំពីកិច្ចព្រមព្រៀងនេះ។
លោក Kartapolov បានសង្កត់ធ្ងន់ថា “កិច្ចព្រមព្រៀងនេះនឹងផ្តល់នូវលក្ខខណ្ឌសម្រាប់ការការពារនៃស្ថានភាពជាក់លាក់ដែលអាចបណ្ដាលឲ្យទៅជាប្រភេទនៃគ្រោះថ្នាក់មួយចំនួនក្នុងដែនអាកាសស៊ីរីក្នុងអំឡុងពេលប្រតិបត្តិការផ្លូវអាកាសដោយប្រទេសរុស្ស៊ីនិងប្រទេសដៃគូចម្រុះ” ។
លោកបានបន្ថែមទៀតថា ក្រុងមូស្គូត្រៀមខ្លួនរួចជាស្រេច ដើម្បីពង្រីកកិច្ចសហប្រតិបត្តិការលើការជៀសវាងការប៉ះទង្គិចគ្នានៅលើមេឃលើប្រទេសស៊ីរីជាមួយអាមេរិក និងភាគីពាក់ព័ន្ធផ្សេងទៀតទាំងអស់។
លោក Kartapolov បានឲ្យដឹងថា ក្រសួងការពារជាតិបានបង្កើតទំនាក់ទំនងដោយផ្ទាល់ជាមួយយោធាប្រទេសទួរគី ដើម្បីជៀសវាងឧប្បត្តិហេតុការហោះហើររបស់រុស្ស៊ីនៅជិតព្រំដែនទួរគី។
កាលពីព្រឹកថ្ងៃសុក្រកងយោធាប្រទេសទួរគីបាននិយាយថា ខ្លួនបានបាញ់ធ្លាក់យន្តហោះគ្មានមនុស្សបើកមួយគ្រឿងនៅតាមបណ្តោយព្រំដែនស៊ីរី។
ជាមួយគ្នានោះខ្សែទូរស័ព្ទ hotline រវាងមូលដ្ឋានកងទ័ពអាកាសរុស្ស៊ីនៅក្នុងប្រទេសស៊ីរី និងមជ្ឈមណ្ឌលបញ្ជាការកងទ័ពអាកាសរបស់អ៊ីស្រាអែលក៏ត្រូវបានបង្កើតឡើងផងដែរក្នុងគោលបំណង ដើម្បីសម្របសម្រួលការហោះហើរលើប្រទេសស៊ីរី។
លោក Kartapolov បានបញ្ជាក់ថា កាលពីថ្ងៃព្រហស្បតិ៍ និងថ្ងៃសុក្រ រុស្ស៊ី និងអ៊ីស្រាអែលបានរៀបចំធ្វើការបណ្តុះបណ្តាលរួមគ្នា ដើម្បីបញ្ចៀសឧប្បត្តិហេតុក្នុងដែនអាកាសស៊ីរី៕
RT
រុស្ស៊ី និងអាមេរិកព្រមព្រៀងគ្នាលើបញ្ហាបច្ចេកទេសទាំងអស់ស្ដីពីសុវត្ថិភាពហោះហើរនៅស៊ីរី
0 Comments