ភ្នំពេញ ៖ ក្រុមក្មេងទំនើង២នាក់ត្រូវកម្លាំងនគរបាលប៉ុស្តិ៍ចតុមុខ និងជនរងគ្រោះនាំគ្នាដេញតាមចាប់បានភ្លាមៗ ខណៈដែលពួកគេបានជិះម៉ូតូ១គ្រឿងធ្វើសកម្មភាពយកខ្សែក្រវាត់មកវាយទៅលើជនរងគ្រោះកំពុងជិះម៉ូតូជាមួយមិត្តភ័ក្ដិ២នាក់ទៀត បណ្ដាលឲ្យរបួសបែកក្បាល ហើយព្យាយាមរត់គេចខ្លួនតែគេចមិនផុត ត្រូវជាប់ខ្នោះដៃរបស់សមត្ថកិច្ច។ ករណីឃាត់ខ្លួនជនសង្ស័យខាងលើនេះ បានកើតឡើងកាលពីវេលាម៉ោង២០និង៣០នាទីយប់ថ្ងៃទី១១ ខែវិច្ឆិកា ឆ្នាំ២០១៥ នៅចំណុចសួនទ្រីមលែន ផ្លូវព្រះសុរាម្រិត ភូមិ២ សង្កាត់ចតុមុខ ខណ្ឌដូនពេញ។
នគរបាលមូលដ្ឋានបានឲ្យដឹងថា ជនដៃដល់ពីរនាក់ខាងលើនេះទី១ឈ្មោះ លឹម ថៃឡេង ភេទប្រុស អាយុ២១ឆ្នាំ ជានិស្សិត ស្នាក់នៅផ្ទះលេខ១៥១E០ ផ្លូវលេខ១៣ សង្កាត់ផ្សារកណ្ដាល១ ខណ្ឌដូនពេញ។ ទី២ឈ្មោះ ហន ម៉េងហៀង អាយុ២១ឆ្នាំ ជានិស្សិត ស្នាក់ផ្ទះលេខ៨៥ ផ្លូវលំ សង្កាត់ចាក់អង្រែលើ ខណ្ឌមានជ័យ អ្នកទាំង២ជិះម៉ូតូ១គ្រឿង ម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ 1AX4590។ ចំណែកឯជនរងគ្រោះឈ្មោះ សុខ ឯកមករា ភេទប្រុស អាយុ២០ឆ្នាំ ស្នាក់នៅផ្ទះលេខ១១E០ ផ្លូវលេខ២៨២ សង្កាត់បឹងកេងកង១ ខណ្ឌចំការមន របួសបែកក្បាលខាងឆ្វេង។
ប្រភពព័ត៌មានបានបន្តទៀតថា នៅមុនពេលកើតហេតុ ជនរងគ្រោះជិះម៉ូតូ១គ្រឿងមានគ្នា៣នាក់ ដោយចេញពីកោះពេជ្រ លុះជិះមកដល់ចំណុចកើតហេតុស្រាប់តែជនបង្កជិះម៉ូតូ១គ្រឿងគ្នា២នាក់ ប្រដាប់ដោយខ្សែក្រវាត់ដេញតាមវាយជនរងគ្រោះបណ្ដាលឲ្យបែកក្បាលខាងឆ្វេង ហើយជនដៃដល់បានព្យាយាមបើកម៉ូតូរត់គេខ្លួន រួចជនរងគ្រោះបានបើកដេញតាម និងស្រែកឆោឡោថា ចោរៗ គាប់ជួនកម្លាំងនគរបាលមូលដ្ឋាននៅក្បែរនោះជួយអន្តរាគមន៍ដេញចាប់ក្របួចជាប់ទាំង២នាក់តែម្តង។
បច្ចុប្បន្នក្រុមជនសង្ស័យកំពុងឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់៕
នគរបាលប៉ុស្តិ៍ចតុមុខឃាត់ខ្លួនក្មេងទំនើង២នាក់ ពេលដេញវាយគ្នាបែកក្បាល
0 Comments