ភ្នំពេញ ៖ រថយន្តកុងតឺន័រដឹកឥដ្ឋការ៉ូមួយគ្រឿង ខណៈចតទុកចោលនៅចិញ្ចើមផ្លូវសុខៗដោយសារតែដឹកធ្ងន់ពេកក៏ផុងដីក្រឡាប់ប៉ះជើងច្រងាងកាលពីវេលាម៉ោង៧និង៣០នាទីថ្ងៃទី១៣ ខែវិច្ឆិកា ឆ្នាំ២០១៥ ស្ថិតនៅលើផ្លូវ៥៩៨ក្រុម៨ ភូមិខ១ សង្កាត់ច្រាំងចំរេះ១ ខណ្ឌឫស្សីកែវ តែនៅក្នុងហេតុការណ៍នោះមិនបណ្ដាលឲ្យអ្នកណាម្នាក់រងរបួសនោះទេ។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនកើតហេតុគេឃើញរថយន្តកូរ៉េដឹកថ្មឥដ្ឋការ៉ូមួយគ្រឿង ពណ៌ស ស្លាកលេខ ភ្នំពេញ 3B-6010 ដែលបានផ្ទុកឥដ្ឋការ៉ូរាប់តោនបើកបរដោយបុរសម្នាក់ ជែម ភេទប្រុស អាយុ៣៥ឆ្នាំ មុខរបរបើករថយន្តរបស់កំពុងផែស្វយ័តភ្នំពេញ។ ប្រភពបន្តថាខណៈអ្នកបើកបរបានចតរថយន្តទុកចោល ស្រាប់តែបានផុងនឹងដីផុកក៏ក្រឡាប់ប៉ះជើងផ្ងារច្រងាង តែសំណាងល្អមិនមានអ្នកណាម្នាក់រងរបួសទេ។
សេចក្ដីរាយការណ៍ពីតៃកុងរថយន្តមានឈ្មោះ ជែម បានឲ្យដឹងថា កាលពីយប់គាត់បានបើករថយន្តខាងលើនេះដឹកឥដ្ឋការ៉ូទៅបឹងដាក់នៅបឹងបាយ៉ាប ខណៈមកដល់ចំណុចកើតហេតុរថយន្តក៏បែកកង់ហើយបានឈប់នៅកន្លែងកើតហេតុ ដើម្បីដោះស្រាយរកប៉ះកង់ក៏ចតរថយន្តចោលរហូតព្រឹកឡើងក៏ផុងក្រឡាប់តែម្តង។
ជាមួយគ្នានោះ ដោយសារមិនមានបង្ករបួសស្នាមដល់អ្នកដំណើរផ្សេងទៀត ឬប៉ះពាល់ដល់សម្បត្តិសាធារណៈសមត្ថកិច្ចបានឲ្យម្ចាស់ហៅរថយន្តស្ទូចមកធ្វើការលើករថយន្តខាងលើនេះចេញ ដើម្បីបញ្ចៀសការកកស្ទះចរាចរណ៍៕
រថយន្តកុងតឺន័រដឹកការ៉ូមួយគ្រឿង បានផុងក្រឡាប់ផ្ងារជើងទ្រមេឃ
0 Comments