ភ្នំពេញ ៖ ថ្លែងក្នុងពិធីចែករំលែកបទពិសោធន៍ស្ដីពីការងារដឹកនាំ គ្រប់គ្រង និងការគ្រប់គ្រង សភាពការណ៍សន្តិសុខ សណ្ដាប់ធ្នាប់សាធារណសម្រាប់ការបោះឆ្នោត និងក្រោយពេលបោះឆ្នោតនៅកម្ពុជាដល់សិក្ខាកាម សុក្រឹតការ ថ្នាក់ឧត្តមសេនីយ៍ វរសេនីយ៍ឯកជំនាន់ទី១៣ នៅសាលាបណ្ឌិតសភានគរបាលកម្ពុជា នាព្រឹកថ្ងៃទី១១ ខែវិច្ឆិកាសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា ប្រសិន កម្ពុជា មិនចាត់វិធានការបង្ក្រាបឲ្យទាន់ពេលពេលនោះទេ វានឹងធ្វើឲ្យប៉ះពាលដល់សន្តិសុខជាតិ ប៉ះពាលដល់ការវិនិយោគទុនបរទេស និងសេដ្ឋកិច្ចជាតិ។
សម្ដេចបញ្ជាក់ថា ការអនុវត្តច្បាប់អន្តោប្រវេសន៍កម្ពុជាចាប់បណ្ដេញជនសង្ស័យជនជាតិចិនប្រុសស្រី ចំនួន១៦៨នាក់ ទៅកាន់ប្រទេសចិនកាលពីថ្ងៃទី១០ វិញនោះ គឺវាមិនពាក់ព័ន្ធបញ្ហានយោបាយនោះទេ។ សម្ដេចក្រឡាហោម ស ខេង បានចាត់ទុកថា ជនសង្ស័យជនជាតិចិនដែលគេដឹងថា មានចំនួន១៦៨នាក់នោះ គឺជាក្រុមឧក្រិដ្ឋជនឆ្លងដែនដែលមានអង្គការចាត់នៅស្រុកចិន ហើយបានមកតាំងមូលដ្ឋានខេត្តព្រះសីហនុធ្វើសកម្មភាពចាប់ជំរិតទារយកប្រាក់ពីក្រុមឈ្មួញ អ្នកវិនិយោគ អ្នករកស៊ី និងអាជីវករជាដើមនៅប្រទេសចិន តាមរយៈប្រព័ន្ធទូរស័ព្ទ ប្រព័ន្ធIntenet និងប្រព័ន្ធOnlineនានា។សម្រាប់ការចុះស៊ើបអង្កេតតាមចាប់ឃាត់ខ្លួនជនសង្ស័យជនជាតិចិនទាំងនោះគឺបានធ្វើឡើងបន្ទាប់ពីមានដីកានគរបាលរបស់ប្រទេសចិនបានស្នើសុំកិច្ចសហប្រតិបត្តិការជាមួយកងកម្លាំងនគរបាលកម្ពុជា និងយោងតាមច្បាប់អន្តោប្រវេសន៍កម្ពុជានៅថ្ងៃទី៣១ ខែតុលា ឆ្នាំ២០១៥ កម្លាំងនគរបាល អន្តោប្រវេសន៍ ក្រសួងមហាផ្ទៃ និងកម្លាំងអន្តោប្រវេសន៍ខេត្តព្រះសីហនុ សហការជាមួយសមត្ថកិច្ច របស់ចិនចូលឃាត់ខ្លួនភូមិគ្រឹះ២កន្លែង ស្ថិតក្នុងភូមិ១ សង្កាត់៣ ក្រុងព្រះសីហនុ ក្បែរឆ្នេរអូរឈើទាលរហូតមកដល់ថ្ងៃទី១០ ខែវិច្ឆិកា ជនសង្ស័យជនជាតិចិន១៦៨នាក់ ត្រូវបានចាត់បញ្ជូនតាមជើងយន្តហោះពិសេសរបស់នគរបាលប្រទេសចិន។
សម្ដេច ក្រឡាហោម បញ្ជាក់ថា សម្រាប់ជនសង្ស័យទាំងនោះ បើកម្ពុជាមិនចាត់វិធានការបង្ក្រាបឲ្យទាន់ពេលពេលនោះទេ វានឹងធ្វើឲ្យប៉ះពាល់ដល់សន្តិសុខជាតិ ប៉ះពាល់ដល់ការវិនិយោគទុនបរទេស និងសេដ្ឋកិច្ចជាតិ។ នៅក្នុងពិធីចែករំលឹកបទពិសោធន៍នៃគ្រប់គ្រងនោះដែរ សម្ដេចក្រឡាហោម ស ខេង ក៏បានលើកឡើងពីបញ្ហាប្រឈមនានាទៀត ដែលពាក់ព័ន្ធទៅដល់ដំណើរគ្រប់គ្រងអ្នកដឹកនាំ ជាច្រើនទៀត ពិសេសការខិតខំអត់ធ្មត់ថែរក្សាសន្តិសុខសណ្ដាប់ធ្នាប់ នៅក្នុងអំឡុងពេលមុន និងក្រោយបោះឆ្នោតឆ្នាំ២០១៣ ហើយថា បទពិសោធន៍កិច្ចខិតខំថែរក្សាការពារសន្តិសុខនាពេលនោះ គឺបានធ្វើ បានផ្តល់មេរៀន និងបទពិសោធន៍សម្រាប់ការចាត់វិធានការនៅអាណត្តិក្រោយៗទៀត។
សូមរំលឹកថា កាលពីម៉ោង១២ រំលងអធ្រាត្រឈានចូលថ្ងៃទី១០ ខែវិច្ឆិកា ឆ្នាំ២០១៥ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានបញ្ជូនមុខសញ្ញាសង្ស័យ ជនជាតិចិនទាំង១៦៨នាក់ទៅកាន់ប្រទេសចិន តាមជើងយន្តហោះពិសេសរបស់ចិន។
លោកឧត្តមសេនីយ៍ឯក ឃុន សំបូរ អគ្គនាយករងនៃអគ្គនាយកដ្ឋានអន្តោប្រវេសន៍មានប្រសាសន៍ថា ដោយមានការសហការល្អរវាង រាជរដ្ឋាភិបាលនិងសាធារណរដ្ឋចិន ជនសង្ស័យចាប់ជំរិតទារប្រាក់តាមប្រព័ន្ធ Internet ហៅកាត់ថា VOIP ដែលមកធ្វើសកម្មភាពចាប់ជំរិតនៅលើដែនដីកម្ពុជាកាលពីថ្ងៃទី៣១ ខែតុលា ឆ្នាំ២០១៥នៅខេត្តព្រះសីហនុ កន្លងមកត្រូវបានប្រគល់ឲ្យនាយកដ្ឋានព្រហ្មទណ្ឌនៃប្រទេសចិននៅព្រលានយន្តហោះអន្តរជាតិភ្នំពេញ ដឹកតាមយន្តហោះពិសេសទៅកាន់ប្រទេសចិន ដើម្បីឲ្យសមត្ថកិច្ចចិនធ្វើការចាត់ចែងទៅតាមផ្លូវច្បាប់។
យោងតាមរបាយការណ៍របស់អគ្គនាយកដ្ឋានអន្តោប្រវេសន៍បានបញ្ជាក់ថា ចាប់តាំងពីឆ្នាំ២០១៤ កម្លាំងជំនាញបានធ្វើការឃាត់ខ្លួន និងបណ្ដេញចេញជនបរទេសចំនួន៣២២៦នាក់ ស្រី៥៦៧នាក់ វៀតណាម២៧៩៤នាក់ ស្រី៥២២នាក់៕
រដ្ឋមន្ត្រីក្រសួងមហាផ្ទៃ ៖ បើមិនចាត់វិធានការបង្ក្រាបជនសង្ស័យជនជាតិចិនបានទាន់ពេលទេនឹង ប៉ះពាលដល់សន្តិសុខ និងការវិនិយោគទុនបរទេស
0 Comments