លោកប្រធានាធិបតីរុស្ស៊ី វ្ល៉ាឌីមៀរ ពូទីន បាននិយាយថា រុស្ស៊ីនឹងមិនចូលរួមនៅក្នុងការប្រកួតប្រជែងអាវុធណាមួយឡើយ ប៉ុន្តែឧស្សាហកម្មការពារជាតិរបស់ប្រទេសនេះចាំបាច់ត្រូវតែបំពេញចន្លោះប្រហោងមួយចំនួន។
លោក ពូទីន បាននិយាយក្នុងកិច្ចប្រជុំមួយស្ដីពីការអភិវឌ្ឍកងកម្លាំងប្រដាប់អាវុធរុស្ស៊ី ក្នុងទីក្រុង Sochi ថា “យើងនឹងមិនចូលរួមក្នុងការប្រកួតប្រជែងអាវុធណាមួយឡើយ យើងគ្រាន់តែត្រូវការដើម្បីពង្រឹងឡើងវិញប៉ុណ្ណោះ នៅលើអ្វីដែលយើងបានបាត់បង់នៅក្នុងទសវត្សរ៍ឆ្នាំ ១៩៩០ – ២០០០ នៅពេលដែលកងកម្លាំងប្រដាប់អាវុធ និងរោងចក្រឧស្សាហកម្មយោធារបស់យើងជួបបញ្ហាទុន”។
នៅក្នុងជំនួបនេះ លោកប្រធានាធិបតីបានសង្កត់ធ្ងន់ពីសារៈសំខាន់នៃការអនុវត្តវិធានការក្នុងគោលបំណង ដើម្បីបង្កើនប្រសិទ្ធភាពនៃអន្តរកម្ម រវាងក្រសួងការពារជាតិ និងរោងចក្រឧស្សាហកម្មយោធា។
បើយោងតាម លោក ពូទីន បានឲ្យដឹងថា “ចំនួននៃអាវុធថ្មី និងម៉ូដែលអភិវឌ្ឍល្អប្រសើជាងមុន ដែលទទួលបានដោយយោធារុស្ស៊ីនៅឆ្នាំនេះ គឺមានការកើនឡើងជាងមួយភាគបួន បើប្រៀបធៀបទៅនឹងឆ្នាំ២០១៤”។
លោកបានបន្ថែមថា “វាជាការសំខាន់ ដែលសព្វាវុធសម័យទំនើបត្រូវបានប្រើយ៉ាងទូលំទូលាយដោយកងកម្លាំងប្រដាប់អាវុធ”។
បើយោងទៅតាមកម្មវិធីអាវុធរបស់រដ្ឋដែលបានបង្កើតឡើងនៅក្នុងឆ្នាំ ២០១១ រុស្ស៊ីនឹងចំណាយថវិកាប្រមាណ ៦៥០ ពាន់លានដុល្លារ ដើម្បីធ្វើឲ្យយោធារបស់ខ្លួនកាន់តែទំនើប និងបំពាក់អាវុធថ្មីៗរហូតដល់ឆ្នាំ ២០២០។
កាលពីដើមឆ្នាំនេះក្រសួងការពារជាតិបានប្រកាសថា នឹងមិនមានការកាត់បន្ថយការចំណាយទៅលើកម្មវិធីនេះទេ បើទោះបីជាមានការលំបាកផ្នែកសេដ្ឋកិច្ច នៅក្នុងប្រទេសរុស្ស៊ីក៏ដោយ៕
RT
លោកពូទីន៖ រុស្ស៊ីនឹងមិនចូលរួមក្នុងការប្រកួតប្រជែងអាវុធឡើយ
0 Comments