ភ្នំពេញ ៖ ស្ត្រីកម្ពុជាចំនួន១៦រូប មកពីស្ថាប័នផ្សេងៗគ្នា ដែលទទួលបានជោគជ័យ ក្នុងអាជីវកម្មក៏ដូចជាក្នុងអាជីពការងារ បានចូលរួមចែករំលែកបទពិសោធន៍តាមរយៈការជជែកដេញដោលពីភាពជាអ្នកដឹកនាំ(The Women Debate on Leadership )ដែលសហការរៀបចំឡើងដោយ មជ្ឈមណ្ឌលរដ្ឋាលីដឌីង ក្រសួងកិច្ចការនារី មជ្ឈមណ្ឌលសហប្រតិបត្តិការកម្ពុជា ជប៉ុន និងសមាគមសហគ្រិនស្ត្រីកម្ពុជា។
លោកស្រី ច័ន្ទ សូរីយ៍ រដ្ឋលេខាធិការក្រសួងកិច្ចការនារី បានមានប្រសាសន៍កោតសរសើរដល់រដ្ឋាលីដឌីង ដែលខិតខំប្រឹងប្រែងសហការរៀបចំ ឲ្យមានជាវេទិកានេះឡើងឆ្លើយតបទៅនឹងយុទ្ធសាស្ត្ររបស់រាជរដ្ឋាភិបាលកម្ពុជា បានប្ដេជ្ញាចិត្ តក្នុងការលើកកម្ពស់តួនាទី ស្ត្រីក្នុងភាពជាអ្នកដឹកនាំ។មិនតែប៉ុណ្ណោះវេទិកានេះ បានបង្ហាញឲ្យឃើញថា បច្ចុប្បន្ននេះយើងមានស្ត្រីជាច្រើនដែលកំពុងចូលរួមយ៉ាងសកម្មនៅក្នុង ការដឹកនាំស្ថាប័ន អង្គភាពនានាគ្រប់វិស័យ។ ចំណុចនេះសបញ្ជាក់ថា សង្គមទាំងមូលទទួលស្គាល់ និងបន្តគាំទ្រថែមទៀតអំពីតម្លៃ នៃការចូលរួមរបស់ស្ត្រី។
រដ្ឋាលីដឌីង គឺជាមជ្ឈមណ្ឌលស្រាវជ្រាវ និងបង្កើតភាពជាអ្នកដឹកនាំនៅកម្ពុជា ហើយមានបេសកកម្មធ្វើឲ្យជីវិតកាន់តែល្អអស្ចារ្យសម្រាប់ប្រជាពលរដ្ឋកម្ពុជា។ រដ្ឋាលីដឌីង មានកម្មវិធីពាក់ព័ន្ធនឹងភាពជាអ្នកដឹកនាំជាច្រើនដូចជា កម្មវិធីបណ្ដុះបណ្ដាល និងប្រឹក្សាភាពជាអ្នកដឹកនាំ វេទិកាជួបជាមួយនឹងអ្នកដឹកនាំ វេទិកានិយាយពីភាពជាអ្នកដឹកនាំ និងក្លិបអភិវឌ្ឍន៍ភាពជាអ្នកដឹកនាំ។ កម្មវិធីទាំងនេះ នឹងមានការអញ្ជើញវាគ្មិនល្អៗរបស់កម្ពុជា ពីស្ថាប័នរដ្ឋ ឯកជននិងអង្គការជាតិ មកជួបជុំគ្នាជាមួយអ្នកសិក្សា និងមហាជន ដើម្បីបង្កើតឲ្យមានឱកាសលើកតម្លៃ និងរៀនជាមួយអ្នកអនុវត្តផ្ទាល់ពីគំនិតពីទស្សនៈ និងពីការអនុវត្ត ផ្សេងៗពាក់ព័ន្ធនឹងភាពជាអ្នកដឹកនាំខ្លួនឯង គ្រួសារ ស្ថាប័ននិងប្រទេសជាតិ។ គោលបំណងនៃកម្មវិធីនេះ គឺធ្វើឡើង ក្នុងន័យរួមគ្នា កសាងភាពជាអ្នកដឹកនាំនៅកម្ពុជាឲ្យកាន់តែប្រសើរ និងបង្កើតឲ្យមានវប្បធម៌ចែករំលែក ខ្មែរជួយខ្មែរ សម្រាប់ជាកេរ្តិ៍ដំណែលដល់កូនខ្មែរ របស់យើងនាពេលបច្ចុប្បន្ន និងទៅអនាគត។
ដោយឡែកសម្រាប់វេទិកាដេញដោលភាពជាអ្នកដឹកនាំរបស់ស្ត្រី តាមរយៈការចែករំលែកបទពិសោធន៍ ដែលទទួលបានជោគជ័យ ក្នុងការដឹកនាំនៅតាមស្ថាប័ន អង្គភាពនានាក្នុងពេលនេះខ្លឹមសារនៃកម្មវិធីទាំងមូលនឹងធ្វើការចងក្រង ទៅក្នុងគេហទំព័រ សៀវភៅ និងទស្សនាវដ្ដីស្រាវជ្រាវភាពជាអ្នកដឹកនាំ ហើយនិងធ្វើការផ្សព្វផ្សាយជាសាធារណៈ សម្រាប់ជាប្រយោជន៍ដល់សង្គមជាតិយើងទាំងមូល៕
ស្ត្រីកម្ពុជាចំនួន១៦រូប ចូលរួមចែករំលែក បទពិសោធន៍តាមរយៈការជែកដេញដោលភាពជាអ្នកដឹកនាំ
0 Comments