ពោធិ៍សាត់ ៖ បុរសម្នាក់បានស្លាប់ភ្លាមមួយរំពេច ដោយសារតែសុំម៉ូទ័រ ដែលខូចពីវត្តមកជួសជុលទាំងមិនមានជំនាញច្បាស់លាស់ ធ្វើខុសបច្ចេកទេស ផ្នែកប្រព័ន្ធអគ្គិសនី ហើយត្រូវម៉ូទ័រនោះឆក់។
ហេតុការណ៍នេះបានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី១២ ខែវិច្ឆិកា ឆ្នាំ២០១៥ ត្រង់ចំណុចក្រោមផ្ទះជនរងគ្រោះស្ថិតក្នុងភូមិដូង ឃុំក្បាលត្រាច ស្រុកក្រគរ ខេត្តពោធិ៍សាត់។
លោកខៀវ សុខា នាយប៉ុស្តិ៍រដ្ឋបាលនគរបាលឃុំក្បាលត្រាចបានប្រាប់ពីហេតុការណ៍នៅកន្លែងកើតហេតុ ដោយយោងតាមសម្ដីប្រពន្ធជនរងគ្រោះឈ្មោះសោ វឿន អាយុ៤៨ឆ្នាំ ដែលបានឃើញផ្ទាល់ភ្នែកថា ៖ ប្ដីរបស់នាងស្លាប់ដោយខ្សែភ្លើងឆក់នេះ ឈ្មោះភិន ទ្រី អាយុ៤៥ឆ្នាំ រស់នៅភូមិខាងលើ ដោយមុនពេលកើតហេតុ ប្ដីនាងបានទៅវត្តសុំម៉ូទ័រមួយគ្រឿង ដែលប្រើការមិនកើតយកមកផ្ទះ អង្គុយជួសជុលនៅខាងក្រោមផ្ទះបម្រុងទុកប្រើប្រាស់កាត់ការ៉ូ និងរបស់ផ្សេងៗ។
លោកសុខា បន្តថា ស្របពេលដែលជនរងគ្រោះជួសជុលដោយខ្លួនឯងរួចរាល់ហើយ ក៏បានយកឌុយដោតចូលក្នុងព្រីភ្លើងតភ្ជាប់ជាមួយឌុយម៉ូទ័រនោះ រួចលូកដៃទៅចុចកុងតាក់ដើម្បីបញ្ជាក់ថាតើ ម៉ូទ័រភ្លើងនេះដំណើរការ ឬអត់។ ពេលដែលបុរសនេះលូកដៃទៅច្របាច់កុងតាក់ ម៉ូទ័រនោះ ចរន្តភ្លើងប្រព័ន្ធអគ្គិសនី ច្រាស់ច្រាល់ទិសមកវិញ ទើបបណ្ដាលឲ្យឆក់ស្លាប់ភ្លាមៗមួយរំពេចនៅលើគ្រែក្រោមផ្ទះនោះតែម្ដង។
លោកអែម រុន អធិការនគរបាលស្រុកក្រគរ បានឲ្យដឹងថា មូលហេតុ ដែលបណ្ដាលឲ្យបុរសនេះស្លាប់ដោយឆក់ខ្សែភ្លើង ដោយសារតែខ្លួនមិនចេះស្ទាត់ជំនាញច្បាស់លាស់ ហើយមិនយកម៉ូទ័រនោះទៅឲ្យជាងជួសជុល បែរជាយកមកធ្វើខ្លួនឯងខុសបច្ចេកទេស ក៏ត្រូវចរន្តភ្លើងឆក់ស្លាប់តែម្ដង។ ក្រោយពីពិនិត្យសពនេះហើយ ខាងជំនាញរបស់លោកក៏បានប្រគល់ជូនក្រុមគ្រួសារធ្វើបុណ្យតាមប្រពៃណី៕
សុំម៉ូទ័រ ដែលខូចពីវត្តមកជួសជុលខុសបច្ចេកទេស ត្រូវម៉ូទ័រឆក់ស្លាប់
0 Comments