កំពង់ស្ពឺ ៖ ចាប់តាំងពីម៉ោង០៩ព្រឹករហូតដល់ម៉ោង១៤និង៤៥នាទីរសៀលថ្ងៃទី១១ ខែវិច្ឆិកា ឆ្នាំ២០១៥ កងរាជអាវុធហត្ថខេត្តកំពង់ស្ពឺ សហការជាមួយកងរាជអាវុធហត្ថក្រុងច្បារមនរួមទាំងអាជ្ញាធរមូលដ្ឋាន បានចុះបង្ក្រាបករណីជួញដូរគ្រឿងញៀន ដែលមានពាក់ព័ន្ធនឹងបទល្មើសជាច្រើន។ កម្លាំងមន្ទីរយុត្តិធម៌ សហការជាមួយកម្លាំងអាវុធហត្ថក្រុងច្បារមន ដោយប្រើប្រាស់កម្លាំងសរុបចំនួន២២នាក់ និងដោយបានការអនុញ្ញាតពីលោកកែវ សុធា ព្រះរាជអាជ្ញាខេត្តបាកំពង់ស្ពឺ។
ប្រតិបត្តិការនេះ ធ្វើឡើងដោយយោងតាមការបញ្ជាពីឧត្ដមសេនីយ៍ត្រីជូ សារុន មេបញ្ជាការកងរាជអាវុធហត្ថ ខេត្តកំពង់ស្ពឺ ហើយដឹកនាំកម្លាំងដោយលោកអ៊ូ ផាតព្រះរាជអាជ្ញារង និងលោកវរសេនីយ៍ឯក សៅ ពន្លឺ មេបញ្ជាការរងទទួលការងារយុត្តិធម៌ ដោយចុះឆែកឆេរផ្ទះសំណាក់ចែកចាយធំទី១. មានយីហោ ផ្ទះសំណាក់សុវណ្ណ និងផ្ទះសំណាក់ទី២ មានយីហោ ឈ្មោះសុខុម ស្ថិតក្នុងភូមិក្រាំងពលទេព សង្កាត់រកាធំ ក្រុងច្បារមន ខេត្តកំពង់ស្ពឺ។
លោកវរសេនីយ៍ឯកសៅ ពន្លឺ មេបញ្ជាការរងទទួលការងារយុត្តិធម៌កងរាជអាវុធហត្ថខេត្តកំពង់ស្ពឺបានឲ្យថា ករណីខាងលើ ជនសង្ស័យ ជាមុខសញ្ញាចែកចាយគ្រឿងញៀន និងជាក្រុមឆក់ប្លន់ក្នុងមូលដ្ឋាន នាពេលកន្លងមក។ លោកបានបញ្ជាក់ថា ក្នុងប្រតិបត្តិការនោះ កម្លាំងបានធ្វើការឃាត់ខ្លួន ជនសង្ស័យចំនួន០៨នាក់ ក្នុងនោះមានស្រី០២នាក់ ប្រុស០៦នាក់ និងដកហូតសម្ភារៈ វត្ថុតាងរួមមាន: ទី១- ម៉ូតូ ចំនួន០៦គ្រឿង ទី២-ថ្នាំម៉ាទឹកកក១៤កញ្ចប់ (ធំ០៤ តូច១០កញ្ចប់) ទី៣-កាំភ្លើងខ្លីម៉ាករ៉ូឡូ០១ដើម(គ្រាប់០៧គ្រាប់) ទី៤-កាំបិតចំនួន០៣ ទី៥-ថង់ច្រកថ្នាំចំនួន៥៥៧ថង់ ទី៦-កន្ត្រៃ១០០ដើម ទី៧-ដបសម្រាប់ជក់ថ្នាំញៀនចំនួន២៧ដប ទី៨-ដាវសាំមូរ៉ៃចំនួន១១ ទី៩-ដែកកេះ ២០ ទី១០-ទុយោជក់១២៥ ទី១១-ចំពាមកៅស៊ូ០១ ទី១២-ពិល០១ ទី១៣-កាបូបស្ពាយ០៣ ទី១៤-ក្រដាសអាលុយមីញ៉ូម០២ដុំ ទី១៥-កុំព្យូទ័រយួរដៃចំនួន០១គ្រឿង ទី១៦-ស្លាកលេខម៉ូតូ០៥ ទី១៧-ទូរស័ព្ទ០៧គ្រឿង ទី១៨-លុយដុល្លារចំនួន៦៨៥២ដុល្លារ ទី១៩-លុយខ្មែរ០៩លានប្រាំបីសែនរៀល ទី២០-ទូដែក ០១ ទី២១-កន្ទោងចំនួន២០។
បច្ចុប្បន្នជនសង្ស័យ និងសម្ភារៈ រួមទាំងវត្ថុតាងបានបញ្ជូនមកទីបញ្ជាការអាវុធហត្ថខេត្តដើម្បីចាត់ការទៅតាមនីតិវិធី។
គេសង្កេតឃើញថា ម្ចាស់ផ្ទះហាក់លាក់បាំងពីសមត្ថកិច្ច ប៉ុន្តែសមត្ថកិច្ចបានសង្ស័យមុខសញ្ញាទាំងនេះចេញចូលទើបឈានដល់ការឆែកតាមបន្ទប់ តែត្រូវជនសង្ស័យខ្លះដឹងខ្លួន បានរត់គេចមុនកម្លាំងចូលដល់ តែបន្ទប់ជនសង្ស័យមួយចំនួនស្នាក់នៅ បានបង្ហាញថាមនុស្សទើបចេញ ដោយទូរទស្សន៍ និងម៉ាស៊ីនត្រជាក់នៅមិនទាន់ពន្លត់នៅឡើយ៕
បង្ក្រាបគ្រឿងញៀន២ករណីធំៗកក្រើកផ្សារកំពង់ស្ពឺ
0 Comments